داد أبوشكرية كافي أكل موراح أنفجر!!!!

       

    لك داد أبوشكرية كافي أكل موراح أنفجر!!!!

            

أكو ناس بطونهم شبعانة بلاكد عيونهم أتظل جوعانة حالهم حال حكومة المنطقة الخضراء برلمانيين ووزراء ورؤساء احزاب وغيرهم لايمكن أن يشبعوا اطلاقا!!.

نرجع ليورا الى نهاية السبعينيات من القرن الماضي ، حيث أحد الأخوة من اهالي احدى مدننا ويدعى( أحمد) كان بيت خالته أبغداد.
بين فترة وأخرى كلما سنحت له الفرصة يزورهم وسبب الزيارة لأشتياقه لأبن خالته ( محمود / أبو شكرية) وألاخير شگد ما ادگول خوش ولد وكريم وأريحي و صاحب نكته ولكن عيبه الوحيد أكال من الدرجة الأولى مايشبع أبدا!!.
حچالي أحمد بوكتها وگال:
فد سنة وبفصل الصيف كالعادة زرت بيت خالتي(نرجس) وصدفة وصلت الظهر ، وصولي كانت فرحة ماتوصف للجميع بالأخص الخالة العزيزة.
بعد السلام والتحية والسؤال عن الأهل گالتلي:
الغدا حاضر خلي ناكل.
گلتلها: لاوالله ابوشكرية على جية ننتظره هسه يرجع من الدوام ودائرته مو بعيدة ما بقى هواية ويوصل ونتغدى سويا!!.
ماكو اقل من ساعة وصل أبو شكرية الورد شايلله رگية چبيرة، من شافني فرح هواية وحظنني و هو مامصدك بهذه الزيارة المفاجئة الحلوة.
مدوا السفرة ككل العراقيين يامشاءالله ، تمن وبامية وزلاطة ولبن وخضرة وخبز تنور.
ماچذبنا خبر أكلنا الى ما شبعنا ولكن أكثرنا بالتأكيد ابو شكرية الورد ما خلا شىء ما أكله وبالأخير وكالعادة وجه كلامه الى أمه:
- اكولچ يوم أشو اليوم ماكو حكاكة؟؟؟
لك داد أحمد أموت عالحكاكة!! .. أنت هم تحبها مو؟؟
أبوشكرية مستمر بالكلام وأني خربان ضحك ، أبو طبع مايجوز من طبعه!! ،.
وهناك يستلم أبوشكرية بلم مليان حكاكة خلال دقائق يقضي عليها وفوگاها كلاص لبن من هذا التمام!!.
كعادة اهلنا بعد هذه الأكلة الدسمة لابد أن نأخذنا نومة جوة برودة المبردة..
گعدت على صوت أبو شكرية :
- يمة وين الرگية؟؟ جيبيها خلي أگصگصها وناكل شوية منها!!.
خلال دقائق اخونا رتب كلشي و ، گبلنا بدا بالأكل .. ياعيني عليك أبو شكرية الف تالاف عافية بدأ وكأنما ماماكل شىء قبل ساعة!!.
صار العصر وكالعادة بدلنا بأتجاه شارع الرشيد ، أخذنا باص المصلحة خلال ربع ساعة أو أقل وصلنا الباب المعظم.
چنت خايف كلش لايجبرني أخونا على الأكل والشرب وفعلا هاجسي كان بمكانه.
أخوية أحمد هذا الكباب (كباب كركوك) أحسن كباب باهالصوب ، تعال ، تعال ناكلنة چم شيش و خوش لبن عنده!!.
گلتلله: عيوني أبو شكرية أني ما أگدر ، روح أنت أني أنتظرك هنا..!!.
- معقولة؟؟ تعال عيوني تعال ، شوف شلون كباب؟؟.
أمري لله.. دخلنا وإذا أبو المطعم يعرفه كلش زين:
اهلا عيوني أبو شكرية.. هاي وينك عيوني صار فترة ماكو؟؟.
أول ما گعدنا خلال دقائق حطوا گدمنا كل واحد أربع اشياش كباب و طماطة مشوية وخضراوات وچم كرصة خبز و گلاصين لبن!!.
حاولت وردت ، ما فاد ، بالگوة أكلت شيشين والبقية أكلها الأخ بسرعة البرق!!.
طلعنا عاتبته هوايه وگلتلله:
يا أخي ما معقولة تجبرني عالأكل؟؟ أني شبعان وما أگدر أكل أكثر من قابليتي!!.
بس وية من تحچي؟؟.
بدينا بشارع الرشيد ، وصلنا الى الحيدر خانة وهناك صاح أبوشكرية:
- تعال ، ناخذنه  كل واحد كلاص شربت زبيب من حاج زبالة!!.
أمري لله ، رحت وهناك الأخ هم طلع عرف.. أستقبلونا وما أعرف شگاللهم وبسرعة ناوشونا صموتين بيها جبن وگلاصين شربت!!.
كلشي ما حچيت شربت الشربت وطلعت برة!!.
ورا شوية طلع يدردم:
- يا أخي فشلتني ويه الجماعة شبيك؟؟.
كلشي ماحچيت..وصلنا راس شارع المتنبي ودخلنا حتى أشتري كم كتاب وشوية قرطاسية!!.
مشينا وأول ما دخلنا سوگ السراي صاح:
- يا أخي والله عندك حظ!!.
منو أني أبوشكرية؟؟ شنو القصة؟؟.
يا أخي كبة السراي هيچ وكت أمعزلين بلاكد اليوم شوفهم أمفتحين ، تعال ناخذنة كل واحد كباية بلا صمون!!.
يا أخي وشنو هالشدة؟؟ وية صمون لو بلا صمون أني راح أنفجر، أطگ ما أگدر أكل!!.
- يامعود شنو أنت عصفور؟؟ لو طير الحب؟؟.
تعال ، تعال.. الله يساعدهم عيوني ناوشنا!!.
وهناك أستلم ماعونين كل ماعون بي كبايتين وصمونة!!.
- اكل لاتخجلني ترة هذولة أصدقائي لاتسويها سالفة الكباب و الجبن!!.
أمر لله أخذت الماعون وأكلت أقل من ربع كباية والبقية أكلها أبوشكرية ، الله وكيلكم بلعهن وكأنما يبلع حبات الأسبرين!!.
اخذنا شارع الرشيد بأتجاه باب الشرجي ومرينا من گدام أكثر من مطعم وأبوشكرية ساكت ، شكرت الله لأنه شبع وبعد مايلح على عالأكل و الشرب!!.
مشينا وهناك گال:
- تعال دأنسلم على عموالياس صاحب هذا المطعم و نشرب شوية ماي بارد!!.
حاولت أن أبقى برة ولكن هيهات دفعني گدامة ودخلنا جوة!!
الأخ طلع معميل وصديق قديم ، كالعادة رحبوا بينا ومن غير مقدمات جابونا نفرين قوزي على التمن و أنواع المرگ وخبز وصمون وزلاطات!!.
أجيت أتخبل وگلتلله شوف أبوشكرية أقسم بالله ترة أطلع وأرجع گبل للبيت ، يا أخي بيش تطلبني؟؟.
- على كيفك لاتاكل بس شوية نگنگ، عيب العمال يباوعون علينا ، أسكت ، شوف شلون تمن مطبوخ عالحطب وشوف اللحم مال طلي وهذه مرگة البتنجان والفاصوليا.. أكل و لاتحچي رجاء!!.
بالله هذا شتحچي ويا؟؟ من قهري گمت أضحك وأگول وية نفسي وين يودي هالأكل ؟؟ هو صحيح يلعب حديد ولكن مامعقولة كل هالأكل والله العظيم أكل  النفرين واكثر ، عافية معدة؟؟.
أكل مالته وناوش ماعوني ... يا سلام عليك أبو شكرية الف عافية!!.
طلعنا برة وأني خربان من الضحك!!.
مشينا شوية وصلنا ساحة السنك وهناك همبركر أبو يونان ، شغلته بالحچي و عبرنا أبو يونان من دون أنتباه!!.
بعد خطوات گال:
- أخوية هذا مطعم تاجران عنده أحسن گص بالعالم ، تعال ناكلنه كل واحد نص نفر وگول موخوش !!.
طگت روحي ووگفت بوجه وگلتله:
شوف أبو شكرية أقسم بالله اذا ماترجعني للبيت فورا أذب روحي جوة أقرب سيارة!! ولك بابا شنو أنت حوت؟؟ خوموحوت؟؟ عمي فك مني وروح بدربك انشاءالله تاكل عشرين لفة!!.
الحلو بأبو شكرية ما يعرف يزعل!! وهناك حظنني وگال:
- سلامتك بن خالتي الله يسلمك گلت نوصل باب الشرجي وناكلنه شوية دوندرمة من (كيت كات) ومناك الى ساحة النصر يم مطعم علي شيش عنده دجاج شوي يخبل مع ذلك مايظل إلا خاطرك طيب ، يالله نأخذ تاكسي ونرجع للبيت فورا!!.
أول ما وصلنا للبيت صاح بعلو صوته:
- ها يمه سويتينة عشا !!؟؟!... ترة خربانين جوع ، هذا ابن أختج موتني جوع اليوم ، معدته معدة عصفور ما أعرف شلون عايش؟؟.
رباط السالفة:
الحكومة والبرلمان في المنطقة الخضراء حالهم حال أبو شكرية يستحيل يشبعون ، الفرق أن الأخير كان يصرف من جيبه ومن عرق جبينه و ماياكل مال أحد و يخاف الله.
أما حرامية المنطقة الخضرا فلايشبعون الى يوم القيامة والمصيبة واحدهم يدعي انه من سلالة الرسول (ص) وأكبر دليل شوفوا لحيته ومحابس الفضة بأصبعة وگصته مجوية بأكبر بيتنجانه على أساس من كثرة السجود ، يسرقون أموال الشعب و يتفننون بصرفها ، شراء عقارات و فنادق و مزارع و ديسكوات و ملاهي في أنحاء العالم بالأخص في عاصمتهم طهران.
أما أولادهم فواحدهم ليليه يذب كذا الف دولار على راقصات ملاهي بيروت ولا عبالك هذه اموال الشعب العراقي المحرومين من أبسط الخدمات و اللي عايشين بالضيم من ورا هالشلة التعبانه..
الله يطيح حظج يا أمريكا شلون فرضتي هالشكولات الزفرة على العراق و العراقيين!!؟؟.
الى سالفة أخرى أستودعكم والسلام عليكم.
أخوكم
رئيس التحرير

              

المتواجدون حاليا

348 زائر، ولايوجد أعضاء داخل الموقع