حچاية التنگال ٤٢

التفاصيل

تم إنشاءه بتاريخ الأحد, 28 آب/أغسطس 2016 09:09

كتب بواسطة: د.سعد العبيدي

                        د.سعد العبيدي

لمن تنحرگ عالتعليم وتگول يابه خلوا الطالب اليّرسبْ يرسبْ، وخلّوا الزين يوصل والشين يطيح بلكت الله يگدر يگوم ويوصل. يگلولك السياسيين اليدوّرون أصوات بالانتخابات الجايه خطيه أكو إرهاب وحر وفگر وعجاج.

ترجع وتگللهم يابه مو هاي موجودهَ وضيمها يوگع على الكل، ليش هذا ينجح وذاك يصقط.
ومن تگللهم يمعودين تره النجاح من يصير بالگوشر يصير تجهيل يجر البلاد ليوره، وبالأخير يطلّعلنهَ طبيب ومهندس وسياسي وضابط وموظف    وبرلماني نص ردن، يسدّون اذانهم وبگلبهم يگلولك دروح طگ راسك بالحايط احنه وين عايشين. تاليها طلعت الحچاية مو من عدنا من وزير التعليم العالي الجديد بتعليقة گال وبعظمة لسانه (بعض الطلبة يتحدثون عن أعمال سحر وشعوذه وحروز محبه، يسووها الطلاب والطالبات).
سيادة الوزير جنابك استاذ جامعي، تره هواي من الطالبات مقونّغات كل الوكت عند السحارات يسوّن حروز محبه للاساتذه حتى ينجحوهن، وهواي طلاب منتچين على الأحزاب والمليشيات وتلگيهم بكل عزه لاطمين خاصة بعاشور وَفِنْ الاستاذ اليحچي حچاية لو يگول حلگ السبع جايف. وتدري طلاب يروحون للسيد حتى يتفل على اقلامهم بلكت يجاوبون زين، وطلاب ياخذون خيره يا سؤال يتركونو وغيرهم ينذرون نذور بلكت ينجحون، وأكو يمسحون وجهم بالمحبس قبل ما يجاوبون، هاي غير السوالف الماصخه الما ينلبس عليها ثوب.
آخ لو تگعد بنصهم راح تشوف العجب.
المهم هاي تالية النجاح بالگوترة، وطبة الأحزاب والدين للحرم الجامعي.
أخصملكياها بحجاية: اذا الطالب يغرگ بالأوهام والسحر ويلزم الدعاء بدل القرايهَ، ويماشي السياسيين فاقرأ على الأمة السلام.
معقوله استاذ لسه ما قريت على أمتنا السلام؟.