حچاية التنگال ١٣١: الكونه الجاية

التفاصيل

تم إنشاءه بتاريخ الأحد, 10 حزيران/يونيو 2018 07:02

كتب بواسطة: د.سعد العبيدي

                           د.سعد العبيدي

حچاية التنگال ١٣١: الكونه الجاية

أكلك البرلمان إلْهَ حق يصدّرْ قرارات للمفوضية لو ما إله؟.
طبعاً إلهَ، يمعودْ الدستور يگول اله، ليش مدوخ نفسك.
لا أشو آني أگول كل حق ما إله، وروح اسأل أهل القانون والسياسيين الي كتبوا الدستور راح يگلولك ما اله.
زين، ورئاسة الوزراء الي شكلت لجنه تحقيق بالخروقات واقتنعت صاير تخيوّزْ وتقصير وتعمد تزوير والأجهزة الالكترونية ما مجربهَ ولا صاير عليها ممارسات ويمكن اختراقها. هذا حچي أصلا حتى مجلس الوزراء ما إله يادْيّهَ على المفوضيه. مو دا نگول مستقله شنو ما تعرفون معنى المستقله.
عمي نعرفها، والله العظيم نعرفها، بس هي قابل معصومه، واذا غلطت منو الي راح يحقق بالغلط ومنو الي عنده سلطة يحاسبها؟. غير رئاسة الوزراء، لو عندك غير راي.
أگلك، ليش هي بس هاي، المفوضيه تْجَمِدَت ومصْرّه تگول مو من حق أحد يجمدني، وراح تبقه تگول ما اتجمد، لأن كل واحد من الگواله مالتها منتچي على دنگه.
گلي مجلس القضاء الي هروّل ليگدام ونفذ قرار مجلس النواب الي يگولون عليه السلطة التشريعية، ودَزْ قضاة، وگعدو بالمفوضيه وحلفوا يمين الا يعيدون العد والفرز يدوياً لكل الأصوات حتى مال أبو الزمير، عاد اشراح تسوي المفوضية يرحم والديك؟.
أگلكم علواه على هاي الرطينه آني أشوف بعد عدنه كونهَ ازغيره إذا طلعت النتائج مو مثل الي انعلنتْ، لأن الربحانين ما راح يقتنعون وكلهم عدهم تواثي بالبيوت وبالجوامع مضمومه، والي يربح من الخسرانيين أكيد هم راح يلزم توثيته، بس لا تخافون الكونه بين ولد العم ما راح تندفع بيها فصول.