حديقة حيوانات الزوراء ولقاء صحفي !!!

التفاصيل

تم إنشاءه بتاريخ الأربعاء, 06 كانون1/ديسمبر 2017 18:59

كتب بواسطة: سيف الدين الألوسي

                       سيف الدين الألوسي

حديقة حيوانات الزوراء ولقاء صحفي !!!

في لقاء مع المسؤول عن حديقة حيوانات الزوراء ، وردا على ما اوردته احدى وكالات الاخبار الحاقدة ،،، نفى ان تكون الحيوانات في حالة يرثى لها ،، بل هي في احسن حال من مأكل ومشرب ،،، وانا لخبرتي مع الحيوانات وطريقة التفاهم معها وحسب طريقة كلك نظر ،،، اجريت مقابلة بالسكايب مع عدد منها ،، اود ان اذكرها اليوم !
١- الاسد : وهو الحفيد الثاني للمرحوم الاسد الاول رشودي وكان مواليد ١٩٥٦ وشبع ضيم وصار كآبة اثناء الحصار وتحول الى نباتي من اكل الخس والسلگ وفقد الذاكرة من جراء لحم الزمايل النافقة !!! المهم مات رشودي وخلف اولاد واحفاد !!! اليوم حفيده شارل وهو يملك جنسية اجنبية ولهذا اسمه شارل بعد ان كان اسمه شلاتي !!! سألته ، عيني شارل ، صدك اموركم شلونه هل الايام ؟؟؟ اجاب بعد ان استعدل بالگعدة وشرب رشفة چاي من الكوب الذي امامه ،،، گال والله عال العال ،،، لا ينقصنا شي ولو بالصيف شوية الكهرباء لعبت نفسنا ، بس الامور تحسنت ودك لحوم وبوجبة دسمة مع بطاطا مهروسة او ماش مثل ما يسموها الاجانب ،،، وانواع الزلاطات مال الخضرة الطازجة وكل حيوان لديه حصة شهرية اربعة بطالة سكوتش وبطلين واين !!!! وكلوصين جكاير ماستر لو سومر !! واني كل ليلة الط ربع مع اربعة جكارات وصوت السيدة والهوه الطيب ،،،، وليخسأ كل اثم لئيم !!!
٢- النمورة : وهم احفاد النمورة التابعة للاستاذ سابقا !!! وعددهم كبير ،، سألت احدهم وكانت نثية دتحوك بلوز لابنها لان الدنيا بردت !!!!! شلونكم ؟ كالت بالباكيت متونسين واكل زين وولدنه باحسن مدارس مرتاحين ،، ولو اجدادنا چانوا مدللين بزمانهم ويطلعون لنادي الفروسية والجادرية ،،، بس احنه هم امورنه زينة ولو ابوية اجتثوا من القفص الزين وخلوه بقفص مزنجر ، وهسه كاعد كآبة بعد وفاة امي ،،، وميطلع وبس يلعب طاولي ويه ابو الويو ،، ويومية مخسره اربعة بطاله سينالكو ومشن !!!!!! واني اشتريها لان تقاعده يا دوب يكفي جكاير واسكنجبيل !!
٣- الشادي لوگي: اشو هذا يكمز منا ومنا ،، ياخذ جكارة من الاسد ويبوسه ويروح للنعامة يگرصها !!! ها لوگي اشلونك ؟؟؟ جاوب ، مثل الورد مرتاح ،، بكل وكت اموري ماشية ،،، وكولت عادل امام ( مشي أمرك آه ) !!! وهسه دك سفرات وموز غواتمالي اصلي ،، وجرزات وچبس و اسكنجبيل !! خير ،،خير !!!! بلكت تحجي ويه الامانة تخصصلي سيارة دبل قمارة !!!! لان منطيني بيجو يحمه بالصيف !!!!!! وعلى غفله تركني وراح يكمز على حيوان الكنغر ،، هلو حبي ،،، الحمد لله عل السلامة ،، اشجبتنه من استراليا !!! الكنغر لبسه وگاله لوگي كل چارة متصيرلك !!!!!
٤- مجموعة من الحيوانات والطيور ،، وهم الزمال الوحشي والزرافة والثعلب وجلب والنسر الاميركي ابو رگبة والنسر الاسيوي !!! وبيبي متو طرشة !!!!
الجميع اثنوا على الخدمات والطعام والعناية الطبية ،، ماعدا النسر الاميركي گال مديخلوني اشوف گرايبي بالغرين زون وهي شمرة عصا منانه !!! والزمال أخذ يشاور البيبي متو الطرشة ، وهي مدتسمع ،،، نغه الثعلب وگاله لك تبقى مطي ،، مو تعرفها طرشه !! شتريد منها ؟ گال گلتلها بلكت ادايني الف دينار لباجر ؟؟!!!!
وليخسأ كل من يحاول الانتقاص من حديقة حيوانات الزوراء ، مكان السفرات المدرسية منذ عقود ، وهنالك مشروع قانون بنقل عائديتها من أمانة بغداد الى وزارة التربية ،، وحسب الاختصاص !!!!!!!
تحياتي للجميع مع كل المحبة .