محيسن لبلبان بالكِردي!!!

  

          محيسن لَبلَبان بالكِردي!!!

  

عجبي على أخوتي من العراقيين اللي واحدهم قضى سنوات طويلة بين أهله وناسه في مدن كوردستان وبالأخير ما تعلم غير كم كلمة بسيطة تكاد أن لاتذكر!!.

مع العلم هذا الموظف سواء كان طبيب أومهندس أوعسكري ... الخ يقضي معظم الأوقات مع أهالي المدينة وأحتكاكه مباشر وياهم بالشغل ، وحتى خارج الشغل و أيضا يلتقي سواء في الگهاوي أو النوادي في الليل لشرب حليب سباع والعشا كباب الشمال!!!.
ومن أحچي أگول هذا الأدعاء لي العديد من الشواهد و كنت على طول أنبه اللي أعرفهم وأگوللهم:
- يامعود يا أبو فلان شوكت تتعلم كم جملة كوردي؟؟.
ردودهم كلها متشابهة:
- بالحقيقة دأحاول شوية شوية وبالمناسبة قبل فترة أشتريت كتاب تعلم اللغة الكوردية و راح أبدأ أتعلم!!.
يمعود يا كتاب يابطيخ؟؟ أنت منذ سنوات و تعيد نفس الأسطوانة و ماتعلمت جملة واحدة بيها خير ومنطقي!!.
ماكو چارة مايريد يتعلم و أنتهى!! وبالمناسبة أكو هواية من أهلنا راحوا الى بلدان برة وهنالك تعلموا لغات عجيبة كالصينية و اليابانية وغيرها!!.
حالة غريبة خربت بيها من الضحك:
في وسط المدينة بالسليمانية هناك العشرات من بياعي الفشافيش( معلاگ و گلب و چلاوي و بيض غنم) قرب الگهاوي لو مطاعم صغيرة مختصة بهذا النوع من المشاوي.
أشهرهم بذاك الوكت (أحمد گوله - ئه حه ى گولي ) هذا الرجل منذ عقود و هذه شغلته وهو الأنظف وألأطيب لذلك تشوف عليه أزدحام من الفجر الى ماقبل الظهر والسبب كون يجيب المواد من المسلخ مباشرة وهذه تعتبر تازة ومرغوبة بكل المقاييس!.
بالثمانينات فد يوم وية أحد الأصدقاء تعنينا عند كاك أحمد نتريگ كم شيش من هالمشاوي.
واذا بأحد ألأخوة من موظفي احدى الدوائر(من الأخوة العرب) و وياه أثنين من أقربائه جايين يزوره.
من ملابسهم العربية العشائرية كانوا أكيد من أهالي جنوب الوطن!!.
الأخ المضيف اللي جاي وية أقربائه كان أسمه (محسن) وينادوا محيسن .
الأخ محيسن يريد أن يبين لأقربائه بأنه يعرف كوردي ويگدر يتفاهم ويه كاك أحمد.
هناك وبصوت عالي جدا ( محل كاك أحمد صغير وماكو داعي لترفع صوتك حتى يسمعك):
- كاكه .. جگر بينه .. يعني كاكه أنريد معلاگ و بالتأكيد كورديته بلكنه عربية جدا..
- كاكه ماسطاو بينه... كاكة جيبنه لبن..
- كاكه طماطة شويي بينه!!.
- كاكه خبز حار بينه
- كاكه بصل شوي بينه!!
- كاکه سماق بينه!.
الناس تتلفت هذا شبيه؟؟... وليش هالصياح من الصباحيات؟؟؟
ويه هالصياح الأخ (كاك أحمد) كان خربان من الضحك لأنه كان يعرف شنو القصد من هالصياح اللي مالها أي داعي غير عرض عضلات أمام أقربائه!!.
اني و صاحبي كنا بجوار الأخ محيسن و ضيوفه.. شفت علامات أرتياح على وجوههم وواحدهم يگول للأخر:
- شوف شوف وأسمع محيسن چنة بلبل بالكِردي!!
الأخر يرد عليه:
- أكيد چاشلون صارله تسع سنين هنا..؟؟ محيسن شاطر تعلم الكِردي بسرعة !!...اسمعه أسمعه عبالك واحد من أهل المدينة!!...خلي براحته !!.
المصيبة كلما يسمع محيسن هالأطراء يرفع صوته أكثر و يعيد نفس الجمل!!.
أحلى شىء الأخ محيسن نسى نفسه و عبالة بعده بالنادي ويه ضيوفه والدنيا ليل ،هناك وصاح بصوت عالي:
كاكة لبلبي بينه ..جاجيك بينه!!!!
مامالكت نفسي ضحكت ويه نفسي وگللتلة الصاحبي :
- الأخ محيسن صارله مايقارب العقد من الزمن هنا و ماتعلم غير كم مفردة وكلها متعلقة بالأكل و نصها غلط!!...والظاهر البارحة ضارب نص بطل حليب سباع وبعده دايخ  وما صاحي تمام وباله يم اللبلبي و الجاجيك!!.
أيدني صاحبي و گال:
- يامعود خلف الله على محيسن تعلم كم كلمة صدقني أكو قضى أكثر بهذه المدينة و ماتعلم غير:
خورما.. ماستاو ، نان ، و كوشت ، فرمو ، سرچاو ، چوني( تمر، لبن ، لحم ، تفضل ، على عيني ، شلونك) وغيرهن الف لاء!!.
أكلنا و طلعنا قبلهم والأخ محسين كان مستمر بصياحه لطلب المزيد من العوازة و الخبز الحار و الماسطاو!!.
أتمنى أن لايزعل أحدهم من صراحتي لكون كلها حقائق و كنت أتمنى العكس وبالمناسبة أكو من تعلم الكوردي و لكن بنسبة قليلة بحيث لا تذكر!!.
المهم تعلموا لو لاء هم أهلنة و ناسنة ولكن مجرد عتاب صغير... أقبلوها مني!!.
بالمقابل ومن غير (عنتريات) داعيكم أگدر أسمعكم (طور محمداوي) أحسن من فرج وهاب!!
ولو تناوشت الربابة وصحت( ياذيب ليش تعوي و حالك مثل حالي) لأكون أحسن من جبار عگار!!!.
أودعناكم عيوني الى سالوفة أخرى بأذن الله ..
أخوكم
رئيس التحرير

  

المتواجدون حاليا

1297 زائر، ولايوجد أعضاء داخل الموقع