ماجدة ريسز الله يرحمها !!

التفاصيل

تم إنشاءه بتاريخ السبت, 09 أيلول/سبتمبر 2023 11:01

كتب بواسطة: سيف الدين الألوسي

بقلم سيف الدين الالوسي

ماجدة ريسز الله يرحمها !!

هي امرأة تركية كانت متزوجة احد ملاك الخيل ،، وكانت تسكن في بيوت نادي المنصور مع المرحومات صوفي مبارك وبيت احمد الحيدري ورابعة الالوسي وبيت سرمد وزيد وغيرهم .

تحچي عربي مكسر حالها حال معظم التركيات ببغداد .
كل متشوفني تسأل : سيفي انتي بالتبيه !! لا مو بالطبية !! زين ، ليش مرحتي للتبيه مثل بابا !!؟؟؟
والله مجبت معدل يدخلني طبية !!
چان لازم تجيبين موعدل وتدخلين تبيه !!!
اشاسوي ،، الله مقسمنه نخش طبية ؟!!!
وكل مرة تعيد نفس السؤال ؟؟ انتي بالتبيه !؟؟؟
لا والله مو بالتبيه ؟؟ ليش مصرتي مسل بابا دكتور ؟؟
مو بيدي مصرت دكتور !!!
بحديقة نادي المنصور تجيني واني متونس بشمس تشرين وامامي مي شعير امستل مجورش !!
اكلج سيفي … لعبي رقم اسنين الفرس زمام تره مزبطيني عليه !!
ميخالف ،، اشكرج جدا !!!
سيفي لعبي بلوبرد رقم ٧ هزي جاكي مالته سعد عبد الله زبتني عليه !!! ميخالف خالة ،،،
نلعبه اني وياج شراكه !!!
خاله اني ما العب ثكيل !!! انتي تلعبين ثكيل !!!
ميخالف انتيني خمسة دنانير واني خمسة نلعبه بعشرة !!!
خاله عندي دينارين بس مخصصة للعب !! زين انتيني ياها !!!
تفضلي !! وجره سعد لبلوبرد وخسرنه !!
هازا سعد سختجي ، ادبسز كشمرني !!!
والله اني القشمر !!!!
وترجع تسألني ؟؟ انتي بالتبيه !! لا مو بالتبيه !!!
ومثل ماري منيب وابدو !!! انتي يشتغل ايه ابدو ؟؟ ويكلها سواق !!
واني انتي بالتبيه !! لا مو بالتبيه !!!
الله يرحمك يا خالة ماجدة ويرحم ذيج الايام الحلوة !!