مسيو اودة مليونير لكنه بخيل كتير!!!

التفاصيل

تم إنشاءه بتاريخ الأحد, 22 كانون2/يناير 2017 16:20

كتب بواسطة: جلال چرمگا

          مسيو اودة مليونير لكنه بخيل كتير!!!

مع بداية الحصار على العراق عام 1991 قررت الحكومة أن تقلل النفقات على هواية شغلات منها الأيفادات ، وحتى لو أوفدت وفود الى الخارج كانت هناك شروط و حدود للصرفيات والأمور الكمالية.
بهذيج الفترة أوفدت عدد من كبار المسؤلين منهم بدرجة وزير والبقية مدراء عامين الى العاصمة الفرنسية باريس لمدة أكثر من أسبوع.
وصل الوفد وكان بأستقبالهم طاقم السفارة العراقية على راسهم سعادة السفير .
اخذوا سيارات ووصلوا الى الفندق اللي ينزلون بيه وهناك في صالة الفندق ، بعد كلمات الترحيب والتعارف گاللهم السفير:
- اخوان ماكو داعي أنطول بالحديث ، تعرفون وضع البلد مع ذلك نزلناكم في هذا الفندق وهو من الفنادق الراقية في باريس.
هنا النوم زائدا الريوك (الفطور) وراح نصرف لكم مصرف جيب ، انتم تتناولون الغدا والعشا خارج الفندق لكون الطعام بهذه الفنادق هجمان بيوت.
نرجو ان تلتزموا بالتعليمات وأبواب السفارة مفتوحة لكم في أي وقت وراح يكون وياكم مترجمين من السفارة طيلة وجودكم هنا.. فأهلا وسهلا نورتم باريس!.
من ضمن الوفد( عودة) اللي حتى الشيطان مايگدرله!! وأكيد هذا الحچي مايصرفله لأنه لابد أن يلعب لعبته وياخذ راحته بالتمام.
بعد تسجيل الأسماء وزعوا عليهم مفاتيح الغرف وصادف مو كلهم بطابق واحد وهذه مسألة طبيعية حسب الشواغر بالغرف.
اثنين من اعضاء الوفد(داود و محمد) كانوا يريدون أن تكون غرفهم بنفس الطابق لكونهم يقضون أكثرية الأوقات سويا..
فطلبوا من عودة أن يغير المفتاح ويه داود وهو ياخذ مفتاح الأخر وهذا ماحصل ولكن في الحقيقة وحسب سجلات الفندق الغرفة باقية بأسم داود وألأخرى بأسم عودة وهذا شىء شكلي بالنسبة اللي نياته صافية!!.
المعروف عن الأخ عودة شراب أگشر، بالعراق ليليه يضرب نص بطل عرگ هبهب (أبو كلبچة) وبعده مامكتفي!!.
واليوم هو بعاصمة النور وهالشراب المعتق و هالشمبانيا و الويسكي السبيشل ، ياترى معقولة يفوتها ؟؟ هي فرصة ويجوز ما تتكرر!!.
الأخ السفير بطران عبالك يحچي ويه طلاب مدارس الأبتدائية!!.
مسيو عودة مو غشيم!، معقولة يروح يگعد بمطعم الفندق و يشوفوا جماعته؟؟!!.
أكيد لاء .. بعد الظهر من تخلص المحاضرات وهو جوعان و مامتغدي ، رأسا يرجع الى غرفته ويتصل بخدمات الفندق  ويطلع قائمة الأكلات الفرنسية اللي أمحضرها كبل شهر ويطلب:
-بط محشي مع الخضار.
-سمك سلمون مشوي.
-كراتان بالدجاج.
- كوردون بلوتشكين!.
-غراتان الدجاج مع البطاطا.
-سلطة النسيواز!.
- شراب معتق درجة أولى وويسكي سبيشل.
-مشروبات غازية بالأخص الصودا والسفن آب وعصير البرتقال.
- حلويات و فواكه من الدرجة الأولى.
ماكو اقل من نص ساعة وعربات الخدمة مثل القطار تدخل غرفة المسيو عودة، وهو گاعد مثل الملك يأشر بأيدة ويختمها ب/ ميرسييييييييي فيري ماج!!!.
وبالمناسبة ولا مرة مد أيده وأنطاهم فرنك واحد ، ومرة سمع عمال خدمة الغرف يكولون:
مسيو عودة مليونير ولكن بخيل جداااا.
يقفل الغرفة و مايجاوب حتى عالتلفون ويبدأ بالشرب والأكل الى أن يشبع تمام !!.
بأختصار ربيع دائم بالنسبة لمسيو عودة فندق درجة أولى بقلب باريس و هالمأكولات والمشروبات الباريسية ماشايف مثلها حتى بالأفلام!!.
ينام وهناك بالليل گعد ويطلب شمبانيا و وويسكي ( عوازة!!) وأنواع المزات، بس الواحد يحچيهه لله مايطلب عشى كونه مكتفي وبعد ما يكتفي من الشرب والقضاء على المزات الفرنسية وبكل هدؤ يطلع العربانة برة ويبعدها عن باب غرفته حتى لايشك به أحدهم من أعضاء الوفد!!.
مشكلة المسيو عودة عيونه جوعانة وإلا ماياكل من كل صنف إلا الشىء القليل وكل مرة يگول وية نفسه:
اضرب مسيو عودة والله لأجرب كل الأكلات الفرنسية ،هي فرصة وما تتكرر.. حلوووووو مسيو عودة ملك زمانك ، نابليون عراقي.. ههههههههه!!.
الأخ عودة كان وكل يوم يكرر هالعملية من دون أن يشعر به أحدهم من أعضاء الوفد ومن يسألوه وين يروح بعد الظهر وبالليل يجاوبهم أنه يراجع المحاضرات ويعجبه يطلع بالليل يتمتع بأجواء باريس، وهو الله وكيلكم ماشايف شىء من باريس غير مكان المحاضرات وغرفته بالفندق!!.
ما أطولها عليكم ، مسيو عودة منهاجه ثابت مع شوية تغيير بعض المرات بالعشا كان يطلب بط محشي وشىء أخر لأنه كان يحسب حساب لايروح يجوع نص الليل وبعد هالبطالة من الشمبانيا و الويسكي السبيشل!!.
أنتهى الأيفاد و حزموا حقائبهم و اخذتهم سيارات السفارة أو التكسيات الى المطار وهناك ودعهم السفير مع تقديم الأعتذار لكونه وبسبب الحصار ماگدر يقوملهم بالواجب مثل السنوات الماضية.
والحساب بعدين!!.
ارسلت ادارة الفندق الفواتير الى السفارة وإذا الأخ داود ماكل وشارب على حساب السفارة قيامة الله:
- بط محشي و سكالوب و واكلات أخرى للظالين!!.
- خمسة ابطالة ويسكي و سبع ابطالة شمبانيا.
- حلويات وفواكه من غير حساب!!.
بعد ايام قامت وزارة الخارجية بأرسال رسالة شديدة اللهجة الى دائرة داود و يعتبرون تصرفه غير لائق ولابد أن يتحمل تلك المصاريف!!.
داود المسكين من سمع الخبر وكأنما صاعقة و ضربت راسه ..گام يصيح بصوت عالي:
-يامعودين يا أهل الله أني طول عمري رجال ملتزم أصلي وأصوم وحاج بيت الله معقولة هالأتهمات؟؟.
ملاعين الوالدين يريدون يخربون سمعتي هذه كلها شغل اسرائيل وأمريكا لأنه شافوني كذا مرة أصلي ، أكيد وإلا اني والمنكر كجة مرحبا!!؟؟.
أني تالي عمري أشرب كذا بطل شمبانيا وويسكي؟؟.
اقسم بالله مامامكل بط محشي طول عمري، ولكم يا سكالوب يا غراتان دجاج ..  يا صخام!!.
بالعظيم راح أموت وأنفجر ، ياناس سوولي چاره!!.
كل هذا والأخ عودة ولا عبالك يمه؟؟؟والمشكلة داود المسكين كان ناسي شغلة تبديل الغرفة مع الملعون عودة!!.
بعد مكالمات ووساطات قسطوا المبلغ على داود اللي لاماكل ولا شارب وفوگاها تهمة شرب المنكر وهو حاج بيت الله!!.
رباط السالفة:
هالأيام بفضل ديمقراطية أمريكا كل الوفود اللي تطلع للخارج وأكثرهم أمعممين ، بس وصلوا للخارج وعيونكم ماشافت:
- فنادق خمس نجوم.
-شراب وويسكي و شمبانيا .
- أنواع اللحوم البيضاء والحمراء.
نعني! بأختصار أمر من المسيو عودة ولكن الفرق أن الجماعة لأنهم مسؤلين وطالعين للخارج لخدمة العراق والعراقيين وعايشين في زمن الحرية والديمقراطية  كلها على حساب خزينة الدولة.
أما الحاج (ابراهيم الجعفري) وزير الخارجية من يسافر ويروح خارج العراق ياخذ ويا:
-عائلته بالكامل وحتى الأحفاد.
- نسابته وأقربائهم.
-مترجمه الخاص اللي يحجي انگليزي بلبل (كودن معالي الوزير هابياض بالأنگليزي!!)!!.
- جيران جيرانهم لكونه رجل منصف ماينسى ولا واحد.
- موظفي المكتب الخاص والقلم السري وحتى الصادرة والواردة!.
والحچي بيناتنا حتى روحاتهم للأماكن اللي ما أنريد أنجيب أسمائها هم تسجل على حساب الحكومة والشعب العراقي !!.
بعضهم يخرب عالروليت والبوكر وهناك يجرب حظه وماخسر غير دفترين وهم تسجل على خزينة الدولة!!.
عاشت الديمقراطية وعاش الشيطان الأكبر والموت للأستعمار و السكالوب و غراتان الدجاج والبطاطا وسلطة النسيواز وحتى مسيو عودة والبط المحشي و المشوي ...
الى (سكالوب أخر) .. عذرا سالفة أخرى أستودعكم والسلام عليكم.
أخوكم
رئيس التحرير

• < السابق
• التالي >