حچاية التنگال 806 التوريط

                                              

                        د.سعد العبيدي

حچاية التنگال 806 التوريط

لو واحد يوگف فوگ، كلش فوگ ويباوع على العراق وعمليته السياسية، راح يشوفها هوسه، متشابكه، واحد يورط الثاني ومن ينزنگ يحاول يوخره عن طريقه حتى لا ينحرگ بالنار الي دا تحرگه، وأكبر عملية توريط صارت بين الأحزاب السياسية الدينية وبين المرجعية الدينية بالنجف الأشرف، فهاي الأحزاب أول مرة تعكزت على المرجعية وجابتها للساحة السياسية، وبدت وياها بالتدريج من أخذ الرأي بموضوع الدستور وفقراته، وخلتها طرف بمسألة القرار على الانتخابات لمستوى مباركتها لقائمة ثلث خمسات، وصعدت وياها لاختيار رؤساء الحكومة الى أن خلتها تدخل وكأنها جزء من العملية السياسية، ولمن الناس وخاصة الشباب طفرت روحهم وگالوا كافي والمرجعية أدركت خطأ السياسيين والعملية السياسية وگالت كافي، ورجعت الى طريقها الأصلي بتقديم النصح والإرشاد، وگالت يا سياسيين لا تغركم المناصب، كافي فساد وغلط، غيروا، بدلوا. فالسياسيين انتحزوا، وضاجوا وگاموا ما يديرون بال لحچي وتوجيهات المرجعية، وبگعداتهم السرية والخاصة متمردين على المرجعية وقراراتها.
توريط الحقيقة طلعت نتيجته خسارة لكلا الطرفين، فالسياسيين انحرجوا كدام الناس وضاع قدرهم، والناس صارت تباوعهم زغار بسبب الحاح المرجعية على الإصلاح.
والمرجعية من جانبها هم تضررت من گد ما گامت تطالب بالإصلاح ومحد يسمع كلامها من السياسيين، وشافت بالأخير اشلون انهار گدامها جدار المحرمات الي جان موجود يفصل بينها وبين الجمهور بحيث الناس ولأول مرة گاموا يمسوها بحچي ما چان من گبل أحد يگدر يحچيه.

الطرب الأصيل

الأبراج وتفسير الأحلام

المتواجدون حاليا

578 زائر، ولايوجد أعضاء داخل الموقع