الگاردينيا - مجلة ثقافية عامة - بغداديات / شلاگة دفتردار ...!!!

بغداديات / شلاگة دفتردار ...!!!

                                          

     

أبو فنجان - ياهلا ومية هلا بأبو نجيبة ....تعال أگعد يمي هنا ...شلونك وشلون عافيتك ....چايات هنا يول عليوي ...اي ابو نجيبة شكو ماكو؟؟

أبو نجيبة - شتريد أكو ....بعد صارت ولاية شلاگة

أبوفنجان - شلاگة منو هذا ....اعرفه؟؟

أبو نجيبة -  شتعرفه ...قابل عمرك عمر ألتفگة؟ ...سالفة صارلها ميتين سنة رحمة لاابوك
 
أبو فنجان - دسولفها بروح ابوك - عليوي مسموط الصفحة وين صارت چاياتنا؟؟؟

أبو نجيبة - يگولك يامحفوظ ألسلامة بزمن ألعثمانيين أجى والي جديد لبغداد وكان مدير الشرطة علي بیگ ...اسبوع وفطس ألدفتردار ...زين ألوالي جديد ومايعرف احد گام وكلف علي بیگ مدير الشرطة يشوفله واحد يصير دفتردار ولازم يعرف يحچي تركي

أبو فنجان - سهلة هاي بغداد مليانة زلم

أبو نجيبة - يازلم ...دأصبر على تاليها ....علي بیگ شاور النايب مالته وچان خبيث ماكو اخبث منه بمخلوق الله ....ورا صفنة طويلة النايب گال لگيته ...ماكو غير شلاگة ...يعرف تركي بلبل وماكو دكة ناقصة مايعرفها.... ويصير ايدنا ورجلنا

أبو فنجان - زين هاي مواصفاته...... بس هو شنو شغلته بالاساس؟؟

أبو نجيبة -  شلاگة فد واحد حرامي مبهدل جهرة سز ...گول ما أطولها عليك جابو شلاگة ولحمام ألسوگ وگعولة جلف وراها للحلاق ولبسوه طخم تمام وعصاية وطربوش ويمني أصلي ....طلع شلاگة بيگ ..زين شلون راح يفهوه شغلته ....علي بیگ گاله ولك شلاگة سويناك ادمي هسة تفوت على الوالي يسألك چم سؤال تجاوب بالتركي على گد السؤال لغوة زايدة ماكو ...ثلث الك وثلثين النا

أبو فنجان - ديلا بالله ....من حرامي لدفتردار ....وبعدين أغاتي؟؟

أبو نجيبة - قشمر ألوالي بجم حچاية بالتركي وصار شلاگة دفتردار بغداد ...من يمشي صفطة جندرمة گدامه وصفطة ورا ....وكلشي صار بيده يعزل الشورجة بكيفه ....يگطع ألجسر بكيفه
 
أبو فنجان - عمت عينچ  يادنيا  ...شلاگة صار دفتردار!!

أبو نجيبة - وفد يوم كگاعد مستر شلاگة على الشط والخدم شايليله الشمسية ويدخن نارگيلة وصينية الچاي گدامه ....فاتت جنازة جاية من الكرخ للرصافة لمقبرة شيخ عمر ...صاح شلاگة عليهم وگال الا تفتحون التابوت واشوف الميت!!!
 أبو فنجان - شيسوي يشوف الميت؟؟ ...بالله هذا غير دين سز

أبو نجيبة - مايگدرون الناس يگولون لشلاگة لا ....فتحوله التابوت ...كشف وجه الميت وغطاه وراها وگال .. انكشروا من گدامي ....ابن الميت وهو ديغطي وجه ابوه شاوره

أبو فنجان - شگله بروح ابوك؟؟؟

ابو نجيبة - حتى شلاكگة سأله وگله يول شنو شاورت ابوك؟؟؟ رد الولد وگال گلت لاابوية.... سلملي على الميتين وگلهم لايتحسفوا على الدنيا تره ضرطت شلاگه صار بيها دفتردار!!
 
ابو فنجان - وهسة شسميها ابو نجيبة؟؟
 
ابو نجيبة - هسة صايرة كلها شلاگة!!!

الأبراج وتفسير الأحلام

المتواجدون حاليا

617 زائر، ولايوجد أعضاء داخل الموقع