تأملات/ ح٢

التفاصيل

تم إنشاءه بتاريخ الإثنين, 01 كانون2/يناير 2018 08:14

كتب بواسطة: د.طلعت الخضيري

د.طلعت الخضيري

تأملات / الحلقة الثانية

ألمتفرنج
قصيده أداعب بها صديق عزيز رجع من لندن وهو لا يتمتع بالصفات ألتي أذكرها في ألقصيده وإنما هو نسج من ألخيال.
بالسلامه رجع من لندن منيب
أحواله متغيره وأمره عجيب
-----
كام من يحجي يهزلي بأيده
كشاخ ولابسلي مناظر جديده
حسه ناصي وبنبره شديده
سبحان ربي مبدل ألأحوال
---------
صار لخوانه وجيرانه ما يقدر
ومذكرات يوميه كاملي يحرر
وبالكلام كعد يمطمط ويجرجر
وبالأنكليزي يعبر ويذكر ألأمثال
____

بنزين ألسياره يحسبه بالكلن
وغير ألمازوله ما ياكل دهن
وفلوسه ما تنحسب إله بالشلن
وصار يكره ألقيل والقال

_____

ريوكه صار بالبيض والهام
واللنج خفيف وينتهي بالجام
شرب ألوسكي ما صار حرام
بس من علمهم ماحصل ولا نال
_____
ترك ألدينار واستعمل ألباون
وبزمانه جان يدك ألكهوه بالهاون
ما نشوفه أليوم محتاج داين
والله هل شي ما جان علبال
____
يكول ما أحب أسكن ألعامريه
لأني تعودت عله ألأحياء أللندنيه
ومن غير بنات ألتيمز ما يريد بنيه
وصارلي فرنجي وعال ألعال
____
ياأخي عاد من غيك أطلع
وحكم ولد العرب اتبع وأسمع
وهاذه ألجلد ألجديد أترك وأنزع
وراح تبقه عراقي عله كل حال
____

عراقي حفيد يعرب أصيل
عن تقاليده ما يحد ولا يميل
صير لأمجادك أحسن سليل
وبقه عربي وبراحه بال
____
ألتفرنج قيمه أبد ما يزيدك
وغير ألوطن أبد ما يفيدك
وشويه أفتح للأهل أيدك
ولاتصير بخيل وتهتم بالمال
________

ألفلوس وصخ هاذي ألدنيه
وبعبادتهه تصير ألنفس دنيه
والطمع ما يعيشك عيشه هنيه
واهلك ينسوك ويكرهوك العيال
____
صير كريم ويه أصحابك
وكون خوارده وحسن أخلاقك

وخلي أصحابك يتهنون بجاهك
ويشبعوك حب ومعزه ودلال
_______
كتب في بغداد 15-1-1994