حچاية التنگال ٢٠٤

التفاصيل

تم إنشاءه بتاريخ السبت, 01 حزيران/يونيو 2019 07:27

كتب بواسطة: د.سعد العبيدي

                             د.سعد العبيدي

حچاية التنگال ٢٠٤

إشعدهم الربع متجمعين اهنا؟... يريدون اصلاح... والله خوش حچي دقيقة خلينه نفتر بنصهم بلكت نلگينا واحد يقبل نتناقش وياه، لأن آني أدري كل الي يستخدمون الشارع للإصلاح، ما يقبلون يتناقشون حتى بالإصلاح.
مرحبة أخي... هلا ومية هلا... تسمحلي أتناقش وياك آني باحث وأريد أفتهم حتى لمن أكتب أعرف شلون أكتب.
إي تفضل، آني عضو لجنة بهذا التجمع الي ينادي بالإصلاح... بارك الله بيك وبكل المنادين بالإصلاح، والصدگ العراق ما تقومله قيامه اذا ما يبدي بالإصلاح... دقيقة آني شايفك... يجوز آني ماكو مظاهرة طلعَتْ ما طلعت بيها... إي تذكرت انت من الي دخلوا البرلمان بمظاهرات ٢٠١٦، وبالتحديد چنت واگف يم القنفة الي تخربت... هاي شلك بيها؟.
عوفنا من القنفة وتكاليف تصليحها، راح أسئلك چم سؤال اذا جاوبتني عليهن، أنت مصلح وآني أوقع وياك واتعهدلك أطلع بالمظاهرات الي دا تحضرولها بالصيف... على بختك اسئل:
بعد ما انهانوا برلمانيين من مظاهرتكم، أخذتوا وفد ورحتوا اعتذرتوا من رئيس كتلة دينية جنوبية. تفتهم قصدي... أي... وزين ما سويتوا، ليش ما رحتوا اعتذرتوا من النواب الأكراد الى عافوا بغداد، ومن نواب الغربية؟.
هاي بوكتها صارت، وما ردنه تكبر الفتنة.
أگلك اشوكت ما تعتمدون الاعتذار من كل واحد يصيبه ضرر، بغض النظر عن أصلة واشوكت ما تقدمون الكفوء والمخلص على ربعكم ذاك الوكت أصدگ، وآلاف العراقيين يصدگون انتو مصلحين وتسعون من كل گلبكم دا تعبرون المحاصصة والطائفية.
واذا لا. لا تزعلون كله طبخ حصو.