عيوني خاله فاطمة ليش ما تجين تگعدين بمكاني وتصيرين دكتورة؟

التفاصيل

تم إنشاءه بتاريخ الجمعة, 18 آب/أغسطس 2017 10:52

كتب بواسطة: جلال چرمگا

عيوني خاله فاطمة ليش ما تجين تگعدين بمكاني وتصيرين دكتورة؟

كان عمرها بالستين سنة و شوية ، معروفة كلش بين أهل المحلة بحيث كانت يعتبروها حلالة المشاكل للجميع بالأخص استشارات طبية ، تعرف أسماء اغلبية الأدوية وشوكت تستخدم وليش و الكمية اللازمة!؟؟ .
مع أن الأخت فاطمة شبه أمية بس كانت على اطلاع واسع على الأمراض وأسماء الأدوية.
والزين بيها انها ما تتعاجز من مراجعة الأهل والمعارف والجيران الها ،حتى انشاءالله بنص الليل وللعلم كانت بالبيت عندها صيدلية بيها كلش وكلاشي من حبوب وادوية ومراهم و كبسول و ضمادات و مطهرات ....
هناك وعلى غفلة تدخل وحدة شايله ابنها :
- دادة ست فاطمة الله يرضى عليج الحگيللي ، حمودي گبل شوية كلشي ما به وعلى غفله اصفر وجهه و حاله غير حال ، شوفيللي چارة؟؟.
تبتسم ست فاطمة وبأعصاب مثل الثلج ترد عليها:
دادة أم حمودي على كيفج ، ابنج مثل الورد كلشي مابيه بس شوية ماخذ برد هسه ننطيه حباية وورا شوية ينام من يگعد كلشي مابي عليش هالخبصة والخوف؟؟
وفعلا كلام الدكتورة ، عذرا الست فاطمة كلش صحيح ورا ما تنطي الحباية ينام وبعدين شوية شوية يتحسن!!.
الخالة فاطمة مع معلوماتها بأسماء الأدوية وشوكت وشلون تستخدم كانت عندها خبرة بتربية الجهال ، ماشاءالله عليها ، خلفت سبعة من ولد وبنات وبعدين من الأول كان عندها أهتمام بمعرفة اسماء الأدوية وشلون تنخذ و بمرور السنوات صار عندها خبرة ولكن هذه الشغلة بالأخص الأدوية بيها محاذير ومخاوف عندما ما تستخدم بالوضع والوقت صحيح ومو بعيدة لا سامح الله نتيجتها راح تكون عكس المطلوب لذلك من الغلط ما نستشير طبيب مختص بأمراضنا وتشخيص المرض!!.
المشكلة انه اهل المحلة نادرا ما يراجعون المستشفى والدكاترة؟؟ وعليش دكتور أشو الست فاطمة بصفهم وصيدليتها عامرة وارشاداتها صحيحة وابلاش!!.
عليش الروحة لوسط المدينة واجور التاكسي والأنتظار وشراء الأدوية والمعاينة؟؟ أشو ماشاءالله عليها تعرف كلشي والله مرات تفتهم ازيد من الدكتورة!!!..
هيجي كانن نسوان المحلة من يجيبون طاري الست فاطمة ،لا وأكثر من هذه بيهن تبالغ بقدرات دكتورة المحلة شلون گبل أشهر ابن فلانة وگع من السطح ومن ودوها الها ماكو خلال عشر دقايق گام وكلشي مابي !! وعشرات الحكايات وكلها الله وكيلكم مبالغة في مبالغة!!.
دكتورة المحلة كانت مرات تعصى عليها العلاج لذلك ما تمناع ان تروح ويه جارتها للدكتور لكونها تفتهم بالأدوية وألأمراض وممكن تتفاهم ويه الدكتور لو الدكتورة لكونها أمشخصة الحالة تقريبا و ممكن أكو ادوية اخرى للعلاج هذه عدى المختبر والأشعة وغيرها ، اذاً مراجعة الدكتور ضروري ولكن هذه بحالات كلش نادرة ، يعني شلون تتنازل وادگول ما أعرف تشخيص هالمرض ؟؟يستحيل كانت تعتبر نفسها أخصائية بكل الأمراض وهذه مصيبة چبيرة!!.
فديوم راجعتها جارتها وانطتها ادوية بس حالتها صارت موخوش وكان لازم تروح وياها لدكتور مختص حتى يعاينها وينطيها الدوا المطلوب.
ورا الظهر اخذوا تاكسي و دخلوا عالدكتور ..
اعتيادي رحب بيهم والأخت فاطمة گامت تشرح وتحچي والمريضة ساكته!!
تعجب الدكتور وماگدر يصبر وگال:
اخت فاطمة أريد أسمع منها مباشرة لكون هي المريضة مو أنتي!!.
المهم فحصها الدكتور وبدا يكتب لها راچيتة الأدوية ، وهناك أدخلت دكتورة المحلة وگالت:
- عيوني دكتور شكتبت الها؟؟.
جاوبها الدكتور:كتبت لها الحبوب الفلانية والشراب الفلاني وبعد اسبوع تراجعني واتمنى الها الشفاء العاجل.
الست فاطمة سوت حركة براسها يعني ما عجبها والوضع وگالت:
- عيوني دكتور هذه الأدوية غلط في غلط!!.
تعجب الدكتور وگال: ليش.. ؟؟ وانت شمعرفچ؟؟
- شلون ما أعرف عندي خبرة وأنت طفل وأني اعالج اهل المحلة، عيوني دكتور بدل الراجيته وأكتبلها فلان دوا وفلان دوا و لا تناقشني .
تعجب الدكتور من كلامها وگال:
- خالة اني خريج طب بغداد وعندي الشهادة الفلانية من انكلترا و زائدا كذا سنة ممارسة بالمستشفيات وهسه انتي جاية تعلميني شغلي؟؟.
الدكتور ما تحمل گام ونزع الصدرية وگاللها:
هاج خالة البسي صدريتي و تعالي أگعدي بمكاني وأني اطلع أگعد بالباب وأصيرلچ فراش!! خوش هيجي لو تريديني اعوفلچ العيادة؟؟؟.
طلعت ست فاطمة وصديقتها وهي أدردم ويه نفسها:
- دكاترة اخر زمان ، زعطوط جاي يتفلسف براسي، شوفي دادة راح أشك الراجيته ونعبر الشارع للصيدلية وأني أعرف شأخذلج من أدوية!!.
ابو طبع ما يجوز من طبعه وكبريائه والله الساتر!!.
رباط الحجي:
الأخوة النشامى بالمنطقة الخضراء (أغلبهم) حالهم حال دكتورة المحلة أخت فاطمة ، لا شهادة ولا خبرة ولكن من تناقشهم واحدهم فيلسوف زمانة كودن يحمل شهادة الدكتوراه بالكذب والدجل من ايران وشهادته معترف بيها دوليا و مايقبل أن يناقشه أكبر بروفيسور.
الله وكيلكم الخالة فاطمة چانت أحسن أقلاها تعترف بالواقع و بنية صافية تساعد اهل المحلة وابلاش!!.
أودعناكم عيوني الى دكتورة أخرى (عذرا) الى سالفة أخرى و مع السلامة.
أخوكم
رئيس التحرير
                                    

• < السابق
• التالي >