طلايب و بلاوي سائق سيارة الأسعاف / عمو فرج الله

  

طلايب و بلاوي سائق سيارة الأسعاف / عمو فرج الله

    

كنت في المرحلة الأبتدائية وتلك فترة الشقاوة و المغامرات و الطلايب و البلاوي لكون بهذا العمر الطفل مايفكر بالنتائج اطلاقا..
كان ويانا بنفس الصف عبوسي بن العم فرج الله سائق سيارة الأسعاف!!
الف هنيالك عيوني عبوسي أبوك سائق سيارة أسعاف و لازم تتباهى بأبوك ،كل أبناء المحلة واللي بعمرنا كان يتمنى أن يركب هذه السيارة البيضة الطويلة و فوگاها گلوب أحمر يفتر وألأهم الصافرة اللي تطلقها واللي أدگول : أفسحولي مجال لكوني أحمل مريض و لازم أوصله للمستشفى بأقرب وقت!!.
كان شغلنا الشاغل توجيه هواية أسئلة لصديقنا عبوسي حول ماموجود داخل سيارة أبوه!!؟؟.
أكيد كطفل چان يبالغ بالوصف:
من جوة كلها ساعات و دگم و اشارات و ملاعيب، وهذه السيارة مو كل سائق يگدر يسوقها ..لاء..هذه يرادلها واحد قوي وأسطة و مايخاف من يسوق بسرعة وبيها دگمة حمرة بس يدوسها تنگلب وتصير طيارة وتطير بالسما!! ،ابوية مايخاف يسوق سيارته مثل الصاروخ و مية وعشرين باللوفة!!.
عبوسي يچذب و يبالغ وأحنه كلنه ساكتين ونسمعه..
أيباخ أثاري أبوعبوسي هيج وأحنة مانعرف!!.
فد يوم طلبنا منه أن يراوينة شكو بداخل السيارة؟؟
هو هم ماكذب خبر گال:
بسيطة ،اليوم أبوية يجي للبيت و ورا الغداء ينام شوية، تعالوا أبوگ مفاتيح السيارة ونتفرج على راحتنا!!.
أحنه هم مامصدگين بس أنريد تخلص الدروس ،نرجع للبيت و نتغدى وگُبل الى بيت صديقنا عبوسي!!.
چنا أربعة و خامسنا عبوسي ، من رحت لگيت الربع واصلين گبلي و ينتظروني.
السيارة چانت واگفة وأبو عبوسي بسابع نومه الغريب ما كنا نسأل أنفسنا:
ياترى شلون يصير أبو عبوسي يجيب الأسعاف للبيت هذه الكم ساعة؟؟ طيب اذا صارت مشكلة شلون؟؟.
المهم البطل عبوسي راح وجاب المفاتيح.. ياااه لهذه الفرحة اللي كانت وياها خوف شديد ورهبة لكون لأول مرة أنشوف هذه السيارة العجيبة من الداخل.
المهم فتحنا الباب وكلنا چيتنا جوة..عبوسي كان أفهمنا ، فتح السويج وشغل الصافرة وأحنه فرحانين أووووي!!.
عبوسي دخليك مو أدوس على الدگمة الحمرة لنروح أنطير و بعدين شينزلنا!!؟؟؟
من صوت الصافرة طلعنا العم فرج الله باللباس و الفانيلة وشايلة توثية (منظره گدامي كان قصير القامة و كثيف الشعر ولابس نظارات طبية) ...وأحنه شلييييع كل واحد بجهة وحتى عبوسي كان أول ما شلع مية وعشرين با اللوفة!!.
المهم ورا شوية شفنا السيارة تحركت ورجع الى مقر عمله!!... وراها ماجاب السيارة للبيت أطلاقا!!.. ياخسارة ما تمتعنا براحتنا كل الصوچ من عبوسي أستعجل و فتح الصفارة!!.
كان للعم فرج الله سوالف أغرب من الخيال:
كان هدفه أن يوصل المريض للمستشفى وهذه حتى لو سحگ أكثر من شخص !! لاء مايهم لكونه بالواجب والواجب مقدس لازم يوصل المريض و أي تأخير يجوز يروح بيها هذا المسكين!!!.
هكذا كان العم فرج الله فاهم شغلته وواجبه!!.
يعني مثلا:
فديوم كان شايل مريض ويشكي من مصران أعور!!الشارع كان مزدحم والسير بطىء!!
العم فرج الله ماكذب خبر ، راد يقصر المسافة لذلك دخل سوق شعبي وبأقصى سرعة والنتيجة:
- أصابة عدد من الموجودين أصابات خفيفة و الله ستر!.
- اتلاف كميات چبيرة من المواد بالسوگ:
ست عربانات رگي و بطيخ و خيار و طماطة و بيتنجان و شجر گواشر باميا و عشرة أقفاص دجاج و بط وعرباتين سمچ وعشرات الأقفاص من الخضراوات و جدورة لبن و تمور و تنكات دبس و راشي و حلاوة و أكوام من البيض والسلگ والرشاد والكرفس... وبلاوي سودة!! سحگهن و دمرهن دمار كامل بحيث صارت زبالة.
أما الناس من أهالي البسطيات والمسوگين صار طشارهم ماله والي كلمن عاظ  دشداشته و يركض بأتجاه ، العبى و الفوط و الغتر والنعالات بفلس!! والعياط واصلة الى ذاك الصوب ، لادگلوللي ولا أگولكم  هذاك اليوم سواها مذبحة بحق و حقيقي!!.
كل هذا والعم فرج الله أمطلع راسه ( لأن الجامة الأمامية كلها طماطة و لبن و راشي و دبس و مايشوف كلشي) ويصيح:
ولكم وخروا من گدام السيارة شايل مريض حالته خطرة ذنبكم على جنبكم وهناك يجيبهم بزيگ حيدري ينسمع بعلاوي الحلة!!.
السوگ عزل عالأخر و العالم خسرت بضاعتها و أصخمت و گعدت!!.
المهم الأهالي ، أقصد المتضررين  قدمت شكاوي وأنحال العم فرج الله للمحكمة!!.
يوم المحكمة سأله القاضي:
يا غضب الله ولك هاي شمسوي!!؟؟
العم فرج الله ولا چنة وياه وبأبتسامة گال:
سيادة القاضي ، يعني شمسوي؟؟ كلشي ما أمسوي! أني كنت بواجب وچنت شايل مريض ، يعني شلون أخلي المسكين يموت؟؟ مو كان أمانة برگبتي صاحب كومة جهال!!..
القاضي صار عصبي وگال:
ولك غضب الله يعني شلون وية سوالفك؟؟ ولك بابة هذه مو أول مرة ، يعني تكتل عشرة في سبيل أنقاذ واحد؟؟.
المهم  والغريب العم فرج الله ولا كأنما مرتكب مخالفة و جريمة؟؟ كان بس يردد :جناب أني جنت بواجب!!.
الحچي يطول و مايفيد ويه فرج الله!!.
كانت هيئة المحكمة تعرف نيات وصفاء قلب العم فرج الله وسذاجته لذلك كانت العقوبة خفيفة جدا وهذا هو فرج الله ماتريدوا جيبوا غيره والله مال يجوز من سوالفه ابدا لا تحچوها!!.
رباط السالفة:
حكومة المنطقة الخضراء سوالفها ما تخلص لابل أضرب من سوالف و بلاوي العم فرج الله ، يعني مثلا لأنه القادة العسكريين أغلبهم (طگ عطية وخريجي مدارس يمة گرصتني عگربة العسكرية وواحدهم نص ردن)  أنشوف منهم ومن تصرفاتهم و أوامرهم عجب العجاب.. مثلا:
بعد تحرير المدن يوعزون بسرقة الدور و المحلات و حرق وهدم ما تبقى ، وعندنا أمثلة كثيرة على ذلك  فتحرير مدينة تكريت من عصابات داعش كانت فرحة كبيرة ولكن بعدين شفنا شلون الأخوة فرهدوا البيوت و المحلات التجارية!!؟؟.
ومن تسألهم يابة ليش؟؟ شدتسوون؟؟ يردون:
أحنة أهم شىء حررنا المدينة وطردنا عصابات داعش أما البقية من سلب و نهب وأعتقال شباب المدينة هذه كلها ضمن الواجبات الوطنية المكلفين بيها!!.
يعني مايكفي قصف طائرات التحالف و ظلم عصابات داعش والنوبة جا دوركم للسلب و النهب والحرك و اعتقال عشوائي للشباب!!.
الله يرحمك يا عم فرج الله لأنك چنت تشتغل على نياتك  ومن غير أن تفكر بمصلحتك الشخصية أو تحمل حقد على أي كان!!.
أما جماعة المنطقة الخضراء فعلا واحدهم غضب الله و نص!!
أودعناكم عيوني الى سالوفة أخرى..
أخوكم
رئيس التحرير

  

المتواجدون حاليا

456 زائر، ولايوجد أعضاء داخل الموقع