حچاية التنگال ٢٢٧٦

التفاصيل

تم إنشاءه بتاريخ الأربعاء, 16 شباط/فبراير 2022 10:45

كتب بواسطة: د.سعد العبيدي

                              د.سعد العبيدي

حچاية التنگال ٢٢٧٦

ما أريد أدخل بقانون النفط والغاز الصادر من الإقليم هل هو صحيح لو مو صحيح، لأن هذا ينرادله رأي قانوني وفني، لكني أريد أسأل عجب المحكمة الاتحادية تحكم بالدعوة مالته بهذا الوكت بالذات؟

وعجب ما بتت بالقضية من قبل هذا الوكت، والدعوة يگولون رافعها وزير النفط من سنة (٢٠١٧) ؟
معقولة ما تعرف حساسية الوكت في اصدار القرارات؟
ومعقولة أعضاء المحكمة المخضرمين ما عدهم دراية بعالم السياسة الخفي والمفضوح وبالخلافات الجارية والحروب الطاحنة بين الاطار والتيار الي حتى الطفل صار يعرفها ويشارك بيها؟
أشهد بالله أنها ضربة جزاء مدسْترّهَ من لاعب قوي محترف يدير اللعب من مقصورة خارج الملعب محد يدري بيها وين، وأشهد أنه ذكي بحيث خله لواعيب الاطار يطلعون گول بشباك التيار بوكت حرج، وأشهد أنه أدار الموضوع بسرية واحتراف بحيث ما خله الحكومة، ولا وزير النفط صاحب الآنه بهاي الحكومة يعرفون بالقرار الى أن صار، والله يساعدهم من عرفوا إشصار، واشراح يگولون للتيار الي مستمرين بطلب بركته من فاز لليوم.
لكن الشوط الإضافي بعده ما انتهى لحد الآن، ومفاجئات اللعب بعدها هواي، والفريقين بجعبتهم كثير وكثير، ومنا لمن يصفّرْ الحكم بجلسة البرلمان الي تنتخب الرئيس وتحدد الرئيس تبقى الحرب بين الاطار والتيار ونبقه احنه بنصهم صايرين طشارْ.