عراقنا .. وعراقكم ....

التفاصيل

تم إنشاءه بتاريخ الأحد, 25 شباط/فبراير 2018 20:45

               عراقنا ...وعراقكم...!!

الكثير من الشباب اليوم بل عدة اجيال من الشباب الموجودة اليوم بالعراق يتصور العراق هذا حاله وحال اغلب البلدان بالعالم ويتعجب علينا ويستهجن من نكتب احنا مواليد الخمسينيات والستينات والسبعينات وننتقد تصرفات شباب اليوم وفساد حكام العراق وحالة البلد...

عراقنا يا احباب غير العراق اللي تعيشون بيه اليوم عراقناكان بيه التعليم يضرب المثل بيه وكان الطبيب العراقي يشتغل بانكلترا بشهادته العراقية ماعدنا دور ثالث وعدم رسوب ،كان المعلم اله هيبه وكانت مدام عادل اذا سامعين بيها اقوى من وزير التربية وخرجت رؤساء وزارات ووزراء وقادة واطباء ومهندسين وفنانين الهم بصمة على تاريخ العراق الى اليوم

بعراقنا كان اكو اخلاق بكل معنى الكلمة وكان الصغير يترك مكانه للكبير بالباص وكان اكو جابي ومفتش بالباص يعني دولة وقانون

كان عدنا فن اصيل وطرب مو العگربة والبرتقالة وعشيرتها ،كان عدنا معاهد تعلم رقص السالسا والتانغو وكان عدنا الفرقة القومية للفنون الشعبية اللي حصلت على جوائز من كل العالم
بعراقنا كانت النسوان تلبس بوشية وتلبس ميني جوب وبنطرون ما كان اكو حجاب وجبة ..

البصرة كانت فينيسيا الشرق ودرة الخليج ،البصرة كانت حضارة وتاريخ وادب وشعر وفندق شط العرب وجزيرة السندباد والخشابة والزبير والطرب مو شوارع مكسرة ومجاري طايفة

العراق كان بيه وكالات لارقى الماركات الاجنبية من السيارات للمكائن الى ساعات الرولكس،

بالعراق كان عدنا اورزدي باگ اللي هو مثل هاردوز لندن الملكي الان من كانت دبي صحراء حتى على الخريطة ما موجودة

بالعراق غنت ام كلثوم ووديع الصافي وفيروز وغلوريا غينر وايربشن وهذه ترة مو بعيدة كلها قبل كم سنة
بالعراق كان عدنا سوق المنصور وسوق الثلاثاء من كان بدبي كم دكان مو مولات

بالعراق كان عدنا كازينوات على ابو نؤاس تجلس بيها النساء والرجال مختلط الرجال تشرب والنسوان تاكل وتسولف بدون مشاكل ..ابو نؤاس والشط كانت للعراقيين مو للمتسلطين
بعراقنا كان ابن المنطقة يعرف كل اهلها نسوان ورجال والغريب ما يكدر يمر مرور بالمنطقة الا عابرا وبدون اي مشاكل واذا تورط وتحارش بوحدة هاي الله اللي كاتبها عليه
بعراقنا كان عدنا مطاعم بالمدارس وكان عدنا باصات نظامية بالمدارس

بعراقنا كان عدنا مدرسة للموسيقى والبالية وكان عدنا حوزة بالنجف
بعراقنا كنا نروح لامريكا ولاوربا سياح مو لاجئين

بعراقنا كان جارنا من اليسار كردي ومن اليمين تركماني وبعده 4 بيوت مسيحين واللي ورانا عرب الى اليوم ما نعرف دينهم ومذهبهم

بعراقنا كان اكو نوري باشا السعيد وحسين جميل وفرحان باقر وعبد الامير علاوي وصائب شوكت وسلمان تاج الدين ويوسف العاني وبدري حسون فريد

و الكبنجي ويوسف عمر وناظم الغزالي وفؤاد سالم و رضا علي و سليمة مراد و ووحيدة خليل ...

وست الكل عفيفة اسكندر ومائدة نزهت وقبلهم كان اكو زهور حسين وصديقة الملاية وبعدهم لميعة توفيق وايقونة العراق سيتا هاكوبيان،كان عدنا فرقة الهام المدفعي وشيراك وما سمعنا علي العيساوي وحسام الرسام وربعهم ،كان عدنا اذاعة اف ام بالانكليزي وعدنا معهد بريطاني ومعهد غوتا الالماني تعلم لغات مو قتل وذبح

بعراقنا كان الحليب المعقم والببيبسي والصمون يوصل لباب البيت يعني دلفري بلغتكم من كانوا اهل الخليج يشربون الحليب من صدر البعير!!!

بعراقنا كان الدينار = 3 دولارات وربع وكنا ناخذ الفيزا البريطانية ب 3 ايام من السفارة اللي بالشواكه
بعراقنا كان الاجنبي يمشي بطوله من الشمال للجنوب

بعراقنا كانت السينمات والمسارح والملاهي اماكن ترفيه للعائلة نساء ورجال مو مكانات مسخرة وطش فلوس على الراقصات وسكر للثمالة وعربدة

بعراقنا كان الريسز بيه نادي عائلي والمسابح مختلط عوائل نسوان ورجال وشباب وبنات وكان كل واحد منا يشوف البنت اخته والام خالته والاب عمه وكانت حفلاتنا تصير بالمسابح والنوادي بدون ضرب طلقات وبلا عركات وبوكسات وحمايات

بعراقنا كانت عدنا انسانية واخلاق وعلم وقضاء ومؤسسات ،بعراقنا ما كان اكو حرامية وفاسدين ومرتشين وشرطة مرور قفاصة وسفلة كان الشرطي ابن الشعب وفي خدمة الشعب

بعراقنا الملك ماكدر يشتري سيارة لان فلوسه ما تغطي ثمنها
عراقنا كان حلو حلو حلو

عراقنا كان طعمه شهد وريحته عنبر وهواه نقي
عراقنا كان جنة والدنيا كلها خراب
هسة عرفتوا الفرق بين عراقنا وعراقكم
عراقنا كان بطعم البرحي مو بطعم الدم
عراقنا كان وكان وكان وعراقكم جحيم...

الگاردينيا: هذه المادة الرائعة أرسلها الصديق العزيز / آرا دمبكجيان فشكرا له .. ولكن للأسف لم نتعرف على كاتبها..فعذرا له ونشكره كل الشكر ..