ستالين يعود الى مسقط رأس اجداده في مدينة عفج!!

       

ستالين يعود الى مسقط رأس اجداده في مدينة عفج!!

  

حتى لو يزعل على بعضهم ويبطل يقرأ كتاباتي المتواضعة أگول:
فلا أكو شعب على الكرة الأرضية متقلب و مزاجي و متلون مثل الشعب العراقي!!.
الله يرحمك يا الدكتور علي الوردي اللي ماقصرت في قول الحقيقة  في هذا المجال و فعلا كلامكم صحيح مية بالمية!!.
في التأريخ اللي مو كلش قديم:
خلولك الزعيم عبدالكريم قاسم من الصحابة الأوائل ، شلون؟؟:
- واحد يصعد للسطح ويصيح:
الله أكبر يا جماعة شوفوا صورة الزعيم بالگمر!!.
الجيران يگولون يا معود وينها الصورة؟؟
يرد عليهم :اخوان شنو واحدكم أعمى؟؟ ما دتشوفون الزعيم بالگمر وهو يبتسم؟؟
والأخر يحلف بكل المقدسات ويگول:
البارحة أمي دتخبز وهناك طلعت گرصة من التنور لانه صورة الزعيم بنص الگرصة وهذه شفتها شوفة عين ومحد گالي ، معقولة أچذب عيوني؟!!.
من أنكتل الزعيم ولا واحد تأسف عليه علناً!!.
النوب اجه المشير عبدالسلام عارف ، هو بس:
-عمي الحاج المشير ماكو مثله والنبي ليسويلنا البلد جنة ، الزعيم كان بس حچي!!.
وبعد ما مات بحادثة الطيارة الكل ادگول: صعد لحم ونزل فحم ،يا معودين هم زين مات!!.
وعلى هالرنة طحينج ناعم والى اليوم!!.
بعد احتلال العراق شفنا العجايب و الغرايب من العراقيين والله الواحد يخجل يذكرهن، من الزيتوني و مسدس طارق نمرة تسعة وشوارب ثمانية شباط ودرجات حزبية وأمتيازات الى رجل دين وعمامة طولها عشرة أمتار ودرزن محابس و لحية خفيفة والله وياك عبوسي! ..والأمثلة كثيرة (عدى الأحزاب الدينية الحالية اللي كان أكثريتهم بعثيين وبمختلف الدرجات الحزبية وصولا الى عضو قيادي) .. مثلا:
الحزب الشيوعي العراقي/ بالرغم من شعاراتهم الرنانة لكنهم صاروا ضمن مجلس الحكم ومثلهم الرفيق سكرتير الحزب وهو فرحان أوووي ضمن الأخوة اللي كان يترأسهم بريمر!! ، ماشفنا دور يذكر لهم وما شفنا مسؤول چبير من الحزب المذكور ولا مقاعد بالبرلمان ، مع العلم هم ناس خوش اوادم و كلامهم حلو كلها(بلوروتاريا ، ورأس مال كارل ماركس والرفيق فهد و سلام عادل و حسن سريع و مقلب - حسنة ملص و عباس بيزة وصوت العرب -  و معتقل نكرة السلمان والدياليكتيكية و منجل ومطرقة وتي شيرتات حمر ومظاهرات وجمع تواقيع  و هروب معتقلي سجن الحلة ...  واستلم حسابك من دبش!!)... هذه تحدث فقط في عراقنا الديمقراطي !.
ناس مسالمين وهذه حقيقة ما تقبل اي نقاش ولا سمعنا واحد منهم نهب أو سلب أو تعدى على الناس رغم جماهيرهم في العراق!!.
هواية ناس يتهموهم بالملحدين و مايخافون الله وموالين لروسيا والبلاشفة و لينين وستالين و القائمة أتطول !! الغريب بالأمر العراقيين مايطيقون أسم ولا شكل ستالين!! ياترى ليش؟؟.
*ياهو؟؟!! ستالين؟؟ كان أكبر دكتاتور ذبح العالم والبقية نفاهم الى سيبريا ماتوا من الجوع والبرد!!.
وألأخر يرد عليه:
*لا وچماله ملحد مايعترف بأي شىء يخص الخالق ويوميا يشرب تنكة فودگا وكل ليلة يتزوج وحدة!!.
*عمي موبس هاي كل ليلة اذا مايكتل كم معارض بمسدسه الشخص ماينام!!.
وعشرات التهم الباطلة من غير اثباتات!!.
ياجماعة الخير:
تعالوا أنجرب و نعلنها أنه ستالين محنط ولكن بقدرة قادر أحتيا وجا للعراق حتى يعدل الأمور وبظهره جيش حديدي بالألاف!!.
أسمه / جوزيف فيساريو ستالين ، مولود في جورجيا سنة 1878 و مات في الخامس من اذار 1953.
خلونا أنشوف العراقيين شيگولون:
الكورد: كاكه هذا أصله كوردي مولود في جبال جورجيا بمدينة غوري ، هذه المدينة كوردية وأسمها (قوري) كونهم  يشربون هواية چاي وإلأ أسم المدينة مو غوري ، يعني بالقاف مو بالغين! ، وهومن عائلة كوردية أزيديه وهذا الله جابه والعظيم راح يحقق كل اللي ابالنا... وراح يصير نفط الشعب للشعب وكل مواطن يستلم المقسوم الشهري من الأرباح بحساب خاص بالبنوك!!!.
ياالله ياشباب جيبوا طبل وزرنا واطلعوا للشوارع وأهتفوا بحياة كاكه ستالين!!.
تبدأ الأحتفالات كل يوم بحيث كل الدوائر تعزل والمدارس والجامعات تنغلق ، يا دراسة كاكه المهم وجود كاكه ستالين.. يايابة شلون خبر و ..دگ عيني دگ!!.
وهر بزي كاكه ستالين...
عامة الشعب: تلت ارباع العراقيين يصيرون شيوعيين بعد ما كانوا اعضاء في حزب الدعوة و قبلها كانوا بعثيين ، احتفالات ومزيقا ورقص بالشوارع لأيام وأيام وصور ستالين تارسة الشوارع ومن يمهم بدلوا أسماء الشوارع والمتنزهات بأسمه وحاطوا تمثال چبير بساحة الغريري بشارع الرشيد بمكان تمثال الزعيم قاسم!!.
الشيعة: عمي هذا أبن عمنا ، جده (اسطة ستار) الله يرحمه چان رگاع بديرة عفچ وهناك الأوادم كلها حفاي شال وسافر الى جورجيا وهناك أنفتحت بوجه و خلف ابو ستالين( فيساريونوفتيش) وتدرون حتى اتيه عالعالم بدل أسمه و سمى ابنه(ابو ستالين بأسم جورجي) وهوغير أسمه من ستار الى ستالين وبعدين اجه (جوزيف ، يوسف) ولكن الواحد يحجيها لله لا الجد ولا ألأبو نسوا مسقط راسهم ،يگولك الجد گبل ما يموت وصى أبنه وگاله:
وليدي دير بالك تنسى العمام بالعراق تره يجي يوم ويحتاجونك .. أنت ابن عشيرة چبيرة وأهلك هناك !!.
داخل مبنى البرلمان: رشق بالقنادر و النعل و قناني الماي و تكافش و جر وسحل من الشعر بحيث الحجاب والفوطات طايرات بالهواء وأكثرية البرلمانيات خرجن من القاعة حافيات و دشاديشهن أمشگگات عالأخر!!.
كل وحدة أدگول (ستالين) بن عمي وراح يزورنا للبيت و يتعرف على أفراد العشيرة وعلى عنادچن!!.
وهناك ناس أكثر نفاقا ، رأسا يسوله شجرة ويرجعوا الى بيت رسول الله(ص) وأكو من يحلف بكل الأئئمة أنه سيد وجده الچبير چان لابس عمامة سودة وأيام عاشوراء آلآف الحناجر تهتف بحياته و كل سنة يذبح مئات البعران والخرفان وجدورة التمن والقيمة والهريسة تمتد لمسافات ماأدري چم متر! و عنده مؤلفات ترس لوري دبل أكسل!! ...  وها أخوتي هااااااااااااا
شباب العراق سنة و شيعة : على الأطلاق الجميع ربوا شوارب و فتلوها بشكل شوارب الرفيق ستالين ، خو البلوزات الحمر تارسة البلد من تمشي بالشارع ماتشوف غير اللون الأحمر يگولك حتى ألأسفلت صبغوها باللون الأحمر والمنطقة الخضراء سموها المنطقة الحمراء و ساحة التحرير تحولت الى ساحة الرفيق ستالين و بدلوا حتى اسم حديقة الأمة و ساحة الأحتفالات و برج صدام و مطار بغداد الدولي!!.
والأهم هذنيج الأيام االمئات ، لاوالله الألأأف من المولودين سموهم ستالين ، لا وحتى مدينة الصدر بدلوا أسمها الى مدينة ستالين و مدينة الطب الى مدينة ستالين الطبية  و ملعب الشعب الى ملعب ستالين الدولي!!.
العشاير بيناتهم وصلت الى استعمال الأسلحة الثقيلة ( رباعيات و دوشكات و هاونات) كل عشيرة أدگول ستالين منا وبينا ياويل اللي يكذبنا!!.
أكو عشاير خيطوله أحسن العبي بكربلاء و النجف لا وحتى حضروله أرقى أنواع العگل و اليشماغات الأصلية!!.
يگولك (الرفيغ ستالين!) شاعر شعبي محترم حافظ آلآف الأبيات من الدارمي و الأبوذية وعليه صوت يخبل يا حضيري يا داخل حسن؟؟!!.
ياجماعة الخير:
وهاي شتخليلها وأطيب؟؟.
من ملحد وكافر وسكير وقاتل ، الى حفيد رسول الله وعادل ويحب السلم ويطالب بحرية الشعوب وشاعر ومنظم أبوذيات ودارمي و صوته أحلى من أصوات أشهر مطربي الريف! ؟؟
وحق الحق حتى لو يجي أبليس هم يسوله شجرة ويرجعوا الى آل البيت و يصلون ورا!!.
وبالنهاية أگول:
لو جانه ازياره (استالين) - نوگف وانصف ابسافين
نهتف وانصـَـفـّـگ ترحيب - نگـطـَـه اوطاحـَـت من اجـبـين
الياخذ أمـنـَـه عـَـمـنـَـه ايصير
نستاهل حيل اوبالجير
نطـلب من بـَـرَّه التحرير ؟
والشعب الساكت عَ الضيم – يـتـعـَـذب يـنـذَل اسنين
نگـطـَـه اوطاحـَـت من اجـبـين
أعزائي:
الى ستالين أخر ، عذرا الى سالفة أخرى نستودعكم و في أمان الله.
أخوكم / رئيس التحرير

  

المتواجدون حاليا

533 زائر، ولايوجد أعضاء داخل الموقع