الگاردينيا - مجلة ثقافية عامة - المضحك المبكي - المقلق واللامقلق في وصف المظاهرات المنبثقة.

المضحك المبكي - المقلق واللامقلق في وصف المظاهرات المنبثقة.

                                        

                    فارس حامد عبد الكريم

المضحك المبكي -المقلق واللامقلق في وصف المظاهرات المنبثقة.

الى فاسد السياسة 

اذا رأيت مظاهرات صاخبة قوية وأهازيج وردح والعكل تتطاير من كل حدب وصوب، وما يطالبون باية طلبات قوية ولا تعديل دستور ولادوخة راس .. ، لا تقلق ابداً. وأعلم انك امام تظاهرة لشيوخ الصدفة. بس دير بالك لاتزعلهم تره مينسوه إلك.. غديهم قوازي محشية وانطيهم ظروف من يرجعون... تره يكلبون عليك 190 درجة كلب الخضيري بشط. ولات ساعة مندم.

إذا رأيت مظاهرات سلمية قصيرة جميلة تفوح منها رائحة العطور الفرنسية ومامعروف شنو المطلوب بالضبط، لا تقلق ابداً،.فأعلم انك امام تظاهرات لربات البيوت، ضايجات وأم حمودي كالت ليش منسوي مظاهرات مثل الناس .. مثل العالم لازم يسمعون صوتنه.. لا تقلق ابداً، تره يفضهن بساعة لأن وراهن طبخ قبل ميجي الجهال من المدرسة.

اذا رأيت مظاهرة بيه جماعة كلما يخرج المتظاهر من طوره يغص ويختنق ... ، لا تقلق ابداً. وأعلم انك امام تظاهرة لكبار السن من المتقاعدين، وتفض بسرعة،. لازم يرجعون للبيت باخذون دواء السكر والضغط اللي صعدتوا الهم من يوم اجيتوا للحكم وما فكرتوا توفرلهم حياة تقاعدية آمنه ومضمونة صحيا وجسديا، وراتبه كله للطبيب الجشع السالكهم سلك، ولكن اذا رأيتهم مستمرين ولا يرجعون مبكرأ فقليل من القلق يكفيك لان ذولة صار عدهم خبرة من تجاهل مطالبهم وهل المرة جايبين علاليك الدواء وبطل ماي وياهم.

اذا رأيت مظاهرات جماعة لابسين قوط وأربطة ويطالبون بتحسين ظروف البحث العلمي والأكاديمي وطبعاً زيادة رواتبهم والمخصصات واستثنائهم من سن التقاعد، فأعلم انك امام تظاهرات للأساتذة،لا تقلق ابداً، لأن يوصلون لراس الشارع ويرجعون وراهم محاظرات وبحوث تخرج ورسائل دكتوراه وهاي الهم بيه اجور،والطلاب ينتظرون واغلبهم جايين من المحافظات،.
اذا رأيت منظمي مظاهرات فاشلة دائماً، يدعون لها الف واحد يجون بس عشرة ولو ميجون،لا تقلق ابداً، فأعلم انك امام تظاهرة للأطباء، لان عدهم عيادة وراء الدوام وعدهم التزامات ويه الصيدلية واصحاب المختبرات المتفقين وياهم على عمولة تعطيهم عمولة قاتلة، ويومية كالب من صيدلية ومختبر الى غيرهم، ينطون عمولة أكثر ويدفعون ايجار العيادة وسفرة للخارج هو وعائلته.
وهمه درسوا بالمجانية من الابتدائية للتخرج من كلية الطب والاقسام الداخلية وحصلو بعثات للخارج وتدريبا في ارقى مستشفيات لندن وبتكاليف باهظةعلى حساب اموال الشعب العراقي. وشايلين خشمهم عل العالم وهو ميدري ان جلهم لو مامولود بالعراق يحلم يصير طبيب دكتورا او ماجستير او حتى دبلوم أختصاص فتكاليفه الدراسة باهظة باهظة قد تصل احيانا الى 250 الف دولار. والعراقيين درسوا ابلاش من مدرسة القرية لكلية الطب وسلموا شهادة اختصاص عالي بالطب بالمجان، والافندي يسلك بيهم سلك.
وخطية هو هم حقه شنو يابه مظاهرات مصلحة المرضى أهم لان بيهم حالات طارئة واغلبهم بايت بالشارع ينتظر سراه وفوكاهه جاي من الجنوب لبغداد ويا نص عشيرته.
لأن انت كلش فاسد ومبنيت مستشفى ولو واحد متطور ألهم يغنيهم عن السفر والجشع المهني والمبيت امام عيادات الأطباء في بغداد وصارلك تحكم 16 سنة بأسمهم.

اذا شفت مظاهرات لها بداية وليس لها نهاية تلوح في الافق وكان هناك (تك تك) كثير ، والمتظاهرين كلهم شباب وميقبلون يتفاضون وياك إلا بتحقيق كامل المطالب دون نقص، ولازكيلك لزكة جونسون، وجلبت لك ولكل الفاسدين الهم والغم.
واستعنت بكل قوات الدولة الأمنية وغير الأمنية حته تفرقهم وهم ولايمهم ، غازك المسيل للدموع وغازاتك ولارصاصك.وكام يلعبون بالعبوات كرة قدم ...، ومالكيتله اي حل، لأن انت وبكل وقاحة مكلفت نفسك فد يوم تلتقي بالشباب قلب العراق النابض وأصل ديموته بين الامم وحاملي رسالته عبر التاريخ القديم والحديث، وتناقشهم عن طموحاتهم وتضع على الأقل الخطط اللازمة لتنفيذها، ومن يطلعون مظاهرات تتضمن خيرة خريجي الدكتوراه والماجستير وشكد تعبوا وسهروا الليالي لأنجازها ومن حصل واحدهم عليها كأنه كان في عرس، تجي انت تصلخهم بالمي الحار، وين اكو دولة بالعالم ولو في مجاهل افريقيا تصلخ علمائها الشباب بالماي الحار، شنو انتو، بعد ان اوغلت في سرقتهم وعينت حبابيك وكربايك في ارقى الوظائف العليا والدبلوماسية وناس تنطيه عدة رواتب عامي شامي وتنطي للأرملة اللي عده كومة ايتام 150 الف بالشهر ويومية موكفين الراتب على اساس تسون تدقيق. ايبا شكد حريصين على المال العام عندما يتعلق الأمر بأضعف فئة مقهوورة في المجتمع. فأنت جدير بكامل القلق، وأعلم انك في ساحة التحرير قلب بغداد الأبية ..
واذا كعدت الصبح وباوعت عليهم بالناظوروشفت الساحة فارغة تماماً من المتظاهرين ولافي حدا ولاتك تك موجود والمطعم التركي فارغ بس يلعب بي الهواء وحركة السير طبيعية وتنفست الصعداء فأعلم انك نايم وتحلم بس ممتغطي زين (مكشف).

الأبراج وتفسير الأحلام

المتواجدون حاليا

625 زائر، ولايوجد أعضاء داخل الموقع