مولانا أبو الچقلمبات مسئوول حكومي واجبه فحص المشروبات الروحية!!

   

مولانا أبو الچقلمبات مسئوول حكومي واجبه فحص المشروبات الروحية!!

قبل أيام صوت برلمان المنطقة الخضراء على أهم قرار في تأريخهم الأسود وهو منع و بيع المشروبات الروحية المستورد و المحلي (ابو الكلبچة ) وغيرها!!.

إنتصار كبير و هذه الخطوة الجريئة و المهمة قضت على كل مشاكل العراق من الشمال الى الجنوب و من الشرق الى الغرب ، نعني بصراحة لابد أن نرفع الكلاو لاء بل كل الكلاوات لصاحب هذه الفكرة المهمة الي خلصت أهلنا و ناسنا من كل البلاوي و المشاكل و داعش و ماعش وأختفاء المليارات و أدخال قوات ايرانية وجعل العراق خان چغان للرايح و الجاي و غيرها من المشاكل!!.
رسالة من بغداد الجريحة من أحدى الأخوات اللي لايمكن أنجيب أسهما حتى ولو حرف واحد بناء على طلبها ، ولكن راح نرمز لها بالحرف (س) .
الأخت ( س) تگول برسالتها:
جارنا رجل أمعمم متزوج من أكثر من وحدة و يشتغل بالسياسة حيث عنده سيارات و حمايات و حرس و جواز دبلوماسي ويزور بيت الله كل سنة للحج و العمرة و ناصب مولدة چبيرة ( خلف الله عليه مادنا واير ومتنعمين بالكهرباء ليل نهار!!).
ماعدنا اية مشكلة عدى مرات يسدون الشارع عندما يكون سماحته بالبيت وماخذ راحته بالأخص بعد الظهر ، أما بالليل .. لاء ينغلق الشارع تماما.
قبل أيام زارتنا زوجته الثالثة و هي مرة حبابة ومحترمة و گالت:
أني راح أتخبل خطية رجلي راح يروح بداهية!!لو يتخبل لو يصير بيي عاهة لو ننفضح گدام اللي يسوة واللي مايسوة!!.
- شنو القصة أسم الله عليه .
گالت: مثل ما تعرفين هو بالحكومة و گبل چان يسهر برة من يرجع عندي بالليل يلف راسه و ينام للصبح... ، الحكومة ناوية تمنع كل انواع المشروبات ، لذلك خلوا رئيس لجنة فحص المنكر!!.
ليليه لازم أمدله السفرة من( جاجيك باللثوم و لبلبي - يموت عاللبلبي - و باگلة و زلاطة وتكة دجاج و نومي حامض ) ويطلع بهالبطالة و مايلحگ مرة صفرة و مرة يخليلها ماي تصير عبالك حليب ، بس ريحتها ما يتحملها بشر!!.
المسكين لازم ليلية يجر بهالگلاصات و يكتب تقرير حتى باچر يقدمها للحكومة ياترى هالمشروبات أدوخ البشر؟؟ وشنو مضرتها للشارب من الناحية الصحية و  الأقتصدية والدخل الشهري و .. الخ؟؟.
خو تعرفين هو أمعمم و يخاف الله و مايشرب- لا دادة لاء  ما يسويها اطلاقا - ولكن كودن واجب رسمي وأوامر من الحكومة يگولج ما يهم ماينحسب على اساس منكرو مخالفة الدين والشرع!!.
يظل يشرب ويشرب و مرات أشوفه كلش مرتاح  من يسمع أغاني ساجدة عبيد بالأخص أغنية ( خالة و ياخاله) يگوم يهز رگبة خو طگ الأصبعتين توصل الى أخر الشارع  ومرات عنده چم (سي دي ) لراقصات مشهورات يحب يتفرج وهو يفحص المشروبات ، بس أكثر وحدة تعجبه بالرقص هي (فيفي عبدة المصرية و صافيناز الروسية و ملايين العراقية ) بس الثالثة أكثر لأن هو وطني ويحب كلشي عراقي ويفضلهن على المصريات و ألأجنبيات ، لعد شلون حاله حال الحكومة الوطنية ، واللي أمخوفني يگوم على حيله ويلزم سچينتين بأيده ويقلد ملايين بالحركات ، ولچ عيني أموت من خوفي أگول لايروح ينچخله سچينه بصدره وأروح بداهية!! وهذه كلها مايخالف و تهون ، ورة شوية من يدوخ تمام يگوم يضرب چقلمبات وبالأخير يضرب (زيج من هذا التمام) أفز من مكاني ، نعني أكتفى من فحص المشروبات وأعرفه جاع يريد عشا!!.
واني خايفة دادة ليروح يصير به شي وخاصة هو سمين وكرشة ماشاءالله!!.
قبل أيام وية ثاني چقلمبة كسر التلفزيون و أنلوت رجله و الله ستر ، وهسة خايفة لايروح يكسر التلفزيون الجديد لو اجهزة أخرى!!.... ما أعرف شأسوي أنصيحني دادة راح أموت من  خوفي وأدعيلي بلكن يوخروا من هالمسؤلية وينطوا لشخص أخر ترة راح أموت من القهر لاء وأخاف الله يحاسبنة يوم القيامة كودن هو أمعمم و رجل دين!!.. والمصيبة ما أگدر أحچي دردي لأحد غيرچ انتِ ،وإلا أصير فيلم هندي عند الأهل و الأقرباء!! ، و متأكدة أني هم أتحاسب لأن أسويلة مقبلات وأگعد گبالة الى ما يخلص بعدين أجيبلة العشاء وماياكل غير تشريب لحم زند لو باچة وراها سودة على يدوخ و ينسطر تمام  وينام بمكانه والمعضلة يشوخرعبالك شاحنة قاطرة و مقطورة وصاعدة جبل ،للصبح ما أنام ، عيشتي گشرة والله فلا مرتاحة أتمنى لو يبات عند زوجاته ومايجيني غير بالشهر مرة لو مرتين!!.
أدگول الأخت / س:
والله حيرة شأگولها ، بعد صلاة العشا الحكومة كلها تضرب چقلمبات من چبيرهم الى صغيرهم من برلمانيين ووزراء ورؤساء أحزاب و ياريت چقلباتهم بيه مضرة الهم وبس لاء كل چقلمبة بيها كارثة على اهلنا و ناسنا واحدهم حاله حال أخونة مجنون ساجدة عبيد و الراقصة ملايين دايخ ومسطور وباچر گبل الى قاعة البرلمان و يقررون قرارات مصيرية تخص الشعب و الوطن!!.
وأني أگول:
أختي العزيزه (س) برأيي كلشي لادگولين خلي سماحته يستمر بالچقلمبات ،بأذن الله وحدة من هالچقلمبات تنكسر رگبته و تخلص منه الى الأبد!!.
قرار منع المشروبات الروحية بس عالناس البسطاء اللي واحدهم يشرب ربع حليب سباع  حتى ينسى همومه و قهره ولكن بالمقابل الأخوة النشامة مسموح الهم كلش ومايشربون غير ويسكي خمس نجوم.. خليهم يتنعمون بصاية خوالهم الأمريكان!!.
من طاح حظچ يا أمريكا شلون بليتينا بهالشكولات الزفرة جماعة الچقلمبات!!؟؟.
الى اللقاء الى (چقلمبة أخرى) عذرا الى سالفة أخرى بأذن الله..
أخوكم
رئيس التحرير

       

المتواجدون حاليا

452 زائر، ولايوجد أعضاء داخل الموقع