سوبرخباثة مان الارضي !!!!

التفاصيل

تم إنشاءه بتاريخ الخميس, 26 أيلول/سبتمبر 2019 10:33

كتب بواسطة: سيف الدين الألوسي

                             سيف الدين الألوسي

سوبرخباثة مان الارضي !!!!

سوبرمان الاصلي هو شخصية خيالية وتتلخص في كونه طفل صغير ولد في كوكب كريبتون ، وتنبأ والده بانفجار هذا الكوكب ،، فخاف على ابنه وركبه صاروخ ودزه لكوكب الارض قبل انفجار كريبتون بفترة قليلة ،، واما الحجية ام سوبرمان الاصلي فگالت ،، اني ابقه ويه رجلي ، رجلي على رجله ،، نعيش ونموت سوه !! وانفجر كريبتون وتوفوا ابو وام سوبرمان ،، اما البيبي البرئ سوبرمان فقد وصل الارض بصاروخه سالما غانما ،، ونزل بمدينة اميركية وتبنوه عجوز وشايب اميركان ما عدهم بزرة !!! وكبر وصار صحفي وحب صحفية وتنكر بهذه الشخصية ،، وافنى حياته بحب الخير ومكافحة الشر والاذية والتي يختص بها سكان الارض وكذلك مكافحة السرقات والنصب والاحتيال وغيرها من سوالف اهل الارض ،، يساعده في جهوده الخيرة رفيق دربه الطويل الرجل الوطواط أو زكور ،،، وكان سوبرمان يخترق حاجز الزمن ويعرف الماضي من زمن الدينصورات الحيوانية ، مرورا بالدينصورات البشرية وصولا الى المستقبل المجهول للارض و شعوبها !!!!!

اكو مواطن ارضي حاير بروحه ، و زهگانه روحه من الارض وسكانها ونفاقهم وشرهم ،،، اجاله جاهل وهو يخاف عليه من الشر والنفاق والعادات التعبانة والمستقبل المجهول بالارض ،، فسواله صاروخ وحشك ابنه الرضيع بالصاروخ ودزه الى كوكب السعادة ، والذي اسمه كوكب هابينيس ، والواقع غرب المجرة المسماة مجرة ونسه للصبح !!
نزل بصاروخه في مدينة حب وضحك ،، وتبنوه مواطنين امرأة حسناء وشاب وسيم كانوا جالسين يتبادلون القبل على ضفاف بحيرة العسل وعلى ضوء الشموع ويكرزون حب ويشربون واين من القرون الوسطى !!!
وهم بمنتهى السعادة والهناء !!!
اول منزل هذا الطفل الارضي ،، بال وتفل ببحيرة العسل ،، وكام يلعب بالشموع وحرگ نفنوف المره ،، ومن ثولته للرجال ، اندعم بتيل الكهرباء وهو ينقل الحب للمستشفى وتفلشت سيارته التي تشتغل بالطاقة الذاتية للمشاعر النفسية ، ولهذا السبب فقد السيطرة عليها كونه كان متأثر جدا على حبه !!!
المهم فضت سلامات واخذوه للطفل لبيتهم وبعد ان لقحوه ضد الاذية !!
اللقاح مفاد ،، وشب الطفل على خلق المشاكل والمؤامرات وصور تصاوير وسواها فوتوشوب للرجال ويه نسوان ،، وخله حبيبته تعوفه ،،، ويومية مشكلة ،، لو بايك فلوس لو موبايل من الناس ،، وچماله كام يبوك منهولات الشوارع واضوية وتلفونات الشارع ،، وكام يبيع اسئلة الامتحانات وبعد ان علم سكان كوكب السعادة على الكلاوات والرشوة والنفاق ،، وشوية شوية انگلبت حياتهم الى جحيم واشتغلت الحروب بيناتهم ،، وضاعت اعمار شبابهم بالحروب وجذب ساستهم ،،وعم الفقر وانتشرت الامراض والجريمة المنظمة في مدنهم !!!!
وتخبل الرجال الذي رباه ،، وگام يحچي ويه نفسه ويردد دائما ،، من خره بساعة السودة اللي شفت بيها هذا النغل ،،، وحبيبته انتحرت من القهر ،،،
اما صاحبنه الشاب الارضي السوبر خباثة مان ،، فقد باگ صاروخ بالباكيت من الكوكب بعد ان سلب صاحبه ،، ورجع بيه للارض وهو متونس وسعيد وخربان من الضحك !!!! وبعد ان گلب كوكب السعادة ،، الى مگبره !!!