حچاية التنگال : درب الزلگ / ١١٥

التفاصيل

تم إنشاءه بتاريخ الأحد, 04 آذار/مارس 2018 08:37

كتب بواسطة: د.سعد العبيدي

                           د.سعد العبيدي

درب الزلگ: ١١٥

أكو مثل عراقي مْرَتَبْ يگول الناس بالناس والگرعة تمشط الراس، والناس إحنه العراقيين الي ملتهين بدردنة وحتى ما نگدر نحك الراس، والگرعة أخوتنة قسم من البرلمانيين الي ما يدرون بالدنيا شكو، تذكرتهم وتذكرت وياهم هذا المثل، من دا يحچي واحد محروگ گلبه على قانونن شرعوه قبل فترة عن حجب المواقع الاباحية وربطة بسالفة وحدة گوادة بشارع .... بمدينة الشعب حالياً وهاي الوحدة عجز جارها واهل الشارع أن يشَيْلوها لأن البيت ملك والأهم منتچية على دنگة وللأمانه محد يعرف منو الدنگه الي منتچيه عليها لان بالليل تگثر الدنگ فصعب الواحد يفرزن منو منهم الأبي. والمحروگ گلبه عاف الگوادة وچلب بسالفة الجار وگال بعد ما عجز هذا الجار قرر يبعد عن الشر ليروح يطلع الدنگة دلگ وهذا اذا وگع على أحد الله ومعاف ما يطلع منها سالم، فگام عرض بيته للبيع ولان البيت بصف السيدة فنزل سعره للنص مو كرها بالگوادة (حاشى لله) لا، استغلال موقف. نب واحد من الگاعدين وگال من اليوم مو من حگنا نطلع ونحتج على البرلمانيين الي إنتخبناهم، لأن بقانون منع الاباحية رَضوّا ربهم، ورَيَحوا ضميرهم، واحنة بجالهم هم إرتاحينهَ بعد ما نباوع مواقع، وراح ننام رغد لأن ولِدنه بعد هم ما راح يگدرون يزاغلون ولا يسوون مكسرات، ويحملونه ذنوب نروح من وراها للنار. أگول لو تسوون قانون يحل مشكلة البيوت المشبوهة الي ترست المحلات السكنية، لو تفرضون ضرايب على كل من يدخل هاي البيوت ومن الورارد تسوون مشاريع تنقذ هواي ناس من درب الزلگ.