تجاربي مع الشرطة الاميركية !!!!

                                        

                       سيف الدين الألوسي

   

تجاربي مع الشرطة الاميركية !!!!

الشرطة الاميركية جهاز متطور جدا مربوط بمنظومة الكترونية وقاعدة معلومات معلوماتية عجيبة ،، مثل اي مكان بالعالم يوجد في الشرطة الاميركية الزين ويوجد الشين ،، وكذلك تعتمد على الولاية ونوع المنطقة ،، فالمناطق الغنية والراقية والتي يدفع اهلها الضرائب ، تكون الشرطة فيها قوية جدا ومطبقة للقانون بكل احترافية ومهنية رغم قلة دورياتها ،، وفي المناطق التي تكثر فيها الجريمة المنظمة والفقر تكون الشرطة ضعيفة وفي بعض الاحيان يتعاون بعض من افرادها مع اصحاب الجريمة المنظمة ورغم كثرة دورياتها ،، ولكوني اشتغلت في شركة هندسية ، رأيت الكثير من الولايات ! ، شرطة ولاية كاليفورنيا مثلا من اقوى اجهزة الشرطة التي رأيتها في حياتي ،، وكذلك شرطة ولاية لويزيانا كذلك ورغم فقر الولاية الثانية ،،، اما شرطة ايداهو وايوا فهي حرفية ومهنية ولكن بجدية اكثر من اللازم !!!! شرطة متشيغان تعتمد على المناطق والشرطة تخاف ان تدخل مناطق الميل الخامس والسادس والسابع وبعض المناطق الاخرى ، بسبب انتشار الشقاوات والجحنتية ،، ولو هنالك تغيير ملموس في خدمات الشرطة في تلك المناطق بالسنوات الاخيرة ،، !!

طبعا الشرطة في اميركا ودورياتها مرتبطة بنظام واحد وتقوم بادوار صنوف الشرطة كالمرور والمخالفات وغيرها ، ولديها ربط مع الحريق والاسعاف الفوري وبقية اجهزة الطوارئ .
بالنسبة لي ولكوني من النوع الملتزم جدا جدا بالقانون ، واحترمه جدا ، وحتى في بلدي العراق لم اخالف ولا مرة القانون ولم اضرب ترفك لايت او اخالف طيلة سياقتي الممتدة لما يقارب النصف قرن ،، وكذلك بالنسبة لمراعاة كل القوانين الاخرى ، وحتى عند التسريح كانت كنيتي والحمد لله خالية من اي عقوبة ، وطيلة خدمتي البالغة ١١ سنة وتسعة اشهر واسبوعين !!! القانون فوق الجميع  واحترم تحترم .
في اميركا وطيلة عيشتي هناك والتي قاربت الثمان سنوات لم ارتكب ادنى مخالفة
،، وكذلك كنت احرص على نصيحة اولادي بذلك ،، وكنت احتسي الاسكنجبيل في البيت ، او اركب مع احدا لم يحتسي وحتى انني لم اقود السيارة وانا شارب نقطة كحول ،، ولم اخالف السرعة ولو بميلين فوق السرعة المقررة ،، وحتى بالبيت كنت ملتزما بعدم رفع صوت التلفزيون او اي ازعاج للجيران بعد التاسعة ليلا ،،
وانا وعائلتي نطبق دائما المثل وفي كل الدول التي سكناها ( يا غريب كون اديب ) ،،، ومن يطلع من داره يقل مقداره ،، والحمد لله لم يقل مقدارنا في اي دولة ،، بل كنا محترمين حتى في بعض الاحيان اكثر من دارنا .
نرجع الى سالفتنه ولي تجربتين فقط مع الشرطة الاميركية طيلة سكني ،والاثنتين لا تخلو من طرافة !!!
الاولى : وصل احد الاصدقاء على الاي او ام الى اميركا وكنت كفيله ،، واخذته بعد ايام بالبارت او القطار لاريه معالم خليج سان فرانسيسكو ، والمدينة ،،، وعند رجوعنا في المغربية وكون محطة البارت تبعد ميلين عن سكننا ،، فقلت له نرجع مشي ، وعند رجوعنا مررنا بشورت كات او مختصر طريق يمر بنص مستشفى مثل مدينة الطب ،، وعند عبورنا احد شوارع المستشفى الداخلية ،، اشتعل ضوء منع العبور الاحمر بمنتصف المسافة وحيث الح صديقي على العبور في اللحظات الاخيرة وكون الشارع فارغ وبيده الجگارة ،، ومنشوف غير سيارة شرطة طلعت من جوه الگاع ، ومن احدى مواقف السيارات جوه الگاع والمستشفى ،،، واجه علينه شاعل اضويته وفاتح صافرته، وگفنه مثل الچذبات وصاحبي شمر الجگارة بالگاع من ثولته واني اخذتها من الگاع بسرعة وطفيتها وخليتها بجيبي ( غرامتها الف دولار ) ،،، المهم نزل الشرطي وكان في الخمسينيات ،، وطلب الاي دي او الهويات واني انطيته هويتي وصاحبي بعد ماعنده هوية بطرك i94 وهو كارت دخول ،، وگتله للشرطي ،، الاخ جديد وميعرف القانون،، گاللي بما يشبه القول ،، هو مطي انت ليش تصير مثله ،، غير تعلمه واثنيناتكم شياب ومتعلمين ،، مو حتى اذا مسحوگين على خط العبور محد يعوضكم وهو يتشاقه ويانه ،، وبعد لتسووها حبابين ،، وشال جگارة من عنده انطاها لصديقي ،، وبعدين رحنه بالهرولة لهوترز براس شارعنا حتى نحتسي الجعة الباردة ولتطفي نار الگلب التي اشتعلت من الفزة ،، وصار هذا الشرطي  صديقي كل ميشوفني بسيارتي يدگ صافرة ويضحك ويسلم .
الحالة الثانية
كل يوم كنت اخابر والدي ووالدتي بعمان وحيث والدي رحمه الله كان مريضا ولا يعرفون استعمال البرامج الحديثة، فقد كنت استعمل كارت تلفون للاتصال بهم على الارضي،، ولكون الفرق بالتوقيت هو ١١ ساعة شتاءا و١٠ صيفا ،، فقد كنت اخابرهم بعد ١١ ليلا وحيث تكون عندهم الساعة ١٠ صباحا،، وفي احد الايام وكنت تعبان ومطوخ ،، دكيت رقم خطأ مكتوب بالكارت ويحتاج الى مكرسكوب لقرائته ،، طلعلي تسجيل ،، هنا امن المطارات ، اذا عندك شي دوس فلان رقم وتعرفون جنجلوتيت اميركا ،، وسوالفها !!! اني سديت التلفون ،، وره نص دقيقة دك علي وكاللي بالتسجيل ،، انت خابرت اذا عندك بعد شي گول ، كولت رضا علي الله يرحمه ،، كتله متأسف طلبت خطأ ،، مفاد ،، رجع خابر وكاللي اتصل بشرطة فريمونت منطقتك وخبرهم بسرعة !!! ،،، اني لبسته ،،،، وره ثلاث دقايق مو اكثر ، اندك جرس الباب،، واذا بشرطة اثنين كل واحد بابعاد مترين وربع بمتر ، يسألوني لويش خابرت امن المطارات؟؟ ،، بالعظيم غلطت وده اخابر اهلي بعمان وهذا الكارت باعوه وشوفوه ،، وبعد ان تأكدوا ،، اتصلوا مباشرة والغوا النداء ، واعتذروا مني للازعاج الذي سببوه ،، ولكن بعد ان خرطنا العافية !!!! وطار الاسكنجبيل !!!!!!!!!!!!!!
كتبناها بعد ان انثبرت الدنيا بسبب تبليغ عن عشرين دولار مزيفة طلعت سليمة ،، ذهب ضحيتها انسان برئ مظلوم بيد شرطي مجرم حاقد ،، ومع كل هذا نقول ،،،، مو كل اصابعك سوه !! وهذا المقال ليس مدحا لدولة او لاحد ، بل فقط للتوضيح . وبيان الحقيقة كما عشتها بتجربتي الخاصة .
وعشنه وشفنه ،، ومندري بعد شرح نشوف !!!!!!

  

إذاعة وتلفزيون‏



أفلام من الذاكرة

الأبراج وتفسير الأحلام

المتواجدون حاليا

1042 زائر، ولايوجد أعضاء داخل الموقع