الگاردينيا - مجلة ثقافية عامة - سوالف بغدادية قديمة / مواقف كوميدية -٢

سوالف بغدادية قديمة / مواقف كوميدية -٢

                                                   

                         سيف الدين الألوسي

     


سوالف بغدادية قديمة / مواقف كوميدية ٢

       


١- النوم بالسطح روعة ،، وهواء نقي ،،، وانت مجطول دتعد نجوم ،، وهناك فد خفاش اثول نظره ٦/٦٠ ينلطش بوجك ،، لو تگعد الصبح وانت بعز النوم على قبلات الذبان ام الگرصة ،، ومثل قبلات هند رستم وناهد شريف !!
٢- وانت تصعد نفرات او تكسي قديم من طراز شوفر امبالا ١٩٥٤ او ١٩٥٧ او غيرها ،، ترى هنالك تحويرا لشركة اي سي ديلكو ،، الهورن صاير واير حار ، يطخه السايق ببودي السيارة البارد ،، يگوم يدك ،،، والسويج اختزل الى دگمة تشغيل ،، مرات تعطب !!! موجودة بصف الجداحة !! والقلايج مال الگير سايف، ينزل الكير من الثاني للثالث من يدوس السايق كلج !!!
٣- بالسينمات اذا الاخ گاعد وراك ،، الفيلم كله يطير لانك تباوع على الفيلم دقيقة ،، وتباوع على الاوخ ساعة ،، وتطلع من السينما صاير سينما ،، رگبتك صايره مثل بولبرن مجيم !!
٤- اروع شي من واحد طالع ويه صاحبته بالسيارة مالته ، وفاتح اغاني وموسيقى حبيات وفيروزيات ومطر خريفي ، وملتهي ،، وعينه مو على الشارع ،، ويفوت بمنهول مال مجاري مفتوح مال مدماك ،، وصاحبته ينرگع راسها بالجامة !!! ايا اثول !!!
٥- بنية بالكلية لابسه چعب عالي وگاعدة تعرض ازياء وتتمختر ،، وهناك تدوس غلط وينكسر الجعب ،، وتعثر مثل الثولة !!وتبقى تك وتك ،، خطية !!! انعل ابو الماركة مال القنادر !!!!!

         


٦- واحد مودي صاحبته لاكل تراثي ،، فشافيش وتكه ،، وهي لابسه زي موحد ، ثوب ابيض وتنورة رصاصي ،، ديكسر الطماطة الشوي ،، ويطفر مي الطماطة الشوي على هدومها !! ويصير الثوب مطكع والتنورة طگع زفر !! من .... بحظك !!
٧- ولي امر طالب رايح لاجتماع الاباء قبل نصف قرن ،، الاستاذ يگله شگد شايف زمايل مثل ابنك مطي مشايف ،، اكيد هسه المطي اموره ماشية !!
٨- واحد توه متزوج بايام زمان ،، ومرته مدللته ، ومسويتله بامية وتشريب وحكاكة ، وكبلها مشهيات لوبية مسلوگة ،، ويختنك بخيط اللوبية !! ويذبها براس المره !! ليش مسويه لوبيا ؟؟!!
٩- شاب تعبان على نفسه واكف سره على البيض ،، يجي رفيق لوگي لابس عسكري، ياخذ سراه ويخلص البيض ،، يرجع مخنوگ بالف عبرة !! لان جائزة نوبل اخذها الرفيق !!! يمكن هسه هو عضو بمجلس النواب لو مستشار !!!

    


١٠ - طلعتله بالقرعة وهو فرحان ولابس قاط ، و سيارة موسكوڤيج بلون ازرك كاروكي موديل ١٩٧٣ من الشركة ،، مضروبة شمع على اساس هي اوستن مارتن ،، ومن الشركة للغسل والتشحيم ،، ويفوت مي بالديلكو ، وتحرن مثل الزمال اللي عنده انسداد بالامعاء !!
١١- ماخذ خطيبته ديشتريلها دوندرمة ايس كريم اصلية ام البسكت ب ٣٠ فلس من فلكة الجندي المجهول القديم ( اوتيل الميريديان حاليا ) ،، وهي فرحانة ،، واول لطعه ،، توكع الدوندرمة جوه الثوب !! بس لا تنشل من البرد !!

   

   
١٢- مديرة مدرسة ابتدائية بالتربية ،، اشترت اوبل ١٩٥٩ من معرض السندباد بالكسرة سنة ١٩٧١ ، ب٣٥٠ دينار فقدي ، اي اقساط ،، بس طلعت من المعرض فاتت بفلكة البلاط ، المعاونات صلحوا السيارة !!
١٣- شگد حلو واحد ياخذ وحده سنونها ذهب !! كانه ماخذ جمهورية بريتوريا العنصرية !! سنون الذهب انقرضت من ايام ام غاتم مو غانم !!
تحياتي للجميع..

  

الأبراج وتفسير الأحلام

المتواجدون حاليا

379 زائر، ولايوجد أعضاء داخل الموقع