حچاية التنگال ٧٦

                                                   

                                 د.سعد العبيدي

طلع بوتين من طورهَ، وضرب داعش والنصرة والجيش الحر بسوريا، صفگوله قسم من عدنا، وسموه أبو علي، ويريدون يجيبوه ليمنا، ونسوا إشسوه بالمسلمين بديرتهَ. عِزَمْ أوباما چم مسلم على فطور برمضان وإچماله مو على حسابه، گال قسم من عدنهً تراهو مسلم على أبوه حسين، ونسينهَ إشدايصير بينهَ.

وحچه أردوگان حچايه على إسرائيل وصار عصبي صفگلهَ قسم من عدنهَ وگالوا هو الخليفهَ ومحد ذكر وگفتهَ ويهَ داعش وبيع النفط وغيرها وإشلون صار طرف بتخريب دولتنا. ودز روحاني جماعهَ يقاتلون بسوريا وبالعراق ضد داعش، گال قسم من عدنا هو الي ويانهَ وَبس ومحد جاب طاري غير سوالف أبسطها استباحة حدودنه وإشلون سد المي علينا. وميركل ذبتلها چم دمعهَ على طفل غرگان من ربعنه، سميناها العمهَ وقسم گالوا علوية. والسعوديه الي لعبت بينا طوبه، فلوس ومتطوعين، ودعم من جوه العباه ومن فوگاها ال كلمن يريد يحارب دولتنا وأكو من يگول بس هيهَ وأكو من يبوس إيد ملكها. وسوريا إلبقت إسنين طريق للارهاب، تدعم وتدرب الإرهاب الي ذبحنا عينك عينك، وصار قسم من عدنا يقاتل وياها. زين إشلون وليش، شنو إحنهَ ننسى الي دايصير بينه، لو گلبنا رهيف كلب سمچه، لو غشمه، لو فُطرْ، لو شنو. تره الشغلهَ ما ينرادلها روحهَ للقاضي، كل الدول عدها مصالح وتريد تحققها، ومن حقها، إلا إحنا نركض نريد نحقق مصالح غيرنا وننسى مصالحنا، وصرنهَ مثل العگعگ من تَيّه المشيتين.        

  

إذاعة وتلفزيون‏



أفلام من الذاكرة

الأبراج وتفسير الأحلام

المتواجدون حاليا

1056 زائر، ولايوجد أعضاء داخل الموقع