الگاردينيا - مجلة ثقافية عامة - ياناس، عرموطة أم سن الذهب راح تفلس و بعدين وين تنطي وجهها؟؟؟

ياناس، عرموطة أم سن الذهب راح تفلس و بعدين وين تنطي وجهها؟؟؟

            

يا ناس ، عرموطة أم سن الذهب راح تفلس و بعدين وين تنطي وجهها؟؟؟

گبل ما أدخل بتفاصيل حكايتي لابد من الأعتذار للأخوة القراء على بعض العبارات ولكن لابد منها وذلك انطلاقاً من نظرية للضرورة أحكام .

إذا أتفقنا ... و اتمنى ان يفهم القراء قصدي ، فقصدي شريف والله أعلم!!.
بالأربعينيات من القرن الماضي و بمحلة الميدان وبالتحديد بالكلچية، وهذه المنطقة كانت سمعتها سيئة كودن بيها بيوت دعارة ومواخير للرايح والجاي (اجلكم الله ) .
واحدة من تلك البيوت كانت تديرها (عرموطة العورة أم سن الذهب) وكانت كارثة بكل المعاني ، سليطة اللسان و تتمالخ وية الزبائن وكلمتها ما تصير أثنين لا واكثر من هذه حتى افراد الشرطة كانت تتجنبها لأنها عندها واسطة وكذا مأمور مركز وياها بالحق والباطل.
ياترى بعد منو يگدر يندگ بتيلها؟؟؟.
راحت أيام وأجت أيام عرموطة يوم ورا يوم تقل الزبائن على بيتها ، ترى بناتها كل وحدة حاطة ايدها على خدها وتنتظر المقسوم لكن لامقسوم ولا زبائن!!.
عرموطة العورة شاطرة ولازم تفكر و تلگه چارة بهالركود الأقتصادي بالسوك ، لابد أكو سبب وبعدين ماكو شىء ما الها چارة!!.
سألت و تشاورت مع (ذوي الأختاص و التكنوقراط!!) بالمهنة و كل واحد ينطي رأي:
- عرموطة بدلي أسلوبچ ترة التهديد والصياح والعراك تبعد المشترية!!.
- اسعارچ غالية شوية حسقليها ترة تبقين هيج!!.
- بدلي (الچربايات) وحدتهن صارلها قرن مو كافي عاد!!.
- خليلج شوية زرع و زهور بباحة البيت حتى الزبون يشعر بأرتياح أول ما يدخل بيتج!!.
- اصبغي البيت ، اشو الحياطين ما ينعرف الوانها عبالك خرابة.
- حسني علاقاتچ وية زميلاتچ بالعمل، شنو انتِ مختار المحلة لو شنو؟؟.
- كافي تتباهين بعلاقاتچ القوية وية الشرطة ترة هالعلاقات ما تفيد ، ترة كلهن عندهن علاقات بس ليجوة جوة مو مثلچ تعلنها للكل!.
- رتبي مظهرج شوية دشاديش ملونة و حطي شگد ما عندچ من ذهب حتى تبينين وحدة مليانة و مع ذلك انسانة بسيطة!.
- خليلج واحد يقدم (نامليت)* لو چاي لو حامض للزبائن كلها ما تكلف چم فلس مو أكثر!.
- وعشرات النصائح الأخرى !.
لكن أشو عرموطة اقتنعت أن تختار نصيحة تبديل ( الچربايات) فعلا صارن قديمات وأستهلكن وأكثر من زبون انطاها هالملاحظة!!.
ماقصرت وگبل الى سوگ هرج القريب منها وعند أقرب واحد واللي يعرفها كلش زين وهو هم واحد من زبائنها لكن هو الأخر هم أبتعد عنها وماگامت تشوفه من أشهر.
بعد السلام والتحية وشرب استكان چاي جرى بيناتهم الحوار التالي:
- خير عرموطة اشو اليوم هنا.. أشعجب؟؟.
= بالحقيقة الشغل الفاتر جبرني اجيك اريد هم أستشيرك بصفتك كنت زبون دائمي وهم اريد اشتري كم چرباية كودن چرباياتي صارن عتك واعتقد هذا هو سبب قلة الشغل هالأيام.
- والچربايات شلها علاقة بشغلچ؟؟.
= شلون عيوني مالها علاقة، لاء دادة لاء أني اگول هو السبب!.
- شوفي عرموطة الزبون ماتهمه الچرباية برأيي اكو سبب مهم كل زبون يشعر به وأولهم أني.
= گولها فدوة هالحلگ..بسرعة نورني!.
- برأيي لا تتعبين ولا تفكرين بكلشي ، فقط بدلي البنات اللي عندچ ، أطرديهن وجيبي أخريات شوفي شلون شغلچ يتحرك وترجعين مثل أيام زمان ، وحتى هذا اللي يدير البنات أبو العرقجين ( اللي شايف روحة هواية وعنده ظهر!)هم لازم تبدلي ترة لايقدم ولا يأخر!!.
= لا عاب هاحلگ، فعلا اني غبية والله كلامك من ذهب، مع ذلك هم راح ارتب البيت شوية ومن عين باچر راح اتشوف التغييرو بالمناسبة شرفنا وشوف الفرق!!.
نصيحة صاحب محل العتيگ بسوگ هرچ كانت بمكانها كودن التغيير بالوجوه مو بالمكان والترگيع منا ومنا لابد ان يكون التغيير شلع قلع ولا ماكو فائدة يا خلگ الله.
لو مو عرموطة تشغل مخها وتستشير كان حالها نفس الحال لاوالله اتعس و الحر تكفيه اشارة، تمام كلامي لو لاء!!.
مع ذلك عرموطة غبية ونص لأنه كل اللي تسويها ترقيع والله اذا هجم الشباب ما راح يخلولها أثر وبعدين حتى أبو مأمور المركز ما يلحگلها!!...شلع قلع والى جهنم عرموطة و بناتها واللي يشتغلون عندها!!.
حتى شوية نرسم ابتسامة على وجوه القراء الكرام ، سمعت هذه النكتة المفرحة والمحزنة:
سكران يشتري عرگ بالدين و مايسدد الديون!.
البياع گاله: يا ويلك شلون حساب راح تتحاسب يوم القيامة؟؟!.
السكران رد عليه:اذا انت زلمة افتح الموضوع هناك!!.
رباط النكتة:
أخاف يوم القيامة من نشتكي على عملاء ايران ( جماعة عرموطة العورة) اللي حكموا العراق يجينه الرد:
أنتم انتخبتوهم.. تمام لولاء!!؟؟.
* نامليت:نوع من المشروب (عصير) كانت موجودة في تلك السنوات.
الى اللقاء في حلقة جديدة وأودعناكم عيوني.
أخوكم
رئيس التحرير

         

    

إذاعة وتلفزيون‏



الأبراج وتفسير الأحلام

المتواجدون حاليا

435 زائر، ولايوجد أعضاء داخل الموقع