الحلم الكابوس

التفاصيل

تم إنشاءه بتاريخ الجمعة, 23 تشرين1/أكتوير 2015 19:02

كتب بواسطة: سيف الدين الألوسي

                            سيف الدين الألوسي

كانت نفوسي ودفتر نفوسي الكوت محلة السراي ، ومن ثم الفلوجة ، وبحسب وظيفة والدي الطبيب الذي خدم العراق ككل ، رغم ولادتي وابي وأجدادي في بغداد وقبل ان تكون هنالك دايرة للنفوس ، الملخص ،

في سنة ١٩٧٥ كنت انوي او اروم السفر في الصيف ، فاخذت تأييد من كليتي الى تجنيد الفلوجة الثانية كوني مستمر على الدراسة الكشرة في كلية العلوم ، ركبت صهوة جوادي الجديد رينو ١٢ ابيض الى الفلوجة ، أعطوني كتاب الى تجنيد الرمادي ، ركبت صهوة الجواد الى الرمادي ، كل شي حسب الأصول ، كنت مطول لحية مثل ديميس روسيز وليس مثل داعش اليوم ، مزق الضابط المعاملة كوني هييييبز مو هبيز ، وليش مطول لحية ، استعوذت من الشيطان وتكلمت معه بأدب ، فاقتنع وكال تعال باجر مزين لحيتك حتى امشي معاملتك ، كلته انعل ابو اللحية ساعة وأرجلكم بدون لحية ، كال لا أني رايح للخالدية !! باجر تعال !!! رجعت لبغداد وزينت اللحية ورجعت ثاني يوم ، انتظرت الى ساعة ٢ من الصبح والكتاب للتجنيد العامة مطلع !! يأبه ليش !؟ كال الجندي كتابك خلصان ، بس السيد النقيب يريد يرجع لبغداد وياك
ميخالف السيد النقيب رجع ويايه لبغداد وإني قررت ان الغي حتى السفرة وانقل نفوسي وتجنيدي الى بغداد ونقلتها الى الكرخ الرابعة كون المنصور تابعة لها ، وبقيت نفس المعاناة ،،، سافرت بعد شهر الى اليونان وبعد نقلي التجنيد وكفالة ٤٠٠ دينار وانتظار من التجنيد العامة في الكرنتينه ومديرية السفر ، ومن ثم سوقي مثل الغنم من ت ك ٤ سنة ٧٨ بعد تخرجي وبنصف ساعة ، ومعاملة تسريحي من ت الكرخ ٤ سنة ١٩٩٠ والتي طولت ثلاثة أشهر !!! خلص العمر والبارحة وإني نايم فزيت من النوم وعمري ستين سنة ولكوني حلمت بان مواليد ٥٦ قد تمت دعوتهم للاحتياط !!! وكعدت مبلل من العرك ( ليس العرك الذي على بالكم ) ،،،،، ومخروع وكلت ولدي اشلون !!! وبعدين تذكرت أني جدو وولدي وبنتي باميركا وإني رجعت حتى اكتب مذكراتي في العراق وحتى وانا نايم !!!! لان الدوشك لم يتبدل بل كلبوه بنصيحة من النداف إنكل سام !!!