حچاية التنگال ٢٤٦٨

التفاصيل

تم إنشاءه بتاريخ الخميس, 26 كانون2/يناير 2023 12:30

كتب بواسطة: د.سعد العبيدي

د. سعد العبيدي

حچاية التنگال ٢٤٦٨

طَشَتْ بين الناس قائمة أسماء يگولون الحكومة معينتهم مستشارين وصل عددهم للعشرين، هذا غير المستشارين الموجودين من گبل، والي مدومنين على كل الحكومات، ولمن واحد يباوع أصول السادة المستشارين، وانتماءاتهم يشوفهم موزعين على الجهات السياسية للاطار وربعه الي شكلوا الحكومة الحالية.
طبعاً هيچ تعيين إذا چان صدگ، وعلى الأغلب صدگ أو قريب من الصدگ، لأن ماكو دخان بلا نار مثل ما يگول أبو المثل، يبين وكأنه تعيين، عبالك جا توزيع تركة. أو ورث بين الورثة المستحقين.
وهيچ تعيين يعني أنو الجماعة ما مهتمين لمشاكل البلاد الإدارية والمالية ولا يريدون يحلون مصايب الاستنزاف والسرقة وتبديد المال العام، ومعناه أهل الاطار يريدون يقبضون ثمن فوزهم بالأغلبية، ولو هو مو فوز مو حقيقي لان صار بعد انسحاب التيار، ويعني قسمة ترضية، تثير كومة أسئلة وعلامات استفهام:
أولها الله يساعد رئيس الوزراء على هيچ ربع فاكين حلوگهم بس يريدون ياكلون مثل تنابلة السلطان، وثانيها يا جماعة انتو گلتوا احنه جايين نبني أشو تبين دا تخربون، وثالثها يا حكومتنا العلية ليش هاي المجاملة والترضية، خو گولوا لا، وسجلوا موقف للتاريخ وشيصير خلي يصير، واتركوا فد أثر طيب بگلوب الشعب الي هو جابكم وهو الي قادر يشمركم بره الملعب اشوكت ما يريد. وأخيراً لازم نسأل نفسنا ليش كل الحكومات الي اجتي ماشية على نفس سچة الترضية والتقديس.