سحر لبغداد يفرق عن كل مدن العالم !!!

                                                

                        سيف الدين الألوسي

   

  سحر لبغداد يفرق عن كل مدن العالم !!!

     

لا ادري ،، هل انا افرق عن البشر ؟؟؟ عندما اسير في شوارع بغداد كأنني اسير في الجنة !! ورغم الهوسة والقله بالغ مالتها !!
عندما ارى فنونها ومعارضها والمتبقين من فنانيها وفناناتها كأنني املك كل العالم !!!
عندما ارى اكاديميتها للفنون ومعهدها ترجع بي السنون الى ما قبل التأريخ !!
متنبيها وشارعه لا مثيل له حتى في الاحلام !!
رائحة الورق والكتب والشلغم واللبلبي والسميط ،، واصوات استكانات الچاي والحامض وشربت الرمان !! ورائحة بيوت زمان والعگود والدرابين !!! خليط عجيب مثل خليط چاو چاو ! لا يعرفه سوى اهلها ومحبيها !!!
دوام الكليات وانتظار الاباء لاولادهم في المدارس وووووووووو !!
تركب عدة تكسيات !!! الاول يسمع القران الكريم ووجه يبچي أمر من حظي !! ،، الثاني يدندن مع ام كلثوم ونتذكر اني وياه ايام العسكرية واسماء الفرق والوحدات وقواطع العمليات ونورث جگارة للعمر الذي ذهب !! .

الثالث يسمع فيروز ويتذكر ايام عرسه ،،، اما الرابع فيسمع هوسة اليوم من اغاني وعندما سألته ،، ابني عندك بكرة مال مسنات ( ام كلثوم ، حليم ، فريد ، عفيفة اسكندر !!! ) ،،، جاوبني ٫، حجي انت شكد قديم !!!! كتله بابا اني موحجي ولا بيه حيل احج !!!!!!!!!!!! كام يضحك وفتح الراديون الاف ام العراقي واغنية مسامعها گبل !!!
استمتع بمشهد النسوان ، وقسم منهن من يسوقون ببغداد وخصوصا العجايز ،، معرتات بالاستيرن عبالك ديسوقون طائرة جامبو وبيدهم گمع الصمون !! وكل دقيقة ضاربين بريك !!! اما بنات تالي وكت فكلهم كمارو وموستانغ !!!! ويا ريت الشباب يعود يوما !!!
مگدية شايلة اي فون ٧ !!! اپل !!!!
گصاب فاتح فيس بوك ومزفر الكي بورد !!!!
سواق اللوريات الرمل والحصو لابسين جينز محل الدشداشة سابقا !!!
شرطي يحجي بالماسنجر لو بالڤايبر ويه الاوخ !!! بالختله !!
دعايات للسفر الى بيروت واوكرانيا واستنبول وانتاليا وشرم الشيخ واذربيجان !! وتنزيلات وتخفيضات للشياب مع لفات همبرغر !!!!
ماركات شهيرة للالبسة والاحذية وسوق فيه كل شئ!!
بلابل وبزازين وحمام وذبان !!! في تناغم انساني !!!!
مدينة فيها كل شئ وينقصها شئ رئيسي واحد مع عامل مهم !!!
((((((((( الحظ والمحبين )))))))))وچفيان شر الحاقدين !!!!
بغداد سيدة المدن والبلاد ،، ستعودين وانا على يقين ،، شوكة في اعين الحاسدين !!!!!!!!!.
تحياتي

  

إذاعة وتلفزيون‏



أفلام من الذاكرة

الأبراج وتفسير الأحلام

المتواجدون حاليا

1229 زائر، ولايوجد أعضاء داخل الموقع