الگاردينيا - مجلة ثقافية عامة - دبلوم تگارة ،، ممكن سيگارة !!!!

دبلوم تگارة ،، ممكن سيگارة !!!!

                                           

سيف الدين الألوسي

دبلوم تگارة ،، ممكن سيگارة !!!!

همين رح نرجع على طيحان الحظ بزمنه والمستمر لليوم بنجاح ساحق مثل فيلم سنگام !!

تخرجنه سنة ١٩٧٨ وبوجهنه للتجانيد ،، ومن ثم تم سوقنا الى ك ض ح وهي كلية الضباط الاحتياط ،، وهناك من ذهب ضابطا ولاسباب اقتصادية بالدرجة الاولى وحيث راتب ابو خليل ١٠،٥ دينار وراتب الملازم المجند ٥٠ دينار ،، ولكن العديد سووا واسطات للخدمة في الصنوف كجنود ونواب عرفاء وحتى يكضوها للخدمة ، وتكون نقلتهم اسهل من الضباط ،، وكانت لجنة الانتقاء في ك ض ح تإخذ الحزبيين فقط ،، وقسم من الحزبيين يفشلون نفسهم باللجنة الطبية في م ر ع او مستشفى الرشيد العسكري وحتى يفشلون ،، المهم في نفس الوقت طلع القبول المركزي للكليات كافة ،، وكان تعييني في الحاسبة الالكترونية لوزارة التجارة في طريق معسكر الرشيد وكانت الحاسبة حديثة في ذلك الوقت ،، والبقية توزعوا على مختلف الوزارات ،، ،، نامت علينه الطابوگة ووگف التسريح بسبب الحرب ،، وطلعت ارواحنا ،، وقسم راحوا انتداب من بعض الوزارات واني باقي مثل فريد الاطرش اون واعوي !!! في احدى الاجازات راجعت ابن خالتي المرحوم صباح رفيق المفتي وكان معاون المدير العام للاجهزة الدقيقة في شارع الصناعة سنة ١٩٨٥ وهو من موظفي التجارة المحبوبين وكان سابقا في الشركة العامة للسيارات ،وهو من استنگه لون السيارة البيضاء، ونقشة الكشنات ولونها للرينو ١٢ عند استلامها نهاية سنة ١٩٧٤ ،، كتله ،، ابو مضر الحبيب اني يمكم متعين تعيين مركزي ،، تره تعبت ،، بلكي فد انتداب ، فد تأجيل ، وحتى لو سنة وحدة ،، تره صاعدة الكآبة والضغط لابو موزة وصرت عريف مهذب همين،، !! صاح على ابو الذاتية وگاله ،، اكتب للسيد الوزير بأننا في حاجة ماسة له وللعمل في الحاسبة ،، ولنقص الكوادر العلمية ،، اجابه الموظف ابو الذاتية ،، ليه يا افندم ،، ده انا دبلوم تگاره واعرف بالحاسبات وكل حاگه !! گاله صباح الله يرحمه ،، تعرف برمجة الحاسبات اي بي ام ،، كاله ،، اتعلم اي حاگه ،، گربني وحتشوف !!!
اني ضليت صافن على هذي القابلية والعين الصلفة ، وتوقعته للمصري دبلوم ، اي ماستر او بدرجة ماستر ،، وگلت ،، عيني صباح ،، الاخ ماستر تگارة ،، واني بكلوريوس علوم فيزياء ،، حقه !!
ضحك ابو مضر الورد ،، وگال ،، هذا دبلوم من الزئازيئ بالتكارة ،، وشهادتة تعادل السادس تجاري عدنه ،، بس من قلة الخيل شدوا للزمايل سروج !!
المهم وقع الكتاب ابو مضر ودزه للوزارة لانتدابي ،، فلم يأتي الرد ، وبعد شهر قابل الوزير بالصدفة وقال له ، ارسلت لسيادكم كتاب حول الموضوع الفلاني ،، فاجابه الوزير ح ع الله يرحمه ،، ماذا اقول اذا فتشني مسؤول ،، فقال له ،، سيادة الوزير، انت عضو قيادة قطرية وهذا الامر من صلاحيتك ،، فمن يفتشك !! قال له ،، ليش متعرف !!!
فعمل لي كتاب بانهم ليسوا بحاجة لمبرمج حاسبات الكترونية ويلغى تعيينه المركزي للتنسيب في هذه الوزارة وعدم ممانعة !! ، حتى أدبر امري !!
المهم دبلوم التگارة طلع احسن بكل شئ !!
واليوم اهل الشهادات الماستر والدكتوراه حايرين بزمانهم وغيرهم امورهم ماشية ،، وللاسف بلدنا لا يحب ابنائه المخلصين ،، ومن زمان !!
الف رحمة عليك ابو مضر ،، اما ابو دبلوم التگارة ،، فسافر سنة ١٩٩٠ واشترى اربع سيارات ميني باص وشقتين وتزوج ثانية وحسب ما قال لي ابو مضر ،،
واني بقيت افر براسي بعد تسريحي بنفس سنة سفره ،، ثم بدأ الفيلم الثاني مال الكويت ،،، وحيث لم يبقى للعمر بقية اليوم !!
ملاحظة: وزارة التجارة چان بيها خوش مال ،، كلهم حلوات اول باب !!
تحياتي للجميع

الأبراج وتفسير الأحلام

المتواجدون حاليا

603 زائر، ولايوجد أعضاء داخل الموقع