(أبو صابر) صاير .... مدير!!!

  

     (أبو صابر) صاير .... مدير!!!

 
                منقول للعبرة والفائدة

بداية تكوين الدولة العراقية بالعشرينات چان اكو فد فلاح بسيط وساذج يعني (من اهل الله مثل مايكولون) عنده زمال (حمار) أجلكم الله، يحمل عليه ويكرب عليه بقرية بعيدة ،، الحكومة حينها بدأت تبني مدارس بالارياف ، وصاحبنا مرّ على العمال، جاي يبنون بمدرسة، سألهم:

(بوية إشجاي تبنون؟)

گالوله: (عمي نبني مدرسة)

گاللهم (وعود شنهي هاي المدرسة؟)

گلوله: (هاي تسوي الزمال آدمي)! 

گاللهم: هااا

گالوله:(مثل ما نگلك عمي)

گال (هسه هذا ابو صابر المْطَيْ مالتي من أخليه يمكم يصير آدمي لان مدولبني يعضّ ويزگط وصعب فرد نوب)!!

هذولة العمال إنغولة .. واحد ندس الثاني، گاله، (ولك خلي يجيبة نحمّل عليه ونگضي بيه شغل)، كالولة:(اي عمي خلي يمنه وانت روح)، عافه يمهم وراح ، هذوله خلصوا شغل البناء كله براس أبو صابر، وكملت المدرسة وانفتحت.. وبعدين باعوه و أكلوا فلوسه وراحوا!!
وره كم سنة، صاحبنه اتذكر الزمال مالته ، گال خلي اروح اشوف (ابو صابر) صار آدمي لو بعده؟ وصل للمدرسة لگه المدرسة بيها طلاب ومعلمين وبالصدفة مديرالمدرسة كان اسمه (استاد ابو صابر).. كالهم (عمي وين الزمال مالتي ابو صابر؟)..گالوله المعلمين: (عمي احترم نفسك!..ابو صابر مدير المدرسة) ، گاللهم هااا مو بس سويتوه آدمي، والنوب صاير مدير، صيحولياه!).. إجه المدير لابس قاط ورباط، گاله (تفضل عمي)، گاله (ها ولك ابو صابر ما عرفتني نسيت شگد چنت أُحمِّل عليك، واترسلك العليجة شعير)!، گاله (عمي انت إمخبل إشبيك؟؟).. گاله (ولك ابو صويبر شنهي الغاط والرباط خلنّك تحچي وياي هيچ بعده إيلالك عندي)، المدير گاله (عمي روح منا لا ابتلي بيك) ، گاله: (خايب كلش سويت روحك ما تعرفني ، ولك موش حتى رشمتك بعدني ضامها الك)!، المدير انحرج وضاج وطفرت روحه)، حط على صاحبنا وطگه بدفرة على صدرة ، على أثرها فقد الوعي واجوّي المعلمين ذبوا عليه ماي وفركوله، گعد، گالهم (والله هذا هو صويحبي، صحيح هندامه متبدل لابس غاط ابدال الإجلال ، بس اعرفه من زگطته هيه هيه!!).
ربّاط السالفة يا جماعة الخير...
عمي على كيفكم حتى لو لبستوا غاط ورباط... تره نعرفكم من الزگطة.. هيه هيه.!!!!
وهاي القصة انشبهها بهاي الحكومة التي هي لملوم من شوارع اوربا وطهران ودمشق وبيروت.. لملموهم من الشوارع وكانوا يتسولون في الدول ... والان اصبحوا مسعولين.. وحتى البدلة والرباط لايعرفون يلبسونها وهي اصلا لا تليق بهم وماتلوك إلهم..
ها إخوتي وصلتوا إلى رباط السالفة؟ مع الاعتذار من ابو صابر اللي يروحولة فدوة هذولة الفاسدين..

الأبراج وتفسير الأحلام

المتواجدون حاليا

546 زائر، ولايوجد أعضاء داخل الموقع