الخرّيط

التفاصيل

تم إنشاءه بتاريخ الأحد, 24 نيسان/أبريل 2016 07:25

كتب بواسطة: أزهر جرجيس

                           أزهر جرجيس

كثير من العراقيين لايعرفون الخريط (بتشديد الراء) وان راْووهلايعرفون مصدره او طعمه يبدو أنّي لست قليل حظ فحسب بل عديمه لأن المشاكل تشمّني شمّاً وتأتي حيث أكون. هاك استلم: يوم الخميس الماضي الساعة السابعة صباحاً رن التلفون.

رفعته، طلعوا الشرطة. نعم تفضلوا. انزل رايديك بالگراج. نزلت حافي. لگيتهم ملتمين على السيارة، والچلب يشمشم بالتايرات. خير، خو ماكو شي؟ گالوا انت صاحب هاي السيارة؟ نعم انا. وين چنت البارحة؟ سهران عند صديقي محمود شيشة. شتسوي؟ ما أسوي شي، رحت أسلّم عليه جايبلي صوغة من العراق وشفت اللعبة يمه ونسفت صحن كليجة ورجعت.

اممممم يم محمود شيشة گلت؟ نعم سيدي. ومن طلعت وين رحت؟ اجيت للبيت طبعاً، ليش شصاير؟ ما صاير شي يا خفيف بس اجتنا اخبارية تگول سيارتك محملة مواد محظورة. افتحها بسرعة وارجع ليوره. يا أخي انا فتحتها وإذا بيهم ياخذون وضع انبطاح ويصوّبون سلاحهم على الباب. إي وحق هذا الكيبورد.الدوره انا عيني صارت على الشرطية وهي منبطحة. خزرني الضابط، گال عينك. گتله صار سيدي بس حرامات نعمة الله هيچ مشمورة بالتراب. گال اشششش اسكت خلينا نشوف شغلنا. سكتت. شوية وإذا بالچلب يسحل چيس أصفر واگع تحت الكشن. وما أشوفلك ألا الشرطي طفر بالهوا دقلة وچرب هبدني على ظهري ومددني بالگاع. حط الكلبچات بيدي واشتغلتلك الاتصالات؛ ألو ٣٠٠١ حوّل.. ألو نعم مركز العمليات حوّل.. تم إلقاء القبض على المتهم وبحوزته مواد بايلوجية خطرة حوّل.. المساندة في الطريق إليك.. تم. طبعاً هذا كله وانا نايم بالتراب على وجهي. وره شوية اشتغلت سيارات الشرطة ويط ويط ويط وطوّافتين هيلكوبتر طوّقن المنطقة. الشوراع انسدت. الدوائر عزلت. البرلمان علّق جلساته. الحكومة دخلت إنذار. لا تگولي ولا أگولك، الدنيا احترگت. شالوني من ياختي وحطوني بالصندوگ وگبل لمكتب مكافحة الإرهاب. عيوني معصوبة وايديه مشدودة ليوره. المحقق فتح الچيس وقرّبه من خشمي: شنو هذا؟ هذا چيس. لتحشش لَك شنو المادة نقصد. زين سيدي شلون أعرف المادة وعيوني معصوبة؟ شمّه لَك. شمّيته، الريحة مو غريبة عليّ، تشبه ريحة أهلنا. مدّيت لسانيتذوقته، إي والله هي. گتله سيّدي يصير آكل شوية حتى أتأكد؟ گال اكل يطبّك مرض. أكلت شويّة، الطعم حلو. الريحة طيبة. المذاق رهيب. ظلّيت آكل وأضحك آكل وأضحك آكل وأضحك إلى أن صاح بي المحقق كافي لك، انت تاكل لو تتفرّج على مستر بن؟ گتله سيدي يا مستر بن يا شارلي شابلن؟ هاي أكلة تعادل ألف فيلم كوميدي. گال وشنو اسمها بالله يلكوميدي؟ گتله اسمها خرّيط. شنو شنو؟ خرّيط سيدي خرّيط وهي حلوى موسمية تصنع من المادة السليلوزية الموجودة في نبات البردي وفيها فوائد رهيبة. مثليش؟ أولاً تعالج الاكتئاب، ثانياً تساهم في خفض ضغط الدم، ثالثاً تقلل نسبة الكوليسترول، رابعاً تعالج لين العظام، تاسعاً تقوّي الشسمه. گال شنو الشسمه؟ گتله سيدي ولو بيها قلة أدب انت شگد صارلك متزوج؟ عشرين سنة. زين ليالي السبت وين تخلّصهن؟ وين أخلصهن يعني، أطلع للبار أتزقنب بيرة وأرجع أنطمر. طيّب من ترجع للبيت وتشوف المدام لابسة شيفون وحاطة رجل على رجل وتتابع فيلم السهرة ما يصير عندك قارش وارش؟ آه كان زمان يا ابني كان زمان، كبرنا وما بقى حيل.
آها إذن سيدي ما إلك غير الخرّيط يقوّيك ويخلّيك تلعب چقلمبة من حِلّ وجديد. گال احترم نفسك لك شنو هالميانة الزفرة؟ بعدين هو الخرّيط لو مثلما تگول ما چان صنّفتكم المنظمات الدولية على أنكم من الشعوب الأكثر حزناً بالعالم! گتله حاقدين سيدي حاقدين لا تصدگهم، وداعة شواربك احنه أسعد شعب بالعالم لوما كم هتلي يتحكمون بمصيرنا. گال زين يابه لعد كثروا خرّيط بلكي الله يخلّصكم، گوم تعال وقّع وروح لبيتكم. وقّعت ورجعت للبيت حاضن چيس الخرّيط والابتسامة شاگة حلگي. السبت بالليل دگّ عليّ رقم غريب، شلته طلع المحقق نفسه يتصل من موبايله الشخصي: ألو استاذ آزر بلا زحمة ما بقى عندك فص خرّيط قربةً لله تعالى؟