الگاع اغرگت ياعبعوب

التفاصيل

تم إنشاءه بتاريخ السبت, 03 أيار 2014 14:58

كتب بواسطة: حذام الحداد

حذام الحداد

عبعوب شنهو السالفه

شمال الشوارع جايفه

وبغداد كلهه طايفــه

والماي غطَّه الدروب

الگاع أغرگت ياعبعوب

 

دبي گلت زرق ورق

بس ماعانت من الغرق

ولا بيهه فد مجره إنغلق

لو ماي إجتاز البوب

الگاع اغرگتْ ياعبعوب

 

بغداد أنظف عاصِمه!

مايقبلهه رب الِسمه

عليمن نذب اللايمه

والوضع رد بالمگلوب

الگاع اغرگت ياعبعوب

 

عبعــوب يلكلك نِعَــمْ

حلْ المشاكل بالحِكم

وإنطي كل مواطن بلَم

ويستحسن لو وياه چوب

الگاع اغرگت ياعبعوب

 

حسبالنَه الصخره إطلَعَتْ

ومن المجاري إنجلت

ياوسفه ماندري عصَت

والمجرَه هالظل معطوب

والگاع اغرگت ياعبعوب

 

عبعوب مو مَلْ الشَعب

وتعاقَــبْ بليّه ذنــب

بس القهر إلَه إنكتــب

ومل منَّه صبر أيوب

كلهه اغرگت ياعبعوب