خو سمعتوا كلامي!! ما أريد قارش وارش

التفاصيل

تم إنشاءه بتاريخ الأربعاء, 30 تموز/يوليو 2025 18:34

كتب بواسطة: جلال چرمگا

خو سمعتوا كلامي!! ما أريد قارش وارش*

بداية احتلال الأمريكان لوطننا دخلت مجموعة من الجواسيس والمرتزقة (نزلوا من المريخ) و سكنوا بالمنطقة الخضراء بالبرشوتات ونُصب الأمريكي (بول بريمر) الحاكم المطلق للعراق ، كلامه مثل السيف يأمر وينهي وبشخطة قلم أنهى والغى الجيش العراقي الباسل وگاللهم أگعدوا بالبيت ماكو جيش ، العراق مايحتاج جيش راح أنسوي العراق بلد ديمقراطي خمس نجوم ولأبو موزة والحدود ما عليه شىء محد يتجرأ يتحارش ويدخل بدون اذن والجيش الجديد (الذي سنشكله بمقاييس دولية محترمة) ما راح يغسلون رجلين الزوار الأيرانيين وقنادرهم مطلقا كودن للجيش هيبتة ويمثل البلاد!!.

وفعلا ( احترامنا للخيرين) كلنا شفنا شلون يسوون مساج لأقدام زائري العراق وهم من دون فيزا و فرحانين كلش بهذا الأستقبال والكرم اللي ماكو منه بكل دول العالم!!.
ومو بس هاي راح وأمر بالغاء وزارة الأعلام و سرح الاف الكوادر الاعلامية ونفس الشىء ماكو اعلام وروحوا اگعدوا ببيوتكم راح أنسوي اعلام حر بحيث حتى( عمشة العورة) بأمكانها تفتح قناة فضائية واذاعة وتترأس عدد من الجرايد و المجلات وما أريد لغط وليش و شلون ومن غير اعتراض!!.
أجتثاث البعث و ماكو أحزاب في العراق الجديد و بعدين شفنة عشرات لابل مئات الأحزاب و التجمعات والمليشيات و الحركات بحيث صارت لخة وأبو الطبل ما يعرف بأبو المزيقا كل واحد يعزف مثل مايريد!!.
جابوا اسماء وشخصيات عميلة ماسامعين بيهم (الا عدد قليل منهم) واغلبهم أيام وجودهم في ايران و الشام ولندن يحملون اسماء وهمية خوفا من المخابرات العراقية!!.
والكل يعرف بأن هؤلاء گبل ما يدخلون مع جيش الاحتلال كانوا يشتغلون شغلات غريبة و عجيبة:
منهم من كان يبيع سبح ومحابس.
منهم من كان يشتغل بتزوير المستمسكات العراقية.
منهم من كان يبيع كارتات التلفونات وجواريبات.
منهم من كان قصخون واخرين سحرة و مشعوذين!!.
منهم كان يبيع بيض اللگ لگ و گرگري بالقرب من مرقد السيدة زينب.
وعشرات المهن الغريبة العجيبة وعلى غفلة صاروا اعضاء برلمان ووزراء ووكلاء وزارات و محافظين و سفراء ورؤساء احزاب وواحدهم يحچي ويه روحه ويگول:
معقولة هذه حقيقة لو حلم؟؟؟.
وتعال شوف نفس هؤلاء استلموا العراق بكل خيراته و( حمروش وطاح بكروش) والله العظيم اتعجب شلون واحدهم ما تخبل وتسودن؟؟.
ياجماعة الخير
مرات احنه العراقيين هم ما اعرف شلون أنفكر؟؟
ياترى شنتوقع من هالنماذج اللى واحدهم مايعرف (الجك من البك) لا بالسياسة ولا بالأدارة و الدبلوماسية ولا بحب الوطن واحدهم عاش نص عمره جاسوس و عميل يكتب تقارير لكل اعداء العراق مقابل ثمن بخس لايذكر!!.

-----------------------
رسالة من الأخ ( م.عبدالزهرة) من جنوب الوطن ، بعد التحية والسلام كتبلي شىء جميل ينطبق على الحالة الحالية من زمن بريمر وانت نازل ... يگول:
عندما كان المرحوم المقدم عادل بشير المسؤول الاول عن تدريب المنتخب العراقي لكرة القدم في الستينيات، جمع المنتخب، وكما هي العادة، في معسكر تدريبي مغلق لمدة شهر، استعدادا لمباراة مهمة.
وطبعا في هكذا معسكر كان النظام صارما ولا يُسمح لللاعبين بالخروج ، وعليهم النوم والنهوض مبكرا، الى غير ذلك من أمور الاستعداد للمباريات المهمة.
في اليوم السابق للمباراة، وكما هي العادة ايضا، سمح لللاعبين بان يذهبوا الى عوائلهم للراحة، حتى يعودون في صباح اليوم التالي لتدريب خفيف قبل المباراة مساءا. وقبل ان يسمح لهم بالخروج جمعهم وقال لهم:
( ارجوكم يا أولادي ان تحافظوا على لياقتكم ولا تُتعِبوا او تُجهِدوا انفسكم كي لا تفسدوا التدريب الذي حصلتم عليه في المعسكر. وارجوكم اللي متزوج اتمنى عليه ان لا يسوي شي ويه اهله هذه الليلة، باجر ان شاء الله نغلب ويحتفل هو وياها على كيفه. اللي عنده رفيجه (او ك..) نفس الشي، ياخذها للمنتزه ويگعد وياها وباجر من نغلب يكون مرتاح وفرحان وهي هم فرحانة ويحتفلون سوية. اللي يشرب عرگ خلي لا يشرب هاي الليلة حتى يكون باجر صاحي وجاهز للمباراة، وراها يسكر على كيفة. اللي عنده (دله قلي او مأبون) خلي اليوم بس يطلعه ويودي للسينما والمطعم ووينسه وباجر شيريد يسوي وياه يسوي، اللي عنده (دودة) ليخلي رَكّابه يسويله شي الليله، بس يطّلع يتعشى وياه وباجر من نغلب ينطي اللي يريده).
المرحوم حامد فوزي، حامي الهدف الشهير، گاله:هاي شنو سيدي، هذا شلون فريق؟ هاي كلها بفريقنا؟
اجابه عادل بشير لك والله انت تعرف زين هاي او اكثر، بس شسوي، ليش اني منطيني فريق مال طوبه؟ الاتحاد ناطيني فريق مال گواويد وفرخجية وعركجية وگحبجية وفروخ، ويگولولي نريد منك تجيبلنه الكاس!!!!..
رباط السالفة الاميركان ملعونين الوالدين جابولنه كل الفريق مال المرحوم عادل بشير وخلوهم بالحكم، والعراقيين يريدون منهم نزاهة وديمقراطية وبناء وتقدم وقيم اخلاقية واحترام لحقوق الانسان والى غير ذلك من متطلبات بناء الدولة وإدارتها!!.
وأني اضيف وأگول:
المفروض و حسب المنطق ان ما ننتظر خير من هؤلاء لاكثر من سبب:
اولا:أمرهم مو بأيديهم يشتغلون بالريموت كونترول من خارج الحدود وحسب أوامر و مصالح الملالي.
ثانيا: ما الهم اية صلة بالعراق والعراقيين.
ثالثا:واحدهم شعاره( جيب رجال يحط بالسكلة رگي) همهم الوحيد جمع المزيد من المال وطززز بالشعب عنده كهرباء ماعنده كهرباء عنده ماي صافي لو ماعنده هذه كلها كماليات وأمور بسيطة.
رابعا: واحدهم في وادٍ وكل الشعب في وادٍ اخر مايهمهم مايصير من انتشار المخدرات و مأساة التعليم والبطالة وغيرها!!.
المهم سلامتهم وعوائلهم وبعدين الشعب مايحتاج شىء وبدلالة نفوس العراق في تزايد!!.
لكن هذولي فعلا جهلة وما دارسين ولا عندهم دراية بالتأريخ والفلوس عامية عيونهم وعبالهم هذه الحالة تدوم الى النهاية ومافد يوم فكروا بقول الأمام علي/ كرم الله وجه:
لو دامت لغيرك ما وصلت اليك.
في أمان الله الى سالفة جديد اذا الباري انطانا عمر..و سلمتهم يا أم حسن!!.
أخوكم
رئيس التحرير
*قارش وارش: عبارة (تركية) تعني تشويش، اضطراب، ضوضاء، وهي عبارة للتحذير من التلاعب فنقول :
"لا تسوّي قارش وارش" ... بمعنى: أن لا تحاول خداعي والتمويه عليّ، وحرف الأشياء عن وجهتها الصحيحة.

• التالي >