نسألكم الدعاء .. مولانا !!

التفاصيل

تم إنشاءه بتاريخ الأربعاء, 20 شباط/فبراير 2013 07:05

                      مؤيد حميد

"گبل فترة مو بعيدة، توكلّت وخذت فلوسي، تعب عمري بالغربة، وحك أرض زراعية ورث ابوي وجدي، وكلت احسن شي اسوي مشروع صغير بوطني اللي جان بالي، وبنفس بلدتي الحلوة، والشط يخترقها من الوسط، وبيها هوى ما متنفسه بكل مدن اوربا، وإشتريت قطعة ارض، وكلفت مهندس معماري حتى يبنيها مطعم للوجبات السريعة، بعد ان حصلت موافقة من اشهر مطعم امريكي ( ماكدونالز للوجبات السريعة) ـ

والمهندس المعماري، شاب لطيف ومؤدب، نصحني اولا ان احصل على الموافقات، وسهلّي امري، وكلي عمو لازم تأخذ موافقة أمانة بغداد، والمحافظة، اي طبعا لازم موافقات خو مو كوترة،ـ
ثاني يوم توكلت ورحت للمحافظة، أنت سبع ومن ظهر ابوك تفوت من الباب، يمكن فرقة عسكرية واكفة بالباب، بس اني وشيباتي وجنطتي،ـ
كول والله دخلوني للاستعلامات، حجيت الشغلة، دزوني على موظف؛ سبحان الله، تشوف الايمان والخشوع يشع من وجهه، وهم رديت اسولف على مشروعي، بعد ساعة لمن رفع راسه علي، وهو كله ايمان وخشوع، كلّي عمو المسألة يم الامانة مو يمنة، تشكرت منه واخذت تاكسي للامانة،ـ
وبالاستعلامات، اكو احترامات أفضل من اي مكان بالعالم، وبالدور، تگعد، لمن يجيك السره، ولو ما سألت موظف الاستعلامات، جان للصبح اني گاعد؛ المهم، هم دزني على واحد، وهذا الواحد، سبحان الله، تشوف السبحة بيده، وخال على الطاولة مالته، ايات قرانية، كلت أي، هو هذا اللي يكملي معاملتي؛ فرش نفسه على الكرسي وكلي شوف عمي، ماطول مشروعك إستثماري، أحسن شغله تسويها ورأسك مرتاح، روح يم سيد (ابو ....) وهو يحلّك المسألة كلها، والمكتب ماله صاير بالجادرية، ـ
المهم أخذت تكسي ورحت للجادرية، وهناك شفت قصور تخبل، شنو هالتصاميم، والبذخ بكلشي، وسيارات ما أعرف شنو اسمائها؛ـ
هم المهم وصلت لمكتب السيد، سلمت وگعدت، وصلني السرة، وحچيت القصة الحزينة، بس چذّبت على موظف الاستعلامات وگلتله، دزوني من المحافظة، كالي انت عندك موعد وي السيد ، كلت لا بس اني دزوني من المحافظة والامانة؛ كلي لحظة واتصل بواحد،ـ
دخلت، شفت رجل طويل لابس قاط يموّت ، وقميص لونه ماكو منه، وحاف من فوك، ولحيته شكد حلوه عبالك گاع هسة حاصدها، اني هم سلّمت وشلونك مولانا ونسألكم الدعاء،ـ
اي هاي رزخونيه مال الجماعة، كبل جانت شلونك رفيقي، اليوم السلام عليكم، نسألكم الدعاء،ـ
أشو هالرجال تنرفز وأنتفش وكلّي، اني مو السيد، تفضل شتريد؟ـ
لا العفو، عندي مشروع أستثماري صغير، وكلت اريد اقابل السيد حتى يوضحلي شلون ابدي؛ كللي تفضل استريح، والله تغيرت الامور، جابولي جاي يخبل وريحة البخور ماكو منها.ـ
كولوا والله بعد ربع ساعة دخلت بمكتب السيد؛ مو مكتب، لعد شلون غرفة المحافظ، لا شنو محافظ، لعد شلون غرفة الوزير، هم لا ، لعد شلون غرفة ابو سراوي، يمكن تموت وتتخبل، رجل بالثلاثين من عمره، سمين الى درجة انو ما يملك ركبة، لحيته تخبل، ولابس دشداشة بيضة، وفارش نفسه دكول فسيفس، وبيده اليسرى تلاث محابس، الشذر محالتهن يختلف بالوانه، وسبحته يمكن 202، وحايط المكتب كله ايات قرانية بأطارات تخبل، صدك من كال، سيماهم في وجوههم،ـ
المهم بديت احجي للسيد، الله يحفظه، أو دك التلفون، وبدى يحجي وي واحد هم سيد، لانو كلسع يكول، لا سيدنا ميصير، المبلغ كله 900 مليون، 300 للامانة، شيبقالي اني؟ لا سيدنا الله يخليك، لعد خليها من ارجع من تركيا! (ومن يضحك بطنه تصعد وتنزل)، لا والله، الجهال يريدون يشوفون اسطنبول، هذا الصغير كاتل نفسه، يريد يشوف مراد علم دار، ذابحني بالمسلسلات التركية هو وامه، لا بس عشر تيام، خلي يشوفون مدام عندي وكت، لانو بعد شهر، راح يصير مؤتمر القمة، وسيد ( ابو ...)  راح ياخذ مشروع شارع المطار، والله حصلّته من الجماعه بطلعان الروح، لا، عندي ضيف مستثمر وداحجي وياه، بعدين اخبارك، نسألكم الدعاء سيدناـ.
اي العفوـ اخرناك اخوي، كلي مشروعك شنو، وشكد كلفته، وين صاير، نطيني مفصل عنه، وتدلل..ـ
گمت من الكرسي، ومديت ايدي للسيد، گتله، اخذت من وقتك مولانا، شكرا على الچاي ، واتمنالك سفره سعيدة، وبلكي تشوف مراد علم دار بتركيا، بس لا تنسى تاخذ صورة وياه، ونسألكم الدعاء سيدنا،ـ
ورجعت باول طيارة لدولتي، لان شفت الناس مو ناسنا كبل، حتى الكاع تختلف عن كاعي.ـ
ناس شرهين ميعرفون رحمة ولا ضمير، المهم يصلخون الشعب صلخ، ونسأل الشعب العراقي الدعاء.
وما خفي كان اعظم!".......