لدينا شهادات جامعية و بمختلف الأختصاصات وأسعارنا مقبولة!!

           

 لدينا شهادات جامعية و بمختلف الأختصاصات وأسعارنا مقبولة!!

سمعنا هواية عن سوگ مريدي ، هذا السوك العجيب الذي فيه كلشي وكلاشي من السمچ والدجاج وبط الأهوار الى اللبن والخضراوات والفواكه وانواع الحلاوة ومختلف انواع الأسلحة الخفيفة والمتوسطة ،عدى الرمانات وقاذفات ضد الدروع الى العگل و اليشماغ والديرم والكحل والحمرة وبدلات العرايس و المشروبات المحلية الى ماركات عالمية (مزورة) من عطور و ملابس و ساعات .. بأختصار هناك ممكن تلگه حتى حليب العصفور!!.

أما اهم شىء اللي خلى هذا السوگ يشتهر فهو تزوير الشهادات لكل الدراسات الجامعية والدراسات العليا من ماجستير وانت صاعد ولكن كلشي بسعره، مثلا:
- شهادة البكالوريوس أرخص من شهادة الماجستير.
شهادة الدكتوراه أرخص من شهادة لقب الأستاذية أو البروفيسور .. وهكذا!!.
- أما شهادة الدبلوم (دگلوم على حد تعبيرهم!!) والأعدادية فهذه أرخص من بقية المراحل و ألأختصاصات!!.
وهذه الشغلة أولا بيه خوش محصول لهذه العصابة وثانيا يزورون الشهادة كأنما أصلية ومايمكن تختلف عن الحكومية إلا عندما تدقق الشهادة و يبحثون عنها حينها تبين المزورة عن الأصلية!!.
زيارة رئيس الجامعة:
أحد اصدقائنا المقربين كلش قرر أن يعرف الكثير عن هذه الجامعة ويدخل تفاصيلها .
هذه مهمة مو سهلة لابل كلش صعبة وتقريبا مستحيلة لكون هذه الزمرة (جامعة مريدي) مايسمحون لأي شخص يتقرب منهم ويعرف تفاصيل وضعهم و يتعرف عليهم بتاتاً.
تريد شهادة ؟؟.
طيب أدفع المقسوم وبعد ساعات تستلم الشهادة اللي تريدها أنشاءالله بروفيسور في مجال الطاقة الذرية!!.
شهادة مرتبة وموقعة ومختومة ومصدقة من التعليم العالي والخارجية ومترجمة وجاهزة ما ممكن يشك بيها احد ، روح اخوية تعين بوزارات الحكومة وادعي للأخوة طاقم جامعة مريدي والف عافية!!.
بعد جهد جهيد عرف احد دلاليهم اللي كان يعرفه من هو صغير ومن حسن حظه انه رئيس الجامعة يقربله كلش ، ترجا أن يعرفه عليه فقط من باب الفضول لاغير والأهم حتى يهني و يباركله على هالخدمات اللي يقدمها للناس و بصايتهم مئات العراقيين تعينوا وأستلموا مناصب حساسة وواحدم مايعرف الچك من البوك!!.
ورا أكثر من موعد (بعد أن نبهه على عدم التصوير ولا حتى مايصير يجيب وياه تلفونه النقال) أخذه وياه ودخلوا احدى القطاعات بمدينة الصدر( مدينة الثورة سابقا وبعدها مدينة صدام!!) ودخلوا بيت متواضع كلش شاف بالحوش مولدة چبيرة نوعما ، و دخلوا لغرفة بيها چم ميز وعدد من اجهزة الحاسوب و أوراق و كارتون و أحبار ، كأنما دخل على محل للقرطاسية و الأستنساخ ....
داخل هذه الغرفة اكو غرفة اخرى أصغر گاعد رجل بعمر السبعين سنة لو أقل شوية، عگال و يشماغ مرتب وصابغ شواربه و لحية خفيفة وساعة ذهب وأكثر من محبس بأصابعه ولازم بيده سبحه طويلة يدرم ويه روحه!!.
الغرفة رطبة وجدرانه محد يعرف لونها ، الشخص الگاعد ( زاير جخيور) أثاري هو رئيس الجامعة!!.
هناك أكثر من صورة للأمة وايات قرآنية ولكن اللي جلب نظر صاحبنا بيت من الشعر ورا الأستاذ رئيس الجامعة:
شهاداتنا محترمة ومصدقة و معترفة و أبداً مو تزوير
خذلك وحدة وانشاءالله انشوفك باچر برلماني لو وزير
بعد الترحاب و الملگه الحلو بدأ الأستاذ رئيس الجامعة يشرح لصديقنا مهمات و اعمال جامعته وهو واثق كلش من كلامه.
- شوف وليدي بيش تريد أحلفلك اغلبية السادة المسعولين(المسؤلين) خذوا شهاداتهم من عندي و دتشوف واحدهم صار سياسي و صاحب منصب ومثل ما تشوف الحكومة والبرلمان شغلهم ماشي و ماعندهم اية مشاكل وهذه كلها بفضل شهاداتنا!!، وأزيدك من الشعر بيت ترة اللي يصدرون ويترجمون كلهم خريجين جامعات من صدگ ما تخرجوا من عدنا ، چا شلون الشغلة تحتاج أختصاص بالمعرفة والترجمة!!واحنة ما مقصرين وياهم واحدهم راتبه كومة دولارات!!.
اللي اخذوا شهاداتهم من عدنا بعد سنوات بالحكم صارت عندهم خبرة كلمن بأختصاصة ، والمشكلة كل هالخدمات و يعيبون على شهاداتنا!!؟؟... وكليك ابو الجوادين شهاداتنا أحسن من شهادات لندن وباريس!!.
ترة عمك مو بس ينطي شهايد!! ، لا أسويلك أكبر هوية لكل الوزارات أنشاء الله تريدها برتبة فريق ركن لو أستاذ بأكبر جامعة عراقية لو مدير عام لو دكتور و مهندس و محامي ، بيك خير وأدلل ، انا حچولي عنك انت خوش ادامي وبن حمولة وإلا ترة محد يدخل حرم جامعتنا !! شدگول أنسويلك شهادة حتى تتعين ، لاتخاف ما ناخذ منك ولا دينار!!... جيبنة چايات وليدي وأخاف صاحبك ما متريگ ترة الدنيا بخير وكلشي واجد!!.
بين فترة واخرى يدخل احد الشباب ويطلب ختم معين من رئيس الجامعة.
وهو بكل حرفية يناوشه الختم مع توصية في كل مرة:
- دير بالك وليدي لا تستعجل و تعبكم يروح ابلاش ، تأكد من الختم وبعدما تختم و تخلص رجعلي الختم وبالتوفيق انشاءالله.
طيلة العشر دقايق اللي كان في حضرة البروفيسور جخيور ، أي رئيس الجامعة ،صاحبنا دايخ ومسطور وماصدگ اللي يسمعه!!.
معقولة الدكتور الفلاني اللي بفلان وزارة لو بأماكن اخرى ماخذ شهادته من بروفيسور جخيور!!؟
والله كلشي جايز ليش لاء؟؟؟!!.
في الحقيقة كلما أسمع تصريحات قسم من الأخوة (المسعولين) بالتلفزيون أشك انهم فعلا أصحاب شهادات وخبرة واحدهم مايعرف شيگول ،بس يريد يخلص من أسئلة المذيع و بعد توبة يعيدها!!

أحد البرلمانين حلف مية أمام أنه أكو برلمانين لحد آلآن ما فكوا حلوگهم ونطقوا بجملة واحدة طيلة السنوات الماضية!!.
شكولاتهم الزفرة مايدل على انهم اصحاب اختصاصات لأن الأختصاص يحدده البروفيسور جخيور بعد أن أصبح صاحب خبرة و يقدم النصايح للشهادات والمناصب اللي بيها خوش خبزة!!.
كل هذا و هناك من يگول أكو أمل بأنه خلال سنوات و ترجع العافية لكل الدوائر الحكومية كل هذا بفضل الأخوة المسعولين حملة الشهادات العليا!!!.
الغريب بالأمر هذولة واحدهم يتصرف وكأنه فعلا أكاديمي و ودكتوراه في المجال الفلاني لذلك يزعل اذا ما تناديه بالدكتور أو بروفيسور.
النه الله ومانعرف شلون راح تصفى؟؟
الى اللقاء في ( جخيور) أخر ، عذراً قصدي في حلقة أخرى و في أمان الله .
أخوكم / رئيس التحرير

           

        

المتواجدون حاليا

638 زائر، ولايوجد أعضاء داخل الموقع