خوش فكرة .. بدلا من اعضاء البرلمان ورواتبهم خلونه نشتري هوايش!!

التفاصيل

تم إنشاءه بتاريخ السبت, 05 شباط/فبراير 2022 11:45

كتب بواسطة: جلال جرمكا

خوش فكرة .. بدلا من اعضاء البرلمان ورواتبهم خلونه نشتري هوايش!!

في بلدان العالم اللي فيها هامش من الحرية والديمقراطية ، اعضاء البرلمان ينذرون انفسهم لخدمة ابناء الشعب ويديرون بالهم على كل صغيرة وچبيرة و يوكفون ضد اي قرار تتخذها الحكومة أو أية اقتراحات مابيها شىء لمصلحة ابناء الشعب.

أني ما أگول البرلمان العراقي يصير مثل البرلمان السويسري بحيث البرلماني يركب بايسكل لو ياخذ الباص أو الترمواي ويروح لجلسات البرلمان و قبل كل جلسة يسهر الليالي ويفكر و يختلط بالناس ويستمع لهموهم (ان وجد) حتى يقدم شىء لشعبه وبالتالي يريح ضميره ووجدانه..
لكن اللي ديصير بالعراق ما أتصور اكو مثله بالعالم اطلاقاً!!.
- رواتب بالملايين.
- أكثر من سيارة أخر موديل و بأسعار خيالية.
- عدد من أفراد الحماية حتى قسم منهم ضباط!.
- سكن محترم و خدم وحشم.
- جواز دبلوماسي ( اعتقد حتى لعوائلهم!).
- حصانة من الدرجة الأولى!.
- ايفادات خارج العراق والنزول بفنادق خمس نجوم وهو بحياته لا راكب طيارة ولا يكدر يقضي حاجته بتواليت غربي ولا مستعمل چطل و سجين بالأكل و من يركب بمصعد الفندق يغمض عيونه كودن يدوخ وراسه يفتر!!.
- أمتيازات اخرى.
اني ما أگول كل البرلمانيين مو خوش ولكن كفيلكم حمزة ابو حزامين أغلبهم (95%) ما يستحقون يكونوا فراريش و عمال كافتريا و كناسين بالبرلمان وهذه عدى بُعدهم كل البعد عن طلبات و مستحقات ابناء الشعب وواحدهم كأنه حتى مو عراقي!!!.
واللي يگول لاء ، أسمعه ما گالته البرلمانية ( حنونة الفتلاوي) شلون كانت تأخذ كومشنات و تشتغل بالتجارة مستغلة عضويتها بالبرلمان و اذن من طين والأخر من عجين تجاه الأوضاع المأساوية من قلة أو انعدام خدمات الشعب!..
أما الأخ و مهجة القلب مشعان الجبوري ، الرجل كلش صريح من هذه الناحية بحيث الواحد يستحي من كلامه و عن الكومشنات والفساد لأعضاء البرلمان وألأدهى ما أستثنى ولا واحد من الأخوة النشامى اعضاء البرلمان ويگول بعظمة لسانه:(كلنا حرامية و أخذنا كومشنات و اخذنا رشاوي وأتحدى يگول لاء)!. تفضلوا شاهدوا وأسمعوا:
https://www.youtube.com/watch?v=zA54FBXyQDk

---------------

رسالة من احدى الأخوات من جنوب العراق..

بعد التحية والسلام و الصحة والأحوال و أخبار الكرونا بسويسرا وان شاء الله سلامات والله يبعدكم عن هالبلوة وياترى عدكم بسويسرا هم ينگطع الكهرباء؟؟ و يا ترى تشترون نفط لصوباتكم لو عالغاز؟؟ ويگولون خوش نساتل عدكم و الحليب هناك ارخص من الماي!
تقترح:
عندي هالإقتراح رجاء وصلوها الى كل ابناء الشعب العراقي وهو:
اغلاق البرلمان والغائه نهائياً وبدلا من رواتب اعضاء البرلمان وامتيازاتهم نشتري بدلا منهم هوايش( أبقار) حلوبة من الداخل والخارج وخلونه نحسبها حساب عرب بالسبحة :
- عدد اعضاء البرلمان 375 عضو.
- كل واحد منهم فقط راتبه عشر ملايين دينار نقداً.
- سعر الهايشة الحلوبة مليون دينار فقط.
- يعني نگدر نشتري عشر هوايش براتب شهري للعضوالواحد.
- يعني نگدر نشتري 375 هايشة بالشهر!!.
- يعني 45000 هايشة ومليون لتر حليب سنوياً!!!.
- طيب خلال اربع سنوات شكثر راح يصيرن عدد الهوايش والتار الحليب؟؟ الحساب عندكم كودن ما عندي حاسوب و السبحة اللي عندي ما تتحمل!!.
- نعني راح نتفوق على الدنمارك و هولندا و سويسرا بأنتاج الحليب وعدد الهوايش!!.

 والمهم شوفوا فوائد الهوايش بدلا من البرلمان واعضاء البرلمان:
افتتاح مئات المعامل في انحاء العراق لأنتاج (الحليب و الگيمر والزبد والجبن و الخاثر) بالأطنان وتشغيل آلآف من الشباب العاطلين وتصدير الزايد من المنتجات الى خارج العراق ، وهنا شلون راح نستفاد من هالتجارة بدل ان نستورد الخاثر من دول الجوار؟؟؟ ، وهذه عدا انشغال آلاف من الفلاحين بزراعة الجت والذرة وغيرها لأطعام هالهوايش؟؟.

بالمناسبة الهايشة طلباتها قليلة جداً و تقتنع بأي شىء مو مثل البرلمانيين من يگعدون بالكافتريا كلها گهوة بالحليب وبالنستلة و فانتا و سينالكو وعصير الأناناس و كيك ام الفراولة و آيس كريم بالفستق!!.

بالله عليكم أقتراحي به شىء غلط؟؟.
واخيراً: بربكم ياهو أكثر فائدة اعضاء البرلمان لو الهوايش!!!؟؟.
-----------
أختنا العزيزة ايتها العراقية الأصيلة والله ماحچيتي غير الصدگ والعدل.
أقسم بالله شخصيا أعرف كذا عضو خلال  السنوات اللي گظاها بالبرلمان مانطق بكلمة وحدة تحت قبة البرلمان و لا تحرك من مكانه!!!.
اذا الجماعة رفعوا ايديهم هو هم حاله حال العبرية رفع ايده وبس، وكل شهر يستلم بلاوي من الدنانير على اساس يمثل أبناء الشعب ، من يروح فدوة لذيل الهايشة!!!.
لو بيدي سلطة لأعينچ وكيل وزير الزراعة حتى اديري كل المعامل في محافظات العراق.
عمي ما أنريدكم اقسم بالله الهوايش اكثر فائدة منكم بألف مرة!!.
أودعناكم عيوني الى (هايشة أخرى) عذرا قصدي الى سالفة جديدة أخرى اذا الله انطانه عمر.. و قدري قاد بقرنا!!.
أخوكم / رئيس التحرير

• < السابق
• التالي >