حكومة و برلمان: تسكتون لو أصيحلكم حجية عمشة ؟؟؟

التفاصيل

تم إنشاءه بتاريخ الخميس, 15 شباط/فبراير 2018 12:57

كتب بواسطة: جلال جرمكا

   حكومة و برلمان: تسكتون لو أصيحلكم حجية عمشة ؟؟؟

اللي يسمع الأخوة النشامى من وزراء و برلمانيين ورؤساء أحزاب دينية وغير دينية يتصور واحدهم ولد وبحلگة خاشوگة من ذهب!!.

هذا لايعني الفقر عيب!! لايابة لاء رحتوا كلش بعيد ، منهو گال الفقر عيب لاوالله شرف و فخر والرزق على الباري.
حتى لا تگولون شنو هالمقدمة لابد أن أستعجل و أوضح:
من تجي للحساب والكتاب و( من أين لك هذا؟؟) ، نعني شلون كونت هالثروة من عقارات و سيارات و نقد بالملايين خارج العراق بالمدة القصيرة !!؟؟.
رأسا ومن غير مقدمات يگول:
هذني كلهن ورث مالة أبوي وجدي من أبوية ومن أمي!!.
الغريب بالأمر كلهم نفس الأسطوانة المشروخة وماعندهم غيرها!!.
ولكم عليمن؟؟ أي مو العراقي أمفتح باللبن!!.. طاح حظ اللي يصدگكم!.
- قبل الأحتلال أنت مو چنت تبيع جواريبات بلندن وتركض والعشا خباز؟؟... وهسه ملياردير ونص!!.
- وأنت عيوني مو چنت تبيع خضرة بالدولة الفلانية و ماكو بجيبك مية دولار!!... مادگولي منين جبت هالثروة؟؟؟
- انت اللي حاط رجل على رجل ونافخ روحك چنك فسيفس!!أنت مو چنت بالسوگ اللي يم سيدة زينب تبيع خردة و علج ماي و سمسمية؟؟...لعد شنهو هالعقارات بدبي والفندق اللي خمس نجوم ببيروت؟؟؟
- أما انت اللي هساع أسمك مالية الجرايد كونك أمحرر ذاك الصوب مو چنت تتغدى و تتعشى بمرقد الأمام الرضا(ع) ولو مو هالشوربة كان متت من الجوع!!؟... وهسه تملك كذا عقار بأيران وبلندن ، هذه شتخليلها وأتطيب؟؟؟
ومو بس هذولة وكيلكم أبو خيمة الزرگة95% منهم على هالحال ويجوز النسبة أكثر لكن لاء خليها هيج!!.
من غير مستحى ولا خجل يتباهون بيناتهم منهو اللي عنده أكثر من نقد وأملاك وبساتين وسيارات وحتى زوجات بالرسمي و المتعة!!.
هذولة يرادلهم وحدة مثل(عمشة) اللي عدها أوليات الكل و المهم تحچيها طگ بطگ لا تستحي ولا تخاف من أكبر واحد!!.
خلينا أنشوف شسوت بالمحكمة من راحت شاهدة بقضية؟؟:

عمشة راحت تشهد بالمحكمة فگعدت بمنصة الشهود سألهة المدعي العام : حجية تعرفين منو آني ؟
گالت : اي اعرفك انت ابن سعدية العورة ومرة بگت دجاجات بيت علوان من أنت زغيرون!!.

فالمدعي العام قاطعها وگال :
سيادة القاضي ليس لدي أي أسئلة اخرى للشاهدة ..
الأخ خاف تطلّع خياساته وهو زغيّر!
أجه دور محامي الدفاع گام على حيله وگاللها:
حجية اني محامي الدفاع ..و .. و ..
فقاطعته وگالت : اي اي عرفتك انتة مو أبن حسنة أم الباجلة وگبل چانوا يسمونك عبود ابو الخيسة !!.
فقاطعها المحامي وگال للقاضي :
سيادة القاضي ليس لدي أي أسئلة اخرى للشاهدة!!!.
فالقاضي اشر للمدعي العام وللمحامي يتقربون منه وگاللهم :
والكعبة اذبكم بالسجن انتوا واهلكم اذا گلتولهة منو آني!!.
رباط السالفه يرادلنه وحدة مثل هاي العجوز تعرف أصل وفصل اللي على أساس همة ماكو مثلهم لا بالدين ولا بالانسانية وتسلطوا علينة وصاروا فراعنة.
أويلي لو أندخلها بقاعة البرلمان وهناك اللي لسانها أطول من قندرة عمشة وتتباهى كونها أكاديمية وبنت أصول و لاتسمح بأحد يقاطعها..
هناك عمشة ترفع أيدها وترسم أشارة نقطة نظام!!.
هواشچ أنتِ مو بنت نعيمة الگرعة اللي چنتي فارشة بسوگ الچوادر( بمدينة الثورة سابقا والصدر حالياً) تبيعين لنگة وقنادر عتك وصوتج واصل الى قطاع ثلاثة وثلاثين وكل ساعة توگفين بوجه ابو البلدية اللي چان يخاف من لسانچ خوفة الحية ؟؟.
ولچ انتِ والبرلمان كجة مرحبا من طاحظكم ايوالله ماأدري شلون تمشون وضع الشعب؟؟ وصايرتلي محللة بالتلفزيون!! وچانت  حصرة عليچ  زوج نعال جدد وهساع عندچ حگتين ذهب والماس.. عشنا وشفنا يا برلمانيات اخر زمان!..
وأنت الأخر المطيرچي ،ولك انت موچنت أفرار من العسكرية  وكل حملة مداهمة خال دشداشتك بحلگك وتتراكض من سطح الى سطح وتوصي أمك جاسمية أم اللبن:
يمة فدوة ديري بالچ عالطيور ترة باب البرج المفتوح ، اهم شىء دخلي الأورفلي كودن أريد أبيعها باچر واجيب خوش فلوس!!
خلوني ساكته ترة اضابير الكل عندي.. تعبت بعد مابيه!!.
وأني أگول:
خالة عمشة فدوة أفضحينة بعد چم واحد رايح أجيبلج قوطية بيبسي و من أرجع تناوشيهم واحد واحد...
مايفيد ليش هم دايرين بال والمبلل يخاف من المطر؟؟؟.
اودعناكم اغاتي الى (عمشة )أخرى، قصدي حلقة اخرى..
أخوكم
رئيس التحرير

• < السابق
• التالي >