الگاردينيا - مجلة ثقافية عامة - حكومة تكنوقراط برئاسة حساوي محترم ومو حرامي!!

حكومة تكنوقراط برئاسة حساوي محترم ومو حرامي!!

  

     حكومة التكنوقراط برئاسة حساوي محترم ومو حرامي!!

     

السلام عليكم يا الأعزاء
بالبداية خلونا أنشوف شنو تعريف التكنوقراط حسب الموسوعة الحرة:
التكنوقراطية أو التقنقراطية :
كلمة اصلها يوناني من كلمتين هما تِكني "فني وتقني" وكراتُس سلطة أوحكم
وباعتبارها شكلا من أشكال الحكومة، تعني حرفيا حكومة التقنية ويقال حكومة الكفاءآت وبناء على ذلك فإن الحكومة التكنوقراطية تتشكل من الطبقة العلمية الفنية المثقفة، وهي حكومة متخصصة في الاقتصاد والصناعة والتجارة، غالبا تكون غير حزبية فهي لا تهتم كثيرا بالفكر الحزبي والحوار السياسي..
خوش كلام.. يعني هسه عرفنا شنهو التكنوقراط وهذه مايرادلها روحة للقاضي ومع هذا أني و غيري متأكدين بأنه أكثر من نص أعضاء البرلمان ورؤساء الأحزاب ما يعرفون معنى هذا المصطلح مع ذلك أنمشيها وأمرنا لله تعالى..
أخوان عندنا مثل شعبي يگول:

أگعد أعوج بس أحچي عدل..
ألاخوان في المنطقة الخضراء (الله يقصر بأعمارهم جميعا) لايگعدون عدل ولا يحچون عدل واحدهم فيلسوف زمانة وهو أكبر زمال ، لا والله حشا الزمال لأن أبغداد كان الأسطاوات اللي يشتغلون بالدرابين الضيقة ( ماتدخللها عربانات وسيارات) كانوا يستخدمون نوع من الزمايل (حساوي) هذا أبيض وچبير چانوا مرة وحدة يگودون الحساوي الى مكان العمل ويهدوا هومن كيفه يرجع للسكلة يحملوا جص لوحصو يگوم أوتوماتيكيا يرجع الى موقع العمل من غير منا ومنا.. وهكذا النهار كله يشتغل بأنتظام وهو مرتاح الضمير وأمحلل خبزته!!.
يعني لوأنقارن الحساوي ويه جماعة المنطقة الخضراء ياهو منهم أذكى ؟؟ و أنفع للشعب؟؟.
أكيد وبلا مناقشة الحساوي كونه مجتهد ومخلص بعمله .. لايبوگك.. ولا يكذب .. ولا يعيش على حساب تجويع أهله وناسه والأهم مايخون!!.
لا وازيدكم من الشعر أبوذية!! :
الحساوي ما يتباهى ويگول ترة أني أحمل شهادة الدكتوراه بالجاجيك لو ماجستير بالفشافيش و كبة السراي!!.
يگول وبعلو صوته ياناس ترة أني زمااااال ، بس أحمل صفات مايحمله جماعة المنطقة الخضراء والأسباب ذكرناها..
أعزائي:
بالله عليكم بهذه الحالة الحساوي مو أحسن ويستحق وظيفة محترمة داخل المنطقة الخضراء؟؟؟.
يعني شيصير لو الأخ الحساوي يستلم وزارة العمل والشؤون الأجتماعية؟؟ لو النقل والمواصلات لو الهجرة والمهجرين ؟؟ لو السياحة لو حتى الثقافة والفنون؟؟، لو التجارة ؟؟ أو الكهرباء؟؟؟ اللي برأيي كل الناس أهم الوزارات لأنها مرتبطة أرتباط وثيق بمعيشة أهلنا وناسنا..
ياترى شراح يبوگ الأخ الحساوي غير چم باگة جت لو برسيم لوحشيش وهذه كلها بست دراهم وچم فلس مو أكثر..
وشراح تخسر الخزينة؟؟:
سيارات دفع رباعي؟؟ قصور؟؟ حمايات؟؟؟..أكيد الف لاء..
والمهم لأن الأخ الحساوي من الطبقة الكادحة كلش لذلك أكيد يشعر بمعاناة الفقراء و الكادحين والجياع و العاطلين عن العمل لذلك يسعى دوما لتلبية احتياجاتهم بأحسن حال بعكس كل الحرامية اللي أستلموا وزارات خدمية وغيرها وهناك عشرات الأمثلة واللي يقهرك كلهم عايدين لأحزاب دينية وأمربين لحايايا ولابسين كذا محبس بأصابعهم، وشايلين سبحة والنهار كله يحچون بالدين و المظلومية و حقوق البشر وحب الوطن!!.. وبالليل واحدهم يشوف الديك حمارا بسبب شرب المنكر و درزن شياشة تكة الدجاج والحم ومواعين اللبلبي والنومي حامض وجاجيك بالثوم!!.
أخوتي:
ما أعتقد أكو واحد يختلف على اللي ذكرناه فوگ... طيب لعد منهو يستلم رئاسة الوزراء ويجتمع بالأخوة الوزراء اللي كلهم زمايل؟؟.
أكيد لازم يفهم لغتهم ويصدرلهم أوامر و ينطيهم تعليمات لخدمة الشعب.
في الحقيقة أكو من يستاهل هذا المنصب ونؤكد لازم يكون مو من أي حزب كما قرينا في مفهوم التكنوقراط ولاسياسي بل لازم يكون فني و مهني..
بشارع الكفاح وحصرا بساحة السباع أكو زمال حساوي كلش چبير ومؤدب وشغول وشاطر ويحمل كل الصفات الحميدة وعنده شهادة حسن السلوك.. شنو رأيكم:أنكلفه يستلم رئاسة مجلس الوزراء ويخلصنا من هالشكولات الزفرة اللي نهبوا البلاد و ذلوا العباد وقسموا الوطن ونشروا الطائفية؟؟
مجردأقتراح وبس..
أودعناكم أغاتي..
رئيس التحرير

 

إذاعة وتلفزيون‏



الأبراج وتفسير الأحلام

المتواجدون حاليا

607 زائر، ولايوجد أعضاء داخل الموقع