حتى الأمام المهدي المنتظر ما خلصان من تصرفاتكم!!!

التفاصيل

تم إنشاءه بتاريخ الأربعاء, 24 شباط/فبراير 2016 20:22

كتب بواسطة: جلال چرمگا

الأخوة الأعزاء:

في عراقنا اليوم نسمع و نرى العجب العجاب وأغلبها بأسم الدين و الأئمة.. حرامات لا أكو حكومة تضربهم بيد من حديد و لا الناس تنتفض و تستنكر!! ،رسالة من مدينة الكاظمية في بغداد مرسلها الأخ ( ح .ع) يروي لنا قصة حقيقية تدخل في خانة أفلام الأكشن و سرقات وعمليات المافيا من النوع الثقيل.. لنطلع معا:

سيد دخل على صايغ ذهب ..عمامته سوده وعلى كتفه قطعه قماش خضره ووجهه نوراني!!

الصايغ تفضل سيدنا
گاله انا المهدي المنتظر!!!
ضحك الصايغ وگاله گول غيره سيدنا صحيح انت ابن رسول الله وجهك نوراني بس الامام ما يظهر لشخص مثلي !!
بهالاثناء دخلت مره ورجال يشترون ذهب واختاروا قطعة ذهب گال الصايغ اتفضلوا استريحوا لمن اوزن القطعه فوجيء بالمرأة تجلس بحضن السيد!!!
گاللهه الصايغ وين گعدتي بحضن السيد؟؟

جاوبته بستغراب المره : يا سيد؟؟ وينه ؟؟؟شنو شبيك اخي ؟؟ تبيعلنه؟؟ لو نروح ؟؟ شو انت موطبيعي!!!

سكت الصايغ ووزن قطعة الذهب ونطوه المبلغ وراحوا..

گله السيد ابني تره بس انت تشوفني ،وبقى يحچي ويا وبهالاثناء دخلت عائله اخرى مره ورجال وختاروا قطعه وگاللهم استريحوا لما اوزنهه وگعدت المره بحضن السيد فاستغرب الصايغ وگال: انتي گاعده فوگ السيد!!
زوج المره گاله اخي شبيك شنو مو طبيعي وين اكو سيد؟؟ اذا اتحب انروح ونرجعلك بعدين!! .

سكت الصايغ وباع للمره قطعة الذهب ونطوا المبلغ ،بقى صاحبنه حاير گاله السيد ابني اني ما محتاج منك شي واني ما اظهر لكل واحد الا ما ندر اخذ هاي قطعة القماش احتفظ بيهه ومسحهه على وجهك حتى يزيد رزقك وتبره من كل مرض!!
الصايغ اخذ قطعة القماش بكل قدسيه وقبلهه وشمهه ومسح بيها وجهه وگع خدران مغمى عليه ....
السيد لم الذهب كله والاموال وكنس المحل كنس هو وربعه!!

بعد فتره فتح الصايغ المحل من جديد وبدا يشتغل وانتعش المحل، وفي يوم من الايام واذا سياره مسلحه وجابوا السيد مكلبجين اديه كشف دلاله وضابط التحقيق وزع القوه المسلحه وگال للسيد هذا محل الصائغ اشرحلنه شلون سرقتوه؟؟
گال السيد ... سيدي دخلت على الصايغ وگعدت اهنا وگتله اني المهدي
ضحك وما صدگني بعدين دخلوا جماعتي رجال ومره يشترون ذهب وگاللوله وزننا هاي القطعه الصايغ گاللهم استريحوا فجلست المره بحضني فصاح الصايغ للمره انتي گاعده بحضن السيد فوهموا الصايغ انو ماكوا شخص
جالس واشترو الذهب حسب الاصول ودفعوا المبلغ وراحوا وكررنا الحال مع رجال ومره اخرى الى ان صدگ انو اني المهدي المنتظر!!
فگتله اني ما يشوفني الا خواصي واني جاي اهديك هاي قطعة قماش ازيد رزقك وشافي اي مريض الاخ الصايغ صدقني واخذ القطعه!!
الضابط گاله شلون شلون وضع القطعه؟؟... يله مثلولي المشهد شلون صار؟؟.
وگف الصايغ مقابل السيد انطوا قطعة القماش وضعهه بوجه الصايغ بقوه
وچان الصايغ يوگع مغمي عليه مره اخرى،الجماعه جمعوا الذهب والمال وكنسوا المحل من جديد!!!
وعلگوا صفارت الانذار واق واق واق واق واق واق واق

أودعناكم عيوني..والى حچاية أخرى من القلب للقلب أمودعين بالله و رسوله.

رئيس التحرير

• < السابق
• التالي >