رساله عاجلة إلى عزيزتي فيروز

التفاصيل

تم إنشاءه بتاريخ الإثنين, 17 أيلول/سبتمبر 2012 18:58

كُنْتْ حَابِبْ خَبْرِكْ
أنّو جِسْرِ اللَوْزِيّة.. فَجّرُوه!

ودروب الهوی انقطعت
لأنو في دواليب شاعلة
 وماعاد عم ينطّرونا عمفرق دارينا
 هلق عم ينطرونا
عالحاجز اللي قبلو

 وطريق النحل ماعاد حدا يمشي عليه
خوفاً من شي عبوة ناسفة
أو شي قنبلة صوتية!!

 والبوسطة يلي كانت تنقلنا
من ضيعة حملايا لضيعة تنورين
عم تروح فاضية
لأنو العالم ميته رعب  من طرقات السفر!!

 وصرنا بدل ما نسمع صوت المهابيج
عم نسمع صوت ار بي جي
وبي كي سي
وهاون ورصاص وروسيات

 والسيارة مش عم تمشي
 لأنو ماظل معنا حق بنزين
 
والقهوة اللي عالمفرق سكرّت
وصَرّفِتْ الشغّيلة
 
 
 وجوز ام سليمان
ماطلع عم ياكل رمان بالحقلة
طلع مخطوف
وام سليمان باعت اللي فوقها
واللي تحتها لحتى تطالعو

 و بعد ما ضاع شادي
 استشهد جورج وأحمد
وعلي وطوني واسماعيل
وعمر وحسين!!

وما عاد فيكي تقطفي ولا زهرة حمراء
 لأنو الزهر اصفَرّ من خجله
قدام دموع الأمهات
 ويبس لأنو المي مقطوعة
متلها متل الغاز
والمازوت والبنزين!!
 
لذلك... أنا قررت آخد هالناي وغني
بلكي هالعالم تصحى بقى
وتتذكر أنو سوا
ربيــــــــــــنا
http://www.youtube.com/watch?v=Nury9oroob0&feature=g-vrec

• < السابق
• التالي >