بمناسبة عيد الميلاد المجيد ورأس السنة الميلادية !! هكذا كنا

                                       

                       سيف الدين الألوسي

بمناسبة عيد الميلاد المجيد ورأس السنة الميلادية !! هكذا كنا...

  

    

اولا كل عام واهلنا واخوتنا الغاليين المسيحيين بالف الف خير اين ما كانوا .
في بغداد كانت كل اعياد اخوتي المسيحيين نحتفل بها وهم يحتفلون باعيادنا سوية .. وطيلة العمر الذي عشناه سوية .
كنا ثلاثة اصدقاء من الطفولة وجيران او بالاحرى اخوة ،، الشهيد وديع المثنو ونادر جورج نصرت وانا ،،، لا نفترق الا اثناء عودتنا للنوم ،،، نفس النادي ،، نفس الكلية ،، نفس الدراسة ،،، ندرس ونحضر ونذهب الى النادي ثم نسهر ، لنرجع الى بيوتنا ولاذهب عليهم الساعة ٧ صباحا للذهاب للدوام في الكلية !!! كنا السيارة التي تحمل ثلاثي اضواء الضحك صباحا ،، طريق الكلية وازدحام الجسر الحديدي وتكسيات الشهرة والسهرة لبنات الكليات!! وفيروز، والكشخه !! اربعة سنوات انا اسوق ، نادر العاطفي بجنبي ، وديع الله يرحمه وره نادر !!! نادر كان يتأخر بالحمام ويومية اتعارك وياه !! يسمع مودي بلوز وجگارة من صباحيات رب العباد بالحمام !!! وياخذه الواهس وينسه موعد الكلية ،،، وبعدين يطلع مستعجل ناسي شي !!! لو ناسي يخلي ريحة ، باكو روبان لو ارامز بلو !!
ويشبع نغط ونق مني وكفخات من وديع الكاعد خلفه وبالطريق كله !!، لأن تأخرنه على موعد بعض تكسيات الشهرة حاملة الحسناوات !!! في الاداب والادارة والاقتصاد والصيدلة !!!!!!!! والهندسة حتى ميزعلون !! اما بنات المستنصرية فليست هنالك مشكلة !!!!! ،،، البعض يسألنا ،، اكو واحد يروح للدوام خربان ضحك !!! بس انتوا !!!! ناصبين على الرايح والجاي !!!
كل عيد كرسمس نذهب انا ونادر ووديع لقداس العيد ، وكذلك في بعض ايام الاحد وفي ايام قداس عيد الفصح المجيد ليلة سبت النور وقبل احد القيامة ،، كنا نذهب الى كنيسة الكلدان في المنصور قرب عمارة اليرموك القديمة او مول بابل حاليا ،، طبعا الكثير من الحاضرين القداس اما اصدقاء واما جوارين ويعرفون انا ووديع مسلمين ولكن حقيقة والله الشاهد، لم يوجد هناك فرق بيننا ،،، الوحيد الذي لم يعرف بنا نحن مسلمين ،هو ابونا جبرائيل راع الكنيسة ،،، في احد قداسات عيد الميلاد ليلا ، كان هنالك طفل مع اهله ، جالسين بجنبنا في نفس المصطبة بآخر الكنيسة ،، هذا الطفل كان يأكل قطعة كبيرة من القمر الدين !!! وديع رحمه الله دنت نفسه مثل عبوسي !!! گاله انطيني شوية !!! مقبل الطفل !!!! خمطها وديع لوصلة القمر الدين واكلها ، وابونا جبرائيل يتلو القداس !! الكنيسة سنطه !!! الطفل يعيط ويبچي ،،، بابا ، ماما ،، كن هذا باق القمردينيايي ماليتي !!! وديع القمردينايه بحلگه واحنه خربانين من الضحك وكذلك اب وام الطفل !!!! ثبرها للامة الطفل ،، هسه نروح نجيبلك قمر الدين ونساتل ،بس اسكت !!! ماكو فايدة ،، صراخ وبجي !!! طردنا كلتنه ابونا جبرائيل والطفل واهله !!! اطلعوا بغه !!!!!
طلعنا وهوه عالي يگص گص ، والدنيا باردة ونحن نعتذر ونضحك ، ورحنه جبناله مارس يله سكت !!
بعد سنوات وعند اسواق نجاة واني بهدوم العرضات والبسطال ،ده اتسوگ للبيت ،طبك ابونا جبرائيل الله يرحمه بسيارته الكورونا ٨٠ الخضرة ، ونزل للاسواق ، وفد رزالة ناشفة لانني لم اعد اذهب للقداس من زمان !!! كانت واقفة الغالية ام ماجد جيران العمر وهي تضحك !!!!! وقالت له : ابونا هذا ابو عبد الله ابن دكتور فاروق الالوسي ، شعنده يجي للقداس !!!!!! بقينا نضحك ونسولف ونتذكر ،،،،

مليون رحمة عليك ابونا جبرائيل وطول العمر للسيدة الجيران الغالية جدا ام ماجد وكل المحبة لاهلنا المسيحين وكل اهل العراق أين ما كانوا وكل عام وانتم بالف خير .

    

  

إذاعة وتلفزيون‏



أفلام من الذاكرة

الأبراج وتفسير الأحلام

المتواجدون حاليا

614 زائر، ولايوجد أعضاء داخل الموقع