الأشتعال

التفاصيل

تم إنشاءه بتاريخ الأربعاء, 24 شباط/فبراير 2016 17:48

كتب بواسطة: مثنى عبيدة

مثنى عبيدة

الاشتعال

نايمين بهدوء وبراءة الأطفال
حامدين الله على كل الأحوال
يحلمون بالمدرسة وكل الآمال
تبني الوطن بيد هاي الأجيال
ولد الزلم طيبة الأصل والأفعال
صيتهم تنضرب بيه الأمثال
كرم .. نخوة .. وشجاعة الأبطال
يعرفهم عدوهم ويخشاهم الأنذال
عراقيين يا نعم الرجال
تحملوا كل الأهوال
حرب وحصار واقتتال
عدوهم راد يقطع الأوصال
بين العم وأبن الأخت والأخوال
ـــــــــــ
هجمت وجوه علينا وأشكال
غرباء وخونة وسارقين الأموال
يحجون بالصبر ويلحنون الأقوال
مكر وخديعة وغش  واحتيال

قتلونا وهَجرونا وناس بالاعتقال
بيوتنا والمدن أمست كلها أطلال
ما بقى عندنا غير الارتحال
حملتكم يا ولدي وعلى ربنا الاتكال  
و( بزيبز ) *يشهد وكل الأميال
ردنا الوصل وما نقطع الإرسال
ويه أهلنا حتى تحين الآجال
بس كالوا ... أوكف ممنوع التجوال
شدينا الرحال نحو الجبال
مرينا بالوديان وتبهذلنا بالأدغال
جوع  ولاماي للشرب والاغتسال
ولا فراش عندنا ولا غطاء ولا أحمال
ساتره علينا هاي الأسمال
وسفة على الطيبين هذا الإذلال
بس الله كريم وتتغير الأحوال
وصلنا والملايين قبلنا بين التلال
مسحنا وجوهنا وآثار الأوحال
بابا أنا رايح للشغل والأعمال
ما أريد أمد أيد ولا أكون عطال
****
مكسور الجنح ما ظل احتمال
كدامي تتحسرون على البرتقال
ضاعت البسمة والفرح والاحتفال
أتمنى أموت وترحمني طلقة الاغتيال
أريد أبقى وحدي بالاعتزال
تخلى الكل وما صدكت الأقوال
اعذريني زوجتي وهي بوسة للأطفال
أريد أحرك روحي بالاشتعال
وأروح لربي اشكي هاي الأحوال
يا رب يا ذا الجلال
أنتقم ممن دمرنا ودمر عراق الأبطال
بس وصيتي لكم .. أيتامي وأيتام أهل الأفعال
ـــــــــــــــــــــــــ
مهداة إلى روح المرحوم العراقي أبن الأنبار الذي حرق روحه وترك خلفه أيتام والى كل النازحين أهل الكرم والغيرة أهل العراق