راسي افتر!!

التفاصيل

تم إنشاءه بتاريخ الأحد, 28 تموز/يوليو 2024 11:03

كتب بواسطة: سيف الدين الألوسي

سيف الدين الألوسي

راسي افتر!!

بالنظر إلى وقتي الثمين الضيق ولا شغل ولا عمل بعد التقاعد ،، فلهذا السبب كمت ادور دفاتر عتك!!!
ومنها برنامج لمحكمة أميركية فيه قاضية تنظر بدعاوي إثبات النسب بالدي ان اي ،، وسناتي عليه لاحقا !
تذكرت حسن يوسف من يدك الدكة بزهرة العلا جوه الدرج وهي اليتيمة ومتدري شتسوي بعد أن وگع الفاس بالرأس !!
وكذلك يوسف فخر الدين وهو يسكن السطوح ويقشمر ماجدة ويدخلها برج الطيور وبين الضروك تحدث الفاحشة ، وماجدة تحير بالنغل بالجنين المسكين لاحقا !!
أما كمال الشناوي ففاتح شقته للسوالف المكسرة وتجيه حبه ناهد شريف ويكعدون يسولفون على مستجدات الساعة ويدير الها چم بيك ريد ليبل وبعدين تسكر وتدوخ ويشيلها وياخذها إلى غرفة النوم ويطبك الباب برجله مع موسيقى لهذه اللحظات وبعدين تطلع ناهد هدومها مشكشكه وتدك على صدر كيمو ولك خاين غشاش !!! وبعد أن سلب منها اعز ما تملكه الفتاة !!! وبعدين ناهد تحبل ويحسون أهلها وتنتحر باستكان نومي بصرة ..!! يعني رحتيله للشقة لاشتقاق معادلة ماكسويل !!!
نرجع لهذه المحكمة الأميركية والتي أثبتت بأن الالتزام الأخلاقي للزواج في أميركا والعالم صاير مودة قديمة ،، وأكثر الحالات التي يتم فحصهم بالدي أن اي لا يتطابقون مع ابهاتهم ، وتطلع نسوانهم كلها تقجغ !!! وتعرف احداهن بأنها كانت سكرانه ونامت ويه ثلاثة بنفس اليوم !!! شعر راسي وكف من دتسولف القصة القاضية والطفلة المسكينة صافنة منو ابوها !!
التعبير للاب الصحيح هو الأب البايولوجي !! ورح يصيرون بني ادم مثل النباتات اورغانك ونغولة هايبردز مطورين جينيا ،، بسبب انعدام الاخلاق والضمير الطاغية اليوم !!!
ونرجع للفيلم الهندي وعندما ربى الأب ابنه اليتيم واراد أن يعترف له على فراش الموت بشغلة محد يعرفها فكاله !!
ابني راجي عندي سر لك گبل ما اموت !!
كاله احجي بابا !!
كاله تره اني مو ابوك اني امك ،، ابوك كومار البايسكلجي !!
وليوين رح نوصل !!!
والله عيني ما ادري !!!
ما ادري عليمن جبناها وبأي مناسبة وسبب اليوم!!