دردشه في سياره كيا...

التفاصيل

تم إنشاءه بتاريخ السبت, 07 كانون1/ديسمبر 2013 11:16

               دردشة في سيارة كيّا....

(جوادر- باب المعظم ).. ِ حجي يجلس في المقعد الامامي (بعد عبور سيطرة تفتيش) :

والله هاي ماصايرة ..كل هاي السيطرات وماكو فايدة .والله انذبحنه ، شوكت نرتاح ..؟؟؟؟

• السايق: عمي ياسيطرات كلهم لغافة وملتهين بالبوك ..!!

• حجية : يمة لحد يحجي عليهم ذولة ولدنا ، شيسون اكثر من هذا ، واكفين بحلك الموت!!؟؟

• حجي اخر: عمي امريكا ام المصايب ، معقولة ماتكدر تنهي الارهاب وتخلصنه!!!؟

• مرة اربعينية : المالكي راح يكظهم واحد واحد!!

• الحجي: اي من دبش !!

• شاب يجلس خلف السايق: المالكي لو بي خير جان سوالنا حل صار 8 سنوات هيج...

• الحجي: اني من اشوف المالكي وصاحبة الثاني بالتلفزيون اكول اشتغل الجذب .قتلنا والقينا القبض وراح نحط خطة امنية جديدة وراح نسوي وراح نسوي وكل قبض ماكو..

• حجية گاعدة يم الباب :أگلكم يمة ، هو المالكي مو ابن بدرية الخنــّة ؟

• الجميع : ههههههههه

• الحجية : لا والله صدك ، بدرية بت شناوة رجلها الله يرحمه ،هم اسمه كامل بس ذاك شوية بي نور محمد مو مثل هذا مجولح!!!! .

• المرأة : لايمة يا بدرية الخنة ؟؟.. هذا اجا من بره متشوفين خلقته الله گالبها .هذا اسمه جواد المالكي..

• الحجي : لا اسمة نوري كامل

• واحد من الخلف : لا حجي اسمه الحقيقي جواد

• الشاب الاول : لا اسمه نوري كامل المالكي

• السايق: جمعوا الكروة اخوان

• الحجي :والله المالكي شرطي ما اخليه شرطي، مو رئيس وزراء ..صورة جرجوبة؟؟؟؟؟؟؟؟؟

• الشاب الاول : يمعود هي ظلت على المالكي على الاقل احسن من هذا الدراجي ابو الاعمار والاسكان ، ذاك خلفه ما احطه ..جنة علي العيساوي..

• شاب يجلس في الخلف : شبي ابو الاسكان ؟ ماعاجبك !! لان من التيار الصدري؟

• الشاب الاول : لاعمي اني شكلت .شوكت جبت طاري التيار الصدري .

• الشاب الثاني: اي دير بالك ، مو تكصون بالعالم وتمشون، عبالكم تايها ،روح زيّن شعرك عدل واحجي

• الشاب الاول: نازل بالله نازل (نزل)

• الحجي : شرد المَغسَول ..لا يا جبان على هل الدكَه،عبالي صدك زلمة

• الحجية: عمي هسه هو شكال.. راساً حطيت الصدر بالنص..ماكال شي وانت اكلته وشربته

• السايق : اخوان اجمعوا الكروة

• الشاب: لا يطلعون دعايات على التيار الصدري ، خل يحترمون نفسهم وينلصمون، مو مزّين حفر وجايني يتنكرز جنة بعيجي

• الحجي: ما بيها شي بوية .. انتم راح تصيرون بالحكومة ، لازم تتحملون حجي الناس .

• الشاب : حجي انت هم شكلك اتطلع دعايات على التيار، منو كلك الصدر راح يشارك بالحكومة؟

• الحجي: نازل عمي نازل........ بهل القسمة (نزل)

• الحجية : الحجي هم شطح ، كال اني واني وبعدين اطاها اللهيب ، يمكن منّا للتانكي مال المي ميحد راح يبقى .

• الشاب: شنو حضرتج تقلدين ؟ عيب حجية انت مرة جبيرة ترى والله ... • الحجية : نازل يمة نازل ،هاي شلون طركاعة ( نزلت )

• السايق : يابه انت بدل متحجي اجمعنه الكروة الله يخليك

• الشاب : اني مو (سكن) مال الخلفوك افتهمت ، ترى والله احرمك من الشارع

• السايق : استغفر الله هاي شيخلصها .. بابا انت شبيك شمتريك من الصبح • شابة كانت صامتة: اخوان صلوا عل النبي ، هاي شبيكم الله غاضب عليكم بس تتناكَرون

• الشاب : الله غاضب عليج وعلى الخلفوج، دغطي كذلتج اول مرة وبعدين تفلسفي علينه

• الشابة : نازل عيني فدوة ..عزا العزاني (نزلت)

• السايق للشاب : اسمع لك ترى انت طوختها ، مو عبالك احنا ازواج، ترى هاي سيارتي بخدمة السيّد وكل جمعة اني انقل بيها مصلين للكوفة بدون كروة • الشاب : نازل عيني نازل (نزل)

• السايق : الكروة اخوان ..............