يگولّك المالكي ما ينام بفراشه !!!

التفاصيل

تم إنشاءه بتاريخ الإثنين, 04 شباط/فبراير 2013 08:33

                   يگولّك المالكي ما ينام بفراشه !!!
                           بقلم: فــــد واحـــد

من لقاءات وخطابات نوري المالكي، إتبين أن هذا الرجل مو طبيعي.. مضطرب الشخصية، إيخاف من شيء راح إيصير, مو مستقر وقلق دائما.. عنده شكوك وهواجس من حدوث إنقلاب أو تغيير ما، مشتت الافكار، حاد وعصبي المزاج، يستفز بسرعة ويترك الاوهام مسيطرة عليه، يتراجع من أيحس أن الطرف الاخر أقوى منه .. لا يمتلك أية رومانسية، يحتاج الى تليين عضلاته لانه دائم الشد. عنودي يصر على كلامه حتى وأن كان خاطئاً، ولا يقبل نصيحه الاخرين إلا نصيحة زوجته المقيمة في لندن بقصر رائع أشتراه لها من صافي رواتبه التي صمّدَهن شهراً بعد شهر!!!... هنيالك يا عم ما عدى الحوافز..
المالكي ما ينام بمكان واحد، يگولون لأنه أكو بعوض!! يقولولك دائم الدعاء والتقرب الى الله!! لكن بس بالمصايب.. عدما يحچي يؤشر بيديه الإثنتين!! حتى يشوّف المحبس مالته، ويجوز من كثرة اللغف!! وخايف من كل سؤال يوجه إله , وعنده يوم الجمعة أثگل الأيام!!! أي مو يطلع أيشوف خرفانه.. وتشوفه أيفز من رنة التلفون، ينراد الشيخ خالد العطية أيسوّيله إحجاب!! يمتلك فرص لو يستخدمها, أيصير أكثر شهرة, كمان ..علما أنه لا يهوى الشهرة.
عنده الخيانة شيء عظيم, بس هو من أيخون زوجته مو شيء عظيم ..
عليك أن تتأكد من تناول أدويتك بنفسك, أو تخلي اللللللل هيه تنطيك الدوة من أيدها أطيب ..
لا تغامر بشي أنت لا تملكه, عگبيش بعد خراب البصرة!!
كن أكثر صبر من شيء ما تتوقعه راح أيصير عندك!! والمبلل ما أيخاف من المطر..
اللي شاغله باله أيسوّي حكومة أغلبية سياسية, حتى بعد أربع لخن وجيب لغف.. بس جماعه بالتحالف الوطني ما إيوافقون..
وحسب ما عرفت, أن عموري الحليو شاور الايرانيين بهذا الرأي خلال طاولاته المستديرة بأيران مؤخراً, ولقنوه التعليمات، بأن يمصّ المالكي (أقصد يمتص) زخم المتظاهرين بأعلانه عن أطلاق سراح بعض ولد الخايبات والخايبين، وينطي فلوس خضرة ((لونها أخضر!!))، للعشائر الجنوبية والوسطى حتى ما أيسووون عليه مظاهرات.. ويسون لقاءات مع عشائر الانبار والموصل حتى أيجففون التظاهرات, وإصدار الأوامر بتعيين  الصحوات بس مو الكل!!، والاغداق بالمال لعدد من عشائر الغربيه ومنح ابنائهم وظيفه شرطي ويقلل من الگاعدين بالگهاوي، وتحسين هذا صديقي ,وتحسين الخدمات.. والتقارير كلها تشير الى أن المالكي اليوم في وضع ((حية ودرج!)) لانه صار ريس وزراء والقايد العام لقوات باب الشرجي ووزير الدفاع ووزير الداخليه وريس المخابرات وريس البنك المركزي ووزير الكهرباء ووزير الصناعة ووزير الزراعة , بعد شيريد .. ويجي اليوم اللي أيصير هو كل العراق والقائد الضرورة وعلى عناد علاوي, والما يرضى خل يرضى بجزه وطليان..
وما خفي كان أعظم