من غير زعل .. طالما هالحرامية يحكمونا ، أغسلوا ايديكم من الكهرباء!

                                                      

                            جلال چرمگا

   

من غير زعل .. طالما هالحرامية يحكمونا ، أغسلوا ايديكم من الكهرباء!

من يوم احتلال العراق الى كتابة هذه السطور اهلنا وناسنا محرومين من الكهرباء( الوطنية) صح بالأربع والعشرين ساعة تجي القوة لمدة كم ساعة والبقية الأعتماد على كهرباء المولدات الاهلية!!.

وشغلة كهرباء المولدات معروفة للجميع كل أمبير مقابل مبلغ.
هذه المبالغ تختلف من محافظة الى محافظة ومن منطقة الى منطقة اخرى.
مثلا المناطق الشعبية شوية ارخص من المناطق الأخرى والسبب معروف كوداً اللي يسكن مناطق شعبية أكيد حالته الأقتصادية مو مثل بقية المناطق.
الناس الفقرة( وما أكثرهم) ما يگدرون يسحبون ولا أمبير ، ومنين يجيبون يدفعون بالشهر للمولدة وأكو شغلات أهم مثل ألأيجار والطعام ومستلزمات الأطفال والدكاترة وألأدوية و غيرها!!؟؟.
غيروا كذا وزير للكهرباء وكانت كل وعودهم قبل التعيين كلها هواء في الشبك ، كفيلكم حمزة ابو حزامين ماقدموا ربع وعودهم اطلاقاً!!.
والجميع يعرف الكتل السياسية العميلة كاتلين نفسهم على هالوزارة كودن بيها خوش خبزة، ماكو جناب الوزير خلال سنة يقبط ويدخل بخانة المليونرية وهذه الحالة مو بس معالي الوزير لا خالي لاء .. حتى أقربائه وجيرانه و حزبه و أصدقاء المدرسة والجامعة (اذا كان يحمل شهادة جامعية) وبعد سنة أو أكثر يعفى السيد الوزير يجيبون واحد على اساس هذا غير ( أخو أخيته) وبفترة قصيرة يسويلك بغداد لاس فيغاس بحيث كل الشوارع والازقة حتى الدرابين الضيقة كلها تضوي، ولايهمكم اخواننا المواطنين، 24 ساعة كهرباء بلا أنقطاع ، شغلوا كلشي وكلاشي الثلاجات الأركندشنات البانكات والمجمدات والتلفزيونات وبلا تردد!!.
لكن بعد فترة هم كلام الليل يمحو النهار وعلى هالرنة طحينج ناعم والقبض من دبش!!.
عمي يا كهرباء ويا بطيخ المولدات الكهربائية كلها للحيتان والمعممين( الله لا ينطيهم عافية دنيا وأخرة) شلون ينطون مجال يتنعم الشعب بالكهرباء صيف و شتا؟؟.
لنقرأ سوية:
وكالة الصحافة الفرنسية: هناك 4.5 مليون مولد كهرباء للقطاع الخاص في العراق مسيطر عليها من قبل احزاب و شخصيات سياسية ايراداتها تتراوح مابين 6 الى 10 مليار دولار شهريا!!.
أخوان
تتوقعون الحكومة الفاسدة(اصلا) تجد حل لمعضلة الكهرباء!!؟
دنشوف البلتيقة الجديدة كل كم يوم نسفوا برج من ابراج الضغط العالي ( على أساس مو هم لاء جماعة داعش الأرهابيين) حتى يقضون على هالشوية من الكهرباء ويصير الأعتماد الكلي على مولدات العملاء والجواسيس!!.
شوفوا هالأستغلال ، مو مهم المواطن يعيش بضيم حتى لو كانوا كبار سن واطفال ومرضى!!.
المهم ان تزداد ثرواتهم و شراء المزيد من العقارات وألأملاك في طهران وبيروت ولندن وبقية الدول!!.
ولكم اقسم بالله كلما أغمض عيوني اشوفكم واكفين بقفص الأتهام أمام محكمة الشعب.
أكررها دوما: ماتعرفون قساوة الشعب العراقي ..وحق الحق يسحلوكم بالشوارع الى ان تصيرون وصل!!.
التفتوا للمواطن المگرود ..أنذركم ... واللهم أني بلغت..
وعندك جنس جوراب به نقشة وردي؟؟؟.. عزلنا ..عزلنا..!!

    

  

إذاعة وتلفزيون‏



أفلام من الذاكرة

الأبراج وتفسير الأحلام

المتواجدون حاليا

734 زائر، ولايوجد أعضاء داخل الموقع