حچاية التنگال٨

التفاصيل

تم إنشاءه بتاريخ السبت, 26 كانون1/ديسمبر 2015 20:56

كتب بواسطة: د.سعد العبيدي

                                د.سعد العبيدي

إشگد حلو لمن الخطوط الجوية العراقية تعلن وتگول حَلقَ الطائر الأخضر في أجواء أوربا، وإحنا الغشمهَ نصدگ بسرعة ونفرح ويه اليفرحون. گلولنه الأخضر إشلون وبيش يطير، غير يطيروه أهله المخلصين واليفتهمون.

خلونه نتحاسب ويه أهلهَ كل أهله من الوزير لآخر موظف درجة عاشره، أشو الطيارين لزموهم يدخنون بالكابينات مال الطياره وهاي مخالفه. المدراء ما يوفون بالتزامات السلامة الأوربية ومأخرين مدري إمضيّعين المعامله وهاي تقصير وخساره ما ينلبس عليها ثوب. المضيفات الشابه مالتهن مواليد ستين ومچفنات من فوك ليجوه، ولمن تنزل طيارتين بالمطار فد مره يصير ازدحام لأبو موزه، والأقمش منهن إجينه للمكتب مال الطائر الأخضر بشارع المغرب يوم الثلاثاء الماضي گبل الساعة ثنتين مستعجلين نريد نحجز لأربيل على يوم الأربعاء، گالن الحجيات عزلنهَ بالمكتب، يابه ليش عزلتوا بعد ما خلص الدوام، گالن إحنه من الأعظميهَ، واليوم تنسد الطرق على مود الاحتفالات مال مولود النبي، طبعا الطرق تنسد من صدگ بعد المغرب. گولوا سلمنا أمرنا وعبرنا للمنصور مستعجلين، لگفنه الازدحام على الجسر سياره بذيل سياره، وأنتهى الدوام ولا حجزنه ولا طرنه بالطير الأخضر. آني أگللكم الإنجاز العظيم الي سواه الطير الچبير والي راح يتسجل بالتاريخ وبالجغرافية هو فرض الدعاء قبل ما يطير الطير الأخضر. تعالوا فهمونا ليش هالاستخفاف بعقول الناس، أشو صفينهَ بالاستشهاد إنعَزِلْ، بالولادة إنعَزِلْ وبالعرس إنعَزِلْ، بكيفنه إنعَزِلْ، لعد وين الوزير وين المفتش العام، وين الضمير العام، أريد أشوف إشلون راح يستمر الطير الأخضر بالطيران، آني أگول بعده الحيمي ومار راح يگدر لو يجي القبيس.