حيو وياي هاذَ نايبنه السبع

التفاصيل

تم إنشاءه بتاريخ الثلاثاء, 13 أيار 2014 15:02

كتب بواسطة: حذام الحداد

حذام الحداد

حيّو ويــاي هــاذَ نــايـبنــه الســـبع
لو مشــه عالگاع يشــلـعهه شـــلع
بس حِظَه بمنصب تبــاهه على الربع
وتـشمخرعليهم ماندري شنو علومه



لاتســأل على شــهاداتـه الدراسـيَّه
گبل ســنتين چــان بمحو الأمـيــه
وعلى غفــلة صبح خــرّيــج كُلــيـَّه
من مريدي إشتره شهادة مختومه



لبس قاط الحريــر ومــاشي يـتبختر
وأفـواج الحـمـاية دايـره وعســكـر
وسيارة مصفحة وعالخلگ يتمنظر
وشيشة عطر گالبهه على هدومه



نايبنه ترشح بس علمود النــــفط
لأنــه اســتاذ شاطر بالتفرهد واللفـط
ولو يـجي علي بابا يسمطه سمط
وبعز الظهر يشَوْفَه بالسمه نجومه



نسه من چان يتحسَّر على الـديـنـار
إترقه حضرته وگام يحچي بـالمليـار
وبلع حگ الشـعب ازغــار وكـبــار
جوعانة تــنام وبــطنـه مــتخومه



مســكين المــواطـن ينـطر الـحصه
حنطـة ملوثة يخــبزهه چـم گرصه
والتــمن گـمل يــســـفي ابـنـصــه
والأفندي قوزي مايــسـد زردومــه



لو نحچي كل العمر الحچي مـيفــيــد
جاز العراقي من العنب بس سلته يريد
كـل يــوم الـقـهـر بـگــليبه ايــزيــــد
وتبچي الــصخـر حــالـته الـمعـدومه



ستوكهولم
13.5.2014