حچاية التنگال ١٠٠

التفاصيل

تم إنشاءه بتاريخ الأربعاء, 18 تشرين1/أكتوير 2017 07:18

كتب بواسطة: د.سعد العبيدي

                               د.سعد العبيدي

حچاية التنگال ١٠٠

الثورية مشكلة بالعراق، لا مو بس بالعراق، بكل العالم.
لأن الثوري بطبعه الله ومعاف يشوف العالم إزْغَيّر ويشوف نفسه چبير ويگدر يسوي إلْي يحْلَمْ بيه واشوكت ما يريد، ولأنه ما يقبل يرجع للعقل ولا يلتفت للي حواليه ويحسب حسابهم، ولأن أول ما واحد يخالفه بالرأي حتى لو چان من أصحاب الرأي على طول يتهمه بالخيانة.  
عموماً ما نريد نطوّلها عليكم ولا يعجبنه إندوّخ روسكم بالرجعه للتاريخ والي صار بالعراق من إجونه الثوريين ولليوم.
خلونه نشوف مصايب هالوكت وثوريين هذا الوكت والي جرى والصار بكركوك وموقف المحافظ ودوره بالي دا يصير.
يا أخي مو انت طبيب واخصائي غير المفروض تحسبها صحيح.
رفعت العلم بمدينه تخضع دستوريا لعلم الدولة المركزية وگالولك لا.
خالفت حزبك بكثير من المواقف وگالولك ليش.
زينْ دَخَلِتْ كركوك بمصيبه أكبر منك ومني ومنهم عَلَوّيَشْ، ما تدري كركوك قضية دوليه حتى الصومال الها بيها حصه.
أگول هذني التفاليس، يمكن الزمن يغلس عليهن، لكن أريد أسئلك سؤال وگلبي مليان قهر خويه غَيَرْ الثوري أبو المبادئ يقاتل دفاعاً عن المبادئ الي يؤمن بيها لو هو بس حچي؟.
أشو أنت أول ما طب الجيش الـ كركوك عفت ربعك والمحافظة وشمعت الخيط.
يا أخي دإثبت بمكانك. موت بمحافظتك حتى أقلها الاجيال من بعدك تقلدك وحتى تمثالك بكركوك تصير إله قيمه، ليش خليت الكل تحچي عليك وخليت ربعك حايرين وگلت يا روح ما بعدچ روح.
رباط السالفه يا جماعة الخير تره الثورية ما تنفع ولا توكل خبز والثوريين صدگ بياعين كلام.