الگاردينيا - مجلة ثقافية عامة - صارت سوالف !!!

صارت سوالف !!!

                                         

                         سيف الدين الألوسي

      


             صارت سوالف !!!

١- في أحد أيام نادي المنصور المجيدة ،، كنا مجموعة نجلس يوميا ويبدأ ميزنا بلربع نفرات وينتهي بعشرين نفر من كثرة الاصدقاء !!!
في احدى الشتويات اتى للجلوس ربع صديق وهو بعدنا بدورة بالكلية وابن ناس محترمين مصلاوية الجذور ولديهم املاك كثيرة وبيت وعمارة بالمنصور !! ومن القدماء ايضا !!
كنت في الثاني كلية والاخ في الاول وبعده لحيمي !! اجه وگعد ويانه ، وكنا مجموعة كبيرة گاعدين يم فاير بليس قاعة النادي ،، والميز مقبط انواع واشكال من اسكنجبيلات ومزات ونمنمات ،، والكل متونسين ومنطلقين وبتشكيلات على ارتفاع ثلاثين الف قدم فاكثر !!! اني حچيت نكتة كانت جديدة عن كلاوجي انثبرت الدنيا بيه ، وكونه اكتشف دواء للسرطان وسماه بكرين وصدامين !! وطبعا الاطباء والعلماء كالوا هذا كلاوچي ودجال ،، ولكن تم احتضانه من الدولة ، وكان يعمل تجاربه على الدجاج ،، وتم اخراج العديد من المختصين على التقاعد لكونهم تكلموا الحقيقة !!
ثم قبض المقسوم هذا الكلاوچي وفر الويل مثل بقية .... واللوگية والمنافقين !!
المهم اني حچيت النكته وارجو العذر من احبتي واخوتي واصدقائي على الراس الكورد الاصلاء ،، والمرحومين جلال الطالباني و د عبد القادر الطالباني ود نامق نادر وغيرهم من الكورد كانوا يرددوها للتصنيف وعلى الوضع ايضا !!
النكتة ،، هي: 
اجه كاكا وردة مرته بيها سرطان ،، سمع باسمه وراح للصيدلية وقال للصيدلي !
كاكا ، عندك بكرين ،، گاله لاع ما عندي ،،
عندك صدامين ،، همين ما عندي ،،
گاله ، ميخالف انطيني طه محي الدين !!
المهم ضحكنه جميعا ،،، وثاني يوم بالكلية دزوا علي بمكتب السكرتارية ،، والحمد لله كانوا من اصدقائي ،، فراووني التقرير المكتوب بقلم الرفيق النصير ابن الاوادم والخير وبتوقيعه !! واللي اني دفعت حسابه گبل يوم وكيف حچيت النكته !!! المهم طمطموها ولد الحلال !!
٢- انا كنت ممتاز جدا بثوماس كتاب الرياضيات والادڤانس ماثماتكس بالثالث وبالكهربائية والاوبتكس او البصريات ،، كان معنا في نفس الدورة رفيق اصلي ما اعرف شلون دخل علوم فيزياء ، لأن مخه مچبن من صدك ،، كان مسؤولا كبيرا وحزبيا مثل الگاروبة لا يعرف احدا غير مصلحته و في الكلية والجامعة ،، ثم ارسل للدكتوراه بعد تخرجنا في الذرة ليرجع يدرس ثقافة قومية ذرية !! لاحقا !! وعندما كان الربع الاول في جبهات القتال للاسف ! ،، يأخذون الدكتوراه من موقع ادنى !!
هذا الفطحل مال زمانه كان حاقدا على روحه !! وكنت ابذل جهودي لتدريسه ثوماس والماث المتقدم بالماتريسيز وغيرها وينجح بالدوب ،، وكل مرة يسألني انفنتي او ما لا نهاية. ،، وبقية الارقام ليش من نقسمها على صفر ، يطلع انفينتي !! ما اعرف شلون جاب دكتوراه من بولندا !!؟؟؟ وتعين استاذ لاحقا !!
المهم الاخ وبعد ان ساعدته كثيرا ،، هفني بتقرير كوني برجوازي وابن عائلة برجوازية وسترة زيه الموحد يجلبها من لندن وكذلك ملابسه ولديه سيارة ، دون مراعاة لقانون الزي الموحد والذي اقر للمساواة بين الطلاب !! وسترته بازرار مطلية ذهب !!!!!!!!!!!!!!!!!
همين وصلني الخبر من اصدقائي النجباء البعثيين وخللي يدير باله من هل ال !!!!
رحت كطعت دكم السترة وخليت دكم سود محلها ،، ورحت عليه وگتله ،، هايه الدكم اللي حرگتنا من وراها شدها على سترتك والف عافية ،، تره هايه صفر !! اخذها بدون مستحه !!
المهم الاخ فر ويله بعد حرب الكويت وراح الى ليبيا وحرگ ناس ولد خايبة هناك ،، ثم اعدم عدد من اقرباؤه ففر الى الجزائر ثم اوروبا ثم رجع مناضلا كان مضطهدا بايام النظام السابق وللعلم هو من الغربية كما يسموها !!! اليوم !!
اما ربعي في مكتب السكرتارية فتم فصلهم من الحزب ولاسباب عدة ،، ومنهم قربهم للمعدومين من القياديين المغضوب عليهم وكانوا يخدمون بالجيش معي ، فعوقبوا بابعد الوحدات ومنهم الكثير ومن فقد او اصيب بالحرب وفقد احد اطرافه ، او بقى مكابلني مثل فريد الاطرش وحسين رياض وعبد السلام النابلسي !!! ومن هؤلاء الاصدقاء الشرفاء الابطال بحق ، د خالد مطشر عمر الحديثي ، عبد الوهاب عبد الحميد الراوي ، عبد السلام الشيخلي ، وغيرهم ، كل المحبة لكم اخوتي واصدقائي بحق وانتم الفخر للعراق ولي ولكل اخوتكم واصدقاؤكم دوما .
تحياتي للجميع .

   

الأبراج وتفسير الأحلام

المتواجدون حاليا

353 زائر، ولايوجد أعضاء داخل الموقع