ذي فيو جيتيڤ !!!! أو الهارب !!! ابو مهيدي نموذجا !!

                                                     

                        سيف الدين الألوسي

        

ذي فيو جيتيڤ !!!أو الهارب !!! ابو مهيدي نموذجا !!

منذ زمن بعيد يقارب الستين عاما لا بل أكثر !! كان هنالك صبي قد تربى في بيت بيبيتي والدة والدي رحمهم تعالى الثلاثة ،،، هذا الشاب الصغير او الصبي كان مدللا للجميع و محبوبا من الجميع ،،، ،،، أسم هذا الشاب هو جواد ونحن نصيح له أبو مهيدي الورد !!وهو من اهالي الشطرة ، المدينة الجميلة العريقة .

توفاه تعالى قبل سنوات قليلة الف رحمة عليه وهو من مواليد ١٩٥٠ كما موجود بهوية الاحوال او اكثر والله اعلم !!
طبعا المرحوم جواد اتى طفلا واصبح واحدا من العائلة الكبيرة وبكل شئ ،، الكل يحبوه وهو يحب الجميع ،،، مرات تراه في بيت الخال المرحوم كمال المفتي ومرات في ،، بيت المرحوم الحبيب قيس المفتي زوج عمتي المرحومة المربية عفاف الالوسي وهو ابن خالتها ! ،، ومرات في بيت خالة والدي رحمها تعالى والدة الدبلوماسي القدير المرحوم عادل المفتي والمرحوم الغالي صباح المفتي والذي كانت معه المرحومة الحاجة أم عادل في بيته . انا متأثر جدا بأخوالي ال المفتي الكرام ولديهم معزة خاصة وذكريات لاتنسى عندي .. رحمهم تعالى للمتوفين واطال أعمار الاحياء والشباب منهم فهم نعم الفخر لنا .
نرجع على جواد رحمه الله وكان تجنيده بالشطرة ،، ولم يلبس عسكرية سوى ثلاثة أيام سنة ١٩٦٨ في مركز التدريب في العمارة ،، وفر من الجيش !!!
بقي فرار من سنة ١٩٦٨ وهو في بيت جدي ويتخفى للذهاب الى المواقع البديلة ليلا وبسيارات الاقارب ،،، عاش حرب تشرين وهو فرار ،، وحركات الشمال كما كانت تسمى سابقا وهو فرار ،، ملتهي يسوي ويلف كبة حلب وبتيته چاب وبورك ،، وحتى كبة حامض ،والتمن ينرادله بعد لحم لونها فاهي وهسه تعجن بالجدر !!!!! وهو نظيف جدا جدا ،، ومگابل بنت الحته ويلف كبة ولا كأنه فرار ومطلوب للانضباط العسكري ،، واحنه مچنه نگدر نتأخر عشر دقايق لنتبهذل !!! طبعا كان يطبخ اكل ممتاز ايضا وهو نظيف جدا ودشاشته البازة تبرج برج ،، ولم اراه في يوم لابس بنطرون او ثوب ،، بالشته دشداشة وچاكيت صوف نظيف ولديه تشكيلة من الدشاديش والجاكيتات والبلوزات وبمختلف الالوان والاشكال !!! وكل من يسافر ،، اول هدية وملابس تكون لجواد ،، الابن المدلل للعائلة وحسب طلبه .
المهم المرحوم جواد كضه السبيعينيات فرار ،، وطبعا حافظ شكو مسلسلات مصرية وعراقية وافلام مصرية وهندية ،،، ومن يطلع فيلم مصري شوف عيني سيفي ،، هسه عماد حمدي يطلگها لفاتن حمامة ! واذا ميطلگها اني كلشي ما افتهم !! وردة مال الله !!
بدأت الحرب العراقية الايرانية ،، وصارت الحديدة حارة ،، وتم دعوة مواليد ١٩٥٠ وجواد لا يزال فرار !!! ،بس قلل الطلعات وأنغمس في گعدة البيت وعمل مشاكل بين النسوان ،، وفلانه ليش محبلت وصار عدها بزرة !!! مو صار سنتين من اتزوجت !!! وفلان كسر عين السوگ وتزوج هايه النمونة ،، تخنخن وسنونها مفارگه !!!! ومن هايه السوالف !!!وبقه يتنقل ليلا بين بيوت الاقارب للاختفاء ، وبعد الفاو ذهب للسكن عند بيت ضابط كبير من اقاربنا رحمه تعالى هو المرحوم اللواء أ ن ، لان الحديدة اصبحت حارة جدا !!، وحيث لا احد يتوقع وجود فرار في بيت ضابط كبير ومن يطلع لمرات قليلة يخرج معه ليلا وبسيارته !!!! ((( ملك الغش والتمويه گولت العسكر !!!! )))) .
خلصت حرب ايران وجواد فرار ،، وبدت حرب الكويت وجواد فرار وصارت الهوسة ،،، واحترگت التجانيد وتم صدور عفو شامل للهاربين !!!! ابو مهيدي مچذب خبر وراح للشطرة وتسرح حسب الاصول !!! الف رحمة عليه . واخذ يهلهل ويطش ويهليه بمناسبة تسريحه !! ولديه هلهولة لا تجاريه فيها اي سيدة بغدادية ،، !! وخصوصا في الافراح والاعراس ومن يگعد يعيب على العروس !!! دباعها شلون ماخذه بوشه للعريس !!! من خفت ،، چنها جني !!!!!.
بقيت التقي معه في بيت عمتي واتشاقه وياه ،، ولحين الوقت اللي صار فيه طشارنه ماله والي بعد ٢٠٠٦ ،،، وهو كبر واصيب بعدة امراض ومنها المفاصل ولكنه بقي وفيا محبا لاهله الذين عاش معهم طيلة نصف قرن تقريبا وهم كذلك كانوا محبين له ويعتبروه احد ابناؤهم وافراد اسرهم ،، وللصدفة ان جواد وخمسة من الذين احببهم واحبوه وعاش معهم قد توفوا في نفس العام او في فترات متقاربة قبل سنتين !!!!!!! وسبحان الله .
جواد رحمه الله لم يتزوج ،، لأنه كان يصرف على أيتام شقيقته واقاربه وكل راتبه يوزعه عليهم ،،
الف رحمة عليك ابو مهيدي الوفي الاصيل وعلى كل الاحباب الغاليين الذين غادرونا .
اعتقد من قصة ابو مهيدي تم تأليف واخراج مسلسل الهارب ذي فيوجيتيڤ لديڤيد جانسون والفيلم ايضا لهاريسون فورد والاثنين جوي لبغداد معايشة يمه حتى يعيشون الحدث !!!
شخصيات لا تتكرر من الزمن الجميل وسيبقون في الذكرى الجميلة ..
تحياتي للجميع .

  

إذاعة وتلفزيون‏



أفلام من الذاكرة

الأبراج وتفسير الأحلام

المتواجدون حاليا

741 زائر، ولايوجد أعضاء داخل الموقع